ރިސޯޓުތަކާއި ބޮޑެތި ހޮޓާތަކަށް ބޭރު ފައިސާއިން ލިބޭ އާމްދަނީގެ 40 ޕަސެންޓު މާރުކުރަން ޖެހޭ ގޮތަށް ގާނޫނު ބަދަލުކުރީ، ޓޫރިޒަމް ދާއިރާއާ މަޝްވަރާކޮށްފައި ކަމަށް ސަރުކާރުން އިއްޔެ ބުނެފި އެވެ.
ސަރުކާރުގެ އިސް ތަރުޖަމާނު، މުހައްމަދު ހުސެއިން ޝަރީފު (މުންދު) ނޫސްވެރިންނާ އެކީ ބޭއްވި ބައްދަލުވުމެއްގައި މިހެން ވިދާޅުވީ، މި މިންވަރަށް ފައިސާ މާރުނުކުރެވޭނެ ކަމަށް ރިސޯޓު ވިޔަފާރިތައް ތަމްސީލުކުރާ ޖަމިއްޔާ، މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީސް (މަޓީ) އިން ބުނެފައި ވަނިކޮށެވެ.
މަޓީގެ މި ކަންބޮޑުވުންތައް ހުރި ނަމަވެސް، މުންދު ވިދާޅުވީ، ޑޮލަރު މާރުކުރަން ޖެހޭ ނިސްބަތަށް ބަދަލު ގެނައި ކުރަން ޖެހޭ ދިރާސާތައް ކުރުމަށް ފަހު، މަޝްވަރާ ކުރަން ޖެހޭ ބަޔަކާ މަޝްވަރާ ކުރުމަށް ފަހު ކަމަށެވެ. އޭނާ ވިދާޅުވީ، 40 ޕަސެންޓު މާރުކުރުމާ ގުޅޭ ގޮތުން އެއް ފަހަރަށް ވުރެ ގިނަ ފަހަރު މަޓީއާ މަޝްވަރާ ވެސް ކުރި ކަމަށެވެ. އަދި، އިންޑަސްޓްރީގެ ވިޔަފާރިތަކާ ވަކިވަކިން ވެސް ސަރުކާރުން ވާހަކަ ދެއްކި ކަމަށް އޭނާ ވިދާޅުވި އެވެ.
"އަޅުގަނޑުމެން އަޅަން ޖެހޭ ފިޔަވަޅުތަކެއް އަޅަން އެބަ ޖެހެއޭ، ކޮންމެ ގޮތެއް ވިޔަސް ވަރަށް ބޮޑަށް ޑޮލަރައިޒްޑްއޭ މިހާރު އިކޮނޮމީ. އަޅުގަނޑުމެންނަށް ކުރިއަށްދާއިރު ސަސްޓެއިނަބަލްކޮށް މި މައްސަލައިގައި ހައްލެއް ހޯދަން އަޅުގަނޑުމެން އެބަ ޖެހެއޭ ފިޔަވަޅުތަކެއް އަޅަން،" ޓޫރިޒަމް އިންޑަސްޓްރީއާ ކުރި މަޝްވަރާތަކުގެ ތަފުސީލުތައް ހިއްސާކުރައްވަމުން މުންދު ވިދާޅުވި އެވެ.
ޑޮލަރުތައް މާރުކުރުމުގެ މައްސަލައިގައި، މުންދު ވިދާޅުވީ، ސަރުކާރުން ބޭނުންވީ ޓޫރިޒަމް އިންޑަސްޓްރީއާ މަޝްވަރާކޮށްގެން، އެ މީހުން ހުށަހަޅާ ކަންކަން ވެސް ހިމަނައިގެން ކުރިއަށް ދާން ކަމަށެވެ. އަދި، މިކަމަށް ޓަކައި ސަރުކާރުން އެދުނީ ސައްހަ މައުލޫމާތު ފޯރުކޮށްދީ، އެއްބާރުލުން ދޭން ކަމަށް އޭނާ ވިދާޅުވި އެވެ.
އާމްދަނީގެ 40 ޕަސަންޓު މާރުކުރުމަކީ ކުރެވޭނެ ކަމެއް ނޫން: މަޓީ
ރިސޯޓުތަކަށް ލިބޭ އާމްދަނީގެ 40 އިންސައްތަ މާރުކުރަން މަޖުބޫރުކުރުމަކީ ވިޔަފާރިތަކަށް ބޮޑެތި ގެއްލުންތަކެއް ވާނެ، ދެމެހެއްޓެނިވި ކަމެއް ނޫން ކަމަށް މަޓީން ބުނޭ. އެ އެސޯސިއޭޝަނުން ބުނީ ވަކިވަކި އޮޕަރޭޓަރުންނަށް ކުރެވޭ ތުހުމަތުތަކެއްގެ ސަބަބުން މުޅި ސިނާއަތަށް ބުރަވާނެ ފަދަ ސިޔާސަތުތަކެއް ކަނޑައެޅުމަކީ އިންސާފެއް ނޫން ކަމަށް.
މިހެން ނަމަވެސް، މަޝްވަރާގައި ދައްކާ ވާހަކައާ އަމަލާ ދިމާނުވާ ކަމަށް މުންދު ވިދާޅުވި އެވެ. އޭނާގެ މި ނުކުތާއަށް ބާރު ދެއްވަން ބޭނުންކުރެއްވީ، އަށް ވަރަކަށް ވިޔަފާރިން ކަޅު ބާޒާރަށް މާރުކުރި ފައިސާ އެވެ.
"ހާއްސަކޮށް އަޅުގަނޑުމެންނަށް ފާހަގަވީ، ތިން ހަތަރު މަހެއްގެ ތެރޭގައި ހަމަ ބްލެކް މާކެޓަށް [] އެބަ އޮތް ޑައިރެކްޓްލީ މި ދެންނެވީ ސެވަން ޓު އެއިޓް ބިޒްނަސަސްއުން ގާތްގަނޑަކަށް 79 މިލިއަން ޑޮލާސް ބޭރުކޮށްފަ،" މުންދު ވިދާޅުވި އެވެ.
ޑޮލަރު މާރުކުރަން ޖެހޭ މިންވަރު ބޮޑުކުރުމާ ގުޅިގެން ނުތަނަވަސްކަން ބޮޑުވެފައިވާއިރު، މިކަމާ ދެކޮޅު ޓޫރިޒަމް ވިޔަފާރިތަކުން ބުނަނީ ސަރުކާރަށް ދައްކަން ޖެހޭ ޓެކްސްތަކާއި، ކުލިތަކާއި، ފީތަކުގެ އިތުރުން ގަންނަ މުދަލާއި ހޯދާ ހިދުމަތްތަކާއި ނަގާފައިވާ ލޯނުތަކާއި މުވައްޒަފުންގެ މުސާރަތައް ދެނީ ޑޮލަރުން ކަމުން މިކަން ނުވާނެ ކަމަށެވެ. ނަމަވެސް ސަރުކާރުން ބުނަނީ މިހާރު ހުށަހަޅާފައިވާ މިންވަރަށް މާރުކޮށްގެން އޮޕަރޭޝަނަލް ނުވަތަ ހިންގުމުގެ ހަރަދުތައް ކުރަން އެއްވެސް ދައްޗެއް ކުރިމަތި ނުވާނެ ކަަމަށެވެ.
މި މައްސަލައިގައި ސަރުކާރުން ޓޫރިޒަމް ވިޔަފާރިތަކަށް ގޮންޖެހި ނަމަވެސް، ބޭރު ފައިސާގެ ގާނޫނަށް ގެނައި ބަދަލުތައް ތަސްދީގުކުރެއްވި ދުވަހު ރައީސް މުހައްމަދު މުއިއްޒު ވަނީ މަޝްވަރާކުރަން ފުރުސަތު އޮތް ކަމަށް ވިދާޅުވެފަ އެވެ.
ބޭރު ފައިސާއާ ބެހޭ ގާނޫނަށް މިހާރު އަމަލުކުރަން ފަށާފައިވާއިރު، މި މަހުގެ ތެރޭގައި ރިސޯޓުތަކާއި އެ ގާނޫނުގެ ކެޓެގަރީ "އޭ" ގައި ހިމެނޭ އެހެން ވިޔަފާރިތަކަށް ލިބޭ ބޭރު ފައިސާގެ އާމްދަނީގެ 40 ޕަސެންޓު އަންނަ މަހުގެ ތެރޭގައި ރާއްޖޭގެ ބޭންކަކަށް މާރުކުރަން ޖެހޭނެ އެވެ.
