ޔޫރަޕުން ލީބިޔާއަށް އެތެރެކުރި މަސްތުވާތަކެތި އެ ގައުމުގެ ސަލާމަތީ ބާރުތަކުން އަތުލައިގަނެފި އެވެ. މި އެކްސްޓަސީ ގުޅަތަކުގައި ހުރީ ލީބިޔާގެ ކުރީގެ ލީޑަރު މުއައްމަރުލް ގައްޒާފީގެ ސޫރަ ކުރަހާފަ އެވެ.
ޓްރިޕޮލީގެ ސަލާމަތީ އިދާރާއަކުން އާންމުކުރި ފޮޓޯތަކުން ފެންނަ ގޮތުގައި، ގަދަ މުށިކުލައިގެ މި ބޭސްގުޅަތައް ހުރީ ގައްޒާފީ ސިފަވާ ގޮތަށް ބައްޓަންކޮށްފަ އެވެ.
މި އަހަރުގެ ޖެނުއަރީ މަހު އދ. އިން ނެރުނު ރިޕޯޓެއްގައި ބުނެފައިވާ ގޮތުގައި، ލީބިޔާއަކީ މިހާރު މަސްތުވާތަކެތި އުފައްދާ މީހުން އުތުރު އެފްރިކާގެ ގައުމުތަކަށާއި އެ ބައްރުގެ އެހެން ސަރަހައްދުތަކަށް މަސްތުވާތަކެތި ފޮނުވުމަށް ބޭނުންކުރާ މައިގަނޑު މަރުކަޒެކެވެ.
ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) ގެ ރިޕޯޓުގައި ބުނެފައިވަނީ، 2011 ވަނަ އަހަރުން ފެށިގެން ލީބިޔާގެ މަސްރަހު ގޯސްވެފައިވާތީ، އޭގެ ނާޖާއިޒު ފައިދާ މަސްތުވާތަކެތީގެ ވިޔަފާރިކުރާ ގްރޫޕްތަކުން ނަގަމުންދާ ކަމަށެވެ.
ނޭޓޯގެ އެހީތެރިކަމާއެކު ގެނައި އިންގިލާބެއްގައި ގައްޒާފީގެ ވެރިކަން ވައްޓާލި ފަހުން، ލީބިޔާ އޮތީ ދާޚިލީ ހަމަނުޖެހުންތަކާއި ބައިބައިވުންތަކުގެ ތެރޭގަ އެވެ.
