ނޭޓޯގެ މެންބަރު ގައުމެއް ކަމަށްވާ ސްޕެއިނާއެކު ކުރާ ހުރިހާ ވިޔަފާރީގެ މުއާމަލާތްތަކެއް ވަގުތުން ހުއްޓާލުމަށް އެމެރިކާގެ ރައީސް ޑޮނަލްޑް ޓްރަމްޕް އަމުރުކުރައްވައިފި އެވެ.
ޔޫރަޕިއަން ޔޫނިއަން (އީޔޫ) ގެ ގަވާއިދުތައް ބުނާ ގޮތުން ވިޔަފާރީގެ މަޝްވަރާތައް ކުރިއަށް ގެންދަންޖެހެނީ މުޅި އިއްތިހާދު އެކުވެގެން ކަމަށްވީ ނަމަވެސް، ޓްރަމްޕް މި ފިޔަވަޅު އެޅުއްވީ ދިފާއީ ހަރަދުތަކާއި އީރާނު ހަނގުރާމައާ ގުޅިގެން އުފެދިފައިވާ ނުތަނަވަސްކަން އިތުރަށް ބޮޑުވަމުންދާ ދަނޑިވަޅެއްގަ އެވެ.
އަންކާރާގައި ބޭއްވި ނޭޓޯ ސަމިޓުގެ ތެރެއިން ޓްރަމްޕް ވަނީ ސްޕެއިނަކީ "ވަރަށް ކަމުނުދާ ބައިވެރިއެއް" ކަމަށް ސިފަކުރައްވައި، އެ ގައުމާ ދެމެދު އޮތް ހިޔާލުތަފާތުވުންތައް އަލުން އާކުރައްވާފަ އެވެ.
މީގެ އިތުރުން ގްރީންލޭންޑާ ގުޅޭ ގޮތުން ކުރިން ކުރެއްވި ދައުވާތައް ވެސް އޭނާ ވަނީ ތަކުރާރު ކުރައްވާފަ އެވެ. ނަމަވެސް ފަހުން ވާހަކަ ބަދަލުކުރައްވައި، އެ ބައްދަލުވުމުގައި ލޯތްބާއި "ބޮޑު އެއްބައިވަންތަކަމެއް" އޮތް ކަމަށް ޓްރަމްޕް ވިދާޅުވި އެވެ.
ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވަނީ މި ހިޔާލުތަފާތުވުންތަކަކީ މާ ބޮޑު ކަމެއް ނޫން ކަމަށް ދޭހަވާ މޭރުމަކުން ވާހަކަދައްކަވާފަ އެވެ. އަދި ސަމިޓުގެ ތެރެއިން ޓްރަމްޕާއެކު ބޭއްވި ބައްދަލުވުމަކީ ވަރަށް "ގާތް" ބައްދަލުވުމެއް ކަމަށް އޭނާ ވިދާޅުވި އެވެ.
ނޭޓޯގެ އާ އުސޫލުގެ ދަށުން، ގައުމީ އުފެއްދުންތެރިކަމުގެ (ޖީޑީޕީ) ފަސް އިންސައްތަ ދިފާއީ ހަރަދަށް ކަނޑައެޅުމަށް ސްޕެއިނުން ދެކޮޅު ހެދުމާ ގުޅިގެން، އެ ގައުމާއެކު ކުރާ ވިޔަފާރި ހުއްޓާލުމަށް ޓްރަމްޕް، ޓްރެޝަރީ ސެކްރެޓަރީ ސްކޮޓް ބެސެންޓަށް އިރުޝާދު ދެއްވި މިއީ ދެވަނަ ފަހަރެވެ.
މީގެ ކުރިން މިދިޔަ މާޗު މަހު ވެސް ޓްރަމްޕް މިފަދަ ވައުދެއް ވެވަަޑައިގެންނެވި ނަމަވެސް، އޭގެ ފަހުން ދެ ގައުމުގެ ދެމެދުގައި ވިޔަފާރީގެ މުއާމަލާތްތައް ކުރިއަށްދިޔައީ އާންމު ހާލަތުގަ އެވެ.
"ސްޕެއިނުން އެއްވެސް ކަމަކަށް އެއްބަހެއް ނުވޭ، އެމީހުން ގޮވައިގެން އުޅުމުގެ ބޭނުމެއް ނެތް،" ނޭޓޯގެ ސެކްރެޓަރީ ޖެނެރަލް މާކް ރޫޓާ ގާތު ޓްރަމްޕް ވިދާޅުވި އެވެ.
މި ނުތަނަވަސްކަން ކުޑަކުރުމަށް މަސައްކަތް ކުރައްވަމުން ރޫޓާ ވިދާޅުވީ، ސްޕެއިނުން މިދިޔަ އަހަރު ދިފާއީ ހަރަދު ދެ ޕަސެންޓަށް އިތުރުކޮށް "ބޮޑު ކުރިއެރުމެއް" ހޯދާފައިވާ ކަމަށެވެ. ނަމަވެސް އަދިވެސް ހައްލުކުރަންޖެހޭ މައްސަލަތައް އެބަހުރި ކަމަށް އޭނާ ފާހަގަކުރެއްވި އެވެ.
