ރިއޯ ޑި ޖަނެއިރޯ. ބްރެޒިލް (ސެޕްޓެމްބަރު 15) - އެމެރިކާ، މެކްސިކޯ އަދި ކެނަޑާގައި ބޭއްވި ފީފާ ވޯލްޑް ކަޕަށް ފަހު ބްރެޒިލް ޓީމުން ރިޓަޔާކުރި ނޭމާ ނެތްތަން ފޫބައްދަން އެ ޓީމަށް އުނދަގޫވާނެ ކަމަށް ބްރެޒިލްގެ ކޯޗު، ކާލޯ އަންޗެލޮޓީ ބުނެފި އެވެ.
އުމުުރުން 34 އަހަރުގެ ނޭމާ، މި ފަހަރުގެ ވޯލްޑް ކަޕްގެ ސްކޮޑުގައި ހިމެނި ތިން މެޗެއްގައި ބަދަލު ކުޅުންތެރިއެއްގެ ގޮތުގައި ކުޅެން އެރިއިރު، މިއީ، މިދިޔަ ތިން އަހަރު ތެރޭ އޭނާ ބްރެޒިލަށް ކުޅެދިން ފުރަތަަމަ މެޗުތަކެވެ. ވޯލްޑް ކަޕް ކޮލިފައިންގައި 2023 ވަނަ އަހަރުގެ އޮކްޓޫބަރު މަހު އުރުގުއޭއާ ކުޅެނިކޮށް އަނިޔާވެގެން، ނޭމާ އަށް ދިގު މުއްދަތަށް ކުޅުމާ ދުރުގައި ހުންނަން ޖެހުނުއިރު، ގައުމީ ޓީމަށް އަލުން އެރުމަށްޓަކައި ވެސް ދިގު އިންތިޒާރެއް ކުރަން ޖެހުނެވެ.
ވޯލްޑް ކަޕްގެ ގަަދަ 16 ބުރުގައި ނޯވޭ އަތުން ބަލިވެ ބްރެޒިލް ކެޓި މެޗަށް ފަހު ގްލޯބޯ އެސްޕޯޓް ޓީވީ އަށް ދިން އިންޓަވިއުއެއްގައި ނޭމާ ބުނީ، ވަރަށް މަސައްކަތް ގައުމީ ޓީމުގައި ކުރެވިއްޖެ ކަމަށާއި ބްރެޒިލް ގައުމީ ޓީމަށް 2010 ވަނަ އަހަރު ފުރަތަމަ މެޗެއް ކުޅުނު މެޓްލައިފް ސްޓޭޑިއަމްގައި އެންމެ ފަހު މެޗު ކުޅެ، ގައުމީ ޓީމު ގެ ކެރިއަރު ނިމުނީ ކަމަށެވެ.
ނޭމާ، ރިޓަޔާކުރި ފަހުން ބްރެޒިލް ކުޅޭ މެޗުތައް މި މަހުގެ ފަހުކޮޅާއި އަންނަ މަހު ކުރީކޮޅުގައި އޮންނާނެ އެވެ. އެއީ، އޮސްޓްރޭލިއާއާ ދެކޮޅަށް ކުޅޭ ދެ މެޗާއި އިންޑިއާއާ ދެކޮޅަށް ކުޅޭ މެޗެވެ. އަންޗެލޮޓީ ބުނީ، ކޮންމެ ޓީމަކާ ދެކޮޅަށް ބްރެޒިލުން ނުކުތް ކަމުގައި ވިޔަސް ނޭމާ ފަދަ ކުޅުންތެރިއެއް ނެތުމުގެ ކަންކަން ޓީމުން ފެނިގެންދާނެ ކަމަށެވެ.
"ވޯލްޑް ކަޕް ސްކޮޑަށް ނޭމާ ނެގީ އޭނާ އަށް އެ މަގާމު ހައްގުވާތީ. އެ ތަފާތު ކޮލިޓީ އޭނަ ކިބައިގައި ހުރީމަ. ދެން، ނޭމާ މިހާރު އެ އޮތީ ޔަގީންކޮށްދީފައި ގައުމީ ޓީމަށް ކުޅުން ނިމުނީކަން. ނޭމާ ނެތްތަން ފޫނުބެއްދޭނެ، އޭނާ އަކީ އާދަޔާހިލާފު ހުނަރެއް ހުރި ކުޅުންތެރިއެއް. ދެ ވަނަ ނޭމާ އެއް ނުހުންނާނެ،" އަންޗެލޮޓީ ބުންޏެވެ.
ބްރެޒިލްގެ ގައުމީ ޓީމަށް އެންމެ ގިނަ ގޯލު ޖަހައިދިނުމުގެ ރެކޯޑް ޕެލޭ އަތުން އަތުލި ނޭމާ، ގައުމީ ޓީމަށް ކުޅުން ހުއްޓާލިއިރު، 130 މެޗުން 80 ގޯލު ވަނީ ޖަހައިފަ އެވެ. ބްރެޒިލަށް 2013 ވަނަ އަހަރުގެ ފީފާ ކޮންފެޑެރޭޝަން ކަޕް ކާމިޔާބުކޮށްދިން ނޭމާގެ ކެޕްޓަންކަމުގައި ބްރެޒިލުން ވަނީ 2016 ވަނަ އަހަރު ބްރެޒިލްގައި ބޭއްވި ރިއޯ އޮލިމްޕިކްސްގެ ފުޓްބޯޅަ އިވެންޓުން ރަން މެޑަލް ވެސް ހޯދައިފަ އެވެ.
