އޭސީ އަދި ޑީސީ ކަރަންޓުން ރީޗާޖު ކުރެވޭ ހައި-ޕާފޯމަންސް އިލެކްޓްރިކް އައުޓްބޯޑް އިންޖީނު އުފައްދާ މަޝްހޫރު ކުންފުނި އެކްސްޕްލޯމާއިން، އެ ކުންފުނީގެ އުފެއްދުންތައް ރާއްޖެއަށް އެތެރެކޮށް ވިއްކުމުގެ އެކްސްކްލޫސިވް އޭޖެންޓަކަށް އިއޮންގްރިޑް ޕްރައިވެޓް ލިމިޓެޑް ހަމަޖައްސައިފި އެވެ.
މިއީ ރާއްޖޭގެ ކަނޑުދަތުރުފަތުރާއި ފަތުރުވެރިކަމުގެ ދާއިރާއަށް ތިމާވެއްޓާ ރައްޓެހި، އަޑުމަޑު އަދި ޚަރަދު ކުޑަ އިލެކްޓްރިކް އިންޖީނު ތައާރަފުކުރުމަށް އެޅުނު މުހިންމު ފިޔަވަޅެކެވެ.
އެކްސްޕްލޯމާ ކުންފުނިން އުފައްދާ 70، 150 އަދި 300 ހޯސްޕަވަރުގެ އިލެކްޓްރިކް އައުޓްބޯޑް އިންޖީނުތަކަކީ ތެލުގެ ދުން ބޭރުނުވާ، އަޑު މަޑު އަދި މަރާމާތުކުރަން ފަސޭހަ އިންޖީނުތަކެކެވެ. މި އިންޖީނުތަކުގެ ސަބަބުން ރިސޯޓުތަކުގެ ޓްރާންސްފާތަކާއި، މޫދު ކުޅިވަރުތަކުގެ އިތުރުން އާންމު ދަތުރުފަތުރުގެ ޚިދުމަތްތަކަށް ބޮޑު ތަފާތެއް އަންނާނެ ކަމަށް އެ ކުންފުނިން ބުނެ އެވެ.
އެކްސްޕްލޯމާގެ ސޭލްސް ޑައިރެކްޓަރު އަދި ބޯޑު މެންބަރު ޖޯނަތަން ވަންގް ވިދާޅުވީ، ރާއްޖެއަކީ ކަނޑާއި ފަތުރުވެރިކަން ވަރަށް ބޮޑަށް ގުޅިފައިވާ ގައުމެއް ކަމަށާއި، މި ބަދަލާއެކު ރާއްޖޭގެ ކަނޑުދަތުރުފަތުރަށް އިންގިލާބީ ކުރިއެރުމެއް ލިބިގެންދާނެ ކަމަށެވެ.
އިއޮންގްރިޑްގެ ޑައިރެކްޓަރު މުހައްމަދު ޝާފީ ވިދާޅުވީ، ރާއްޖޭގެ ކަނޑުދަތުރުފަތުރުގެ މުސްތަގުބަލުގައި އިލެކްޓްރިކް އިންޖީނުގެ ދައުރު ބޮޑު ކަމަށާއި، އެކްސްޕްލޯމާއާއެކު ވެވުނު މިއެގްރީމެންޓުގެ ދަށުން އިތުބާރު ހުރި، ތިމާވެއްޓާ ރައްޓެހި އުފެއްދުންތައް ދިވެހި މާކެޓަށް ފޯރުކޮށްދިނުމަށް އީއޯންގްރިޑުން މަސައްކަތް ކުރާނެ ކަމަށެވެ.
އޭގެ ދަށުން، ިއޮންގްރިޑުން ރާއްޖޭގައި ޝޯރޫމްތައް ހުޅުވައި، ޓެސްޓު ދަތުރުތައް ކުރިއަށްގެންދިއުމަށް ވަނީ ރާވާފަ އެވެ. އަދި އިންޖީނުގެ އިތުރުން މެރިން ބެޓެރި، ޗާޖިން ސޮލިއުޝަންސް އަދި އާފްޓާ-ސޭލްސް ޓެކްނިކަލް ޚިދުމަތްތައްވެސް އެ ކުންފުނިން ފޯރުކޮށްދޭނެ އެވެ.
2021 ވަނަ އަހަރު އުފެދުނު އެކްސްޕްލޯމާއަކީ އިލެކްޓްރިކް އުޅަނދުތަކާއި މެރިން އަދި އޭވިއޭޝަން ދާއިރާގެ މާހިރުން ގުޅިގެން އުފައްދާފައިވާ ކުންފުންޏެކެވެ. އީއޯންގްރިޑް ޕްރައިވެޓް ލިމިޓެޑަކީ ރާއްޖެއަށް ތިމާވެއްޓާ ރައްޓެހި، އިޔާދަކުރަނިވި ހަކަތައިގެ ހައްލުތައް ތައާރަފުކުރުމަށް އުފައްދާފައިވާ ދިވެހި ކުންފުންޏެކެވެ.
