އިނގިރޭސިވިލާތުގެ އެއާ ޓްރެފިކް ކޮންޓްރޯލްގެ ޚިދުމަތްދޭ ނޭޝަނަލް އެއާ ޓްރެފިކް ސާވިސަސް (ނެޓްސް) އަށް ދިމާވި މައްސަލައަކާ ގުޅިގެން، އެ ގައުމުގެ ބޮޑެތި އެއާޕޯޓްތަކުން ފުރަން ހަމަޖެހިފައިވާ އެތައް ސަތޭކަ ފްލައިޓަކަށް އަންގާރަ ދުވަހު ބުރޫއަރައިފި އެވެ.
މި މައްސަލައިގެ ސަބަބުން ހީތުރޯ، ގަޓްވިކް، މެންޗެސްޓާ އަދި ސްޓެންސްޓެޑް ފަދަ ބޮޑެތި އެއާޕޯޓްތަކުން ގިނަ ފްލައިޓްތަކެއް ކެންސަލްކޮށް، ބައެއް ފްލައިޓްތައް ވަނީ ވަރަށް ބޮޑަށް ލަސްވެފަ އެވެ.
ނެޓްސް އިން ނެރުނު ބަޔާނެއްގައި ބުނީ، ދިމާވި މައްސަލައަކީ ފްލައިޓްތަކުގެ މައުލޫމާތު ޕްރޮސެސްކުރާ ސިސްޓަމަށް ދިމާވި މައްސަލައެއްކަން ދެނެގަނެވިފައިވާ ކަމަށެވެ. އަދި އިންޖިނޭރުން އެ ސަރަހައްދުގައި ހަރަކާތްތެރިވަމުންދާ ކަމަށާއި، ވީ އެންމެ އަވަހަކަށް ޚިދުމަތްތައް އާންމު ހާލަތަކަށް ގެނައުމަށް މަސައްކަތް ކުރަމުންދާ ކަމަށް ވެސް އެ ބަޔާނުގައި ބުނެފައިވެ އެވެ.
މީގެ އިތުރުން ނެޓްސް އިން ބުނީ، ފްލައިޓްތައް ފުރުމުގެ ހުއްދަ އަދިވެސް ދެމުންދާ ކަމަށާއި ވައިގެ ސަރަހައްދު ބަންދުނުކުރާ ކަމަށެވެ. ނަމަވެސް، މައްސަލަ އެއްކޮށް ހައްލުވެ، ކުރިން އޮތް ހާލަތަށް ރުޖޫއަވުމަށް ކޮންމެވެސް ވަރެއްގެ ވަގުތެއް ނަގާނެ ކަމަށް އެ ކުންފުނިން ފާހަގަކުރި އެވެ.
އިނގިރޭސިވިލާތުގެ އެންމެ ބޮޑު އެއާޕޯޓް ކަމަށްވާ ހީތުރޯ އެއާޕޯޓުން ބުނީ، ދިމާވެފައިވާ މި މައްސަލަ ހައްލުކުރުމަށް ނެޓްސްއާ ގުޅިގެން މަސައްކަތް ކުރަމުންދާ ކަމަށެވެ.
ފްލައިޓްތައް މޮނިޓާކުރާ ވެބްސައިޓެއް ކަމަށްވާ "ފްލައިޓްރޭޑާ24" އިން ސޯޝަލް މީޑިއާގައި ބުނި ގޮތުގައި، މި ފަންނީ މައްސަލައާ ގުޅިގެން ލަންޑަންގެ ފްލައިޓް އިންފޮމޭޝަން ރީޖަންގެ އެއާޕޯޓްތަކަށް ޖައްސާ ފްލައިޓްތަކާއި ފުރާ ފްލައިޓްތައް މިހާރު ވަނީ ކޮންޓްރޯލް ކުރަން ފަށާފަ އެވެ.
ފްލައިޓްތަކުގެ މައުލޫމާތު ހާމަކުރާ "ފްލައިޓްއަވެއާ" ގެ ތަފާސްހިސާބުތަކަށް ބަލާއިރު، ހީތުރޯ އެއާޕޯޓުން މިހާތަނަށް 100 އެއްހާ ފްލައިޓް ކެންސަލްކޮށްފައިވާއިރު، 367 ފްލައިޓެއް ވަނީ ލަސްވެފަ އެވެ. އަދި ގަޓްވިކް އެއާޕޯޓުން ފުރަން އޮތް ފްލައިޓްތަކުގެ 31 އިންސައްތަ ނުވަތަ ގާތްގަނޑަކަށް 250 ފްލައިޓް ލަސްވެފައިވާ ކަމަށް އެ ތަފާސްހިސާބުތަކުން ދައްކަ އެވެ.
އެޑިންބަރާ އެއާޕޯޓުން އެކްސްގައި ކުރި ޕޯސްޓެއްގައި ބުނީ، މި މައްސަލައިގެ ސަބަބުން އެ އެއާޕޯޓުގެ އޮޕަރޭޝަންތަކަށް އަސަރުކޮށްފާނެ ކަމަށެވެ. އަދި އަޔަލޭންޑްގެ ޑަބްލިން އެއާޕޯޓުން ވެސް ވަނީ އެ ތަނަށް ޖައްސާ ފްލައިޓްތަކާއި އެ ތަނުން ފުރާ ފްލައިޓްތަކަށް ބުރޫއަރަމުންދާ ކަމަށް ބުނެފަ އެވެ.
މީގެ އިތުރުން، ލަންޑަންގެ ލޫޓަން އެއާޕޯޓާއި، ބާމިންހަމް އެއާޕޯޓުގެ އިތުރުން އެބަޑީން އަދި ގްލާސްގޯ އެއާޕޯޓުން ވެސް ވަނީ ފްލައިޓްތައް ލަސްވަމުންދާ ކަމަށާއި ބައެއް ފްލައިޓްތައް ކެންސަލްވެފައިވާ ކަމަށް ރިޕޯޓްކޮށްފަ އެވެ.
