ޔާމީނަށް ހުތުރުކޮށް ބެވިއިރު އިއްޔެގެ ބަސްމަގު ހަނދާނެއް ނެތް

މިހާރު ވެރިކަމުގައި އޮތް ޕީޕަލްސްް ނެޝަނަލް ކޮންގްރެސް (ޕީއެންސީ) އަކީ ދިވެހިރައްޔިތުންގެ ޕާޓީ (ޑީއާރުޕީ) ފިކުރުގެ ޕާޓީ އެކެވެ. ޑީއާރުޕީ ދެކަފިވެ އުފެދުނު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ކުރީގެ ރައީސް އަބްދުالله ޔާމީންގެ އަތުން ބީވެދާނެ ކަމަށް ބެލެވި، ބެކަޕް ޕާޓީއެއްގެ ގޮތުގައި އުފެއްދީ ޕީއެންސީ އެވެ.

ކޮންމެ ފަސް އަހަރަކުން ކުލަ އާއި ނަމާއި ލޯގޯ ބަދަލުކޮށްގެން ރާއްޖޭގެ ސިޔާސީ މަޝްރަހަށް ޑީއާރުޕީ ފިކުރުގެ ސިޔާސީން ނުކުތް ނަމަވެސް މި ހުރިހާ ޕާޓީއެއްގައި ވެސް ހަރަކާތްތެރިވަމުން އަންނަނީ އެއް ބައެކެވެ. ލީޑަރުން ބަދަލުވެ އެވެ. ފުރަތަމަ ރައީސް މައުމޫން އަބްދުލްގައްޔޫމް އެވެ. ދެން ޔާމީން އެވެ. މިހާރު ރައީސް މުހައްމަދު މުއިއްޒު އެވެ.

ޑީއާރުޕީ ފިކުރުގެ ސިޔާސީންނަކީ ވައިޖެހޭ ކޮޅަކަށް އޮޑި ދުއްވުމުގައި ފަރިތަ ބައެކެވެ. އެ ފިކުރުން ރާއްޖޭގެ ވެރިކަން ކުރާއިރު އަބަދުވެސް ތިބެނީ ސަރުކާރުގެ ދިފާއުގައި މޭ އައްޑަނައަކަށް ދިއްކޮށްގެންނެވެ. ލީޑަރަށް މަރުދެ އެވެ. ނަމަވެސް، ސިޔާސީ ބާރުވެރިކަން ލީޑަރުގެ ކިބައިން ނެތޭ ހިސާބުން އެ ވަރުގެ ގޯސް މީހަކު ނުހުރެ އެވެ. އޭނާ ކުރި ވެރިކަން ވެސް ގޯސްވެ އެވެ.

ރޭ ބޭއްވި ޕީއެންސީ ހަރުގެ ޖަލްސާގައި އެ ފެނުނީ އެފަދަ މަންޒަރެކެވެ. ތިރީގައި މި ލިސްޓުކޮށްލަނީ ރޭ ވާހަކަ ދެއްކެވި ބައެއް ބޭފުޅުން ޔާމީންއާ މެދު ދައްކާފައި ހުރި ބައެއް ވާހަކަތަކެވެ. އެ ވާހަކަތަކެއް ރެއަކު ހަނދާނެއް ނެތެވެ. 

"ރައީސް ޔާމީން އިގްތިސޯދީ ނަމޫނާއަކަށް މި ސަރަހައްދުގެ ގައުމުތަކުން ވެސް އެ ބައްލަވަނީ." 

"އަޅުގަނޑު ގެންގޮސް އުމުރަށް ޖަލުގައި ބާއްވާފައި ރައީސް ޔާމީން ގެއަށް ގެނެސްދޭށޭ."

'ޔާމީން ވަޑައިގަތީ މި ރާއްޖޭގައި ބެެންޗުމާކެއް ކަނޑައަޅުއްވާފައި."

"ނަސީބެއް ނޫންތޯ ރައީސް ޔާމީން މި ގައުމަށް އުފަންވިކަން."

"ޔާމީން މި ގައުމުގެ ވެރިކަން ކާމިޔާބު ކުރައްވާނީ އެއްބުރުން."

"ރައީސް ޔާމީނަކީ ރަންގަނޑެއް."

މިއީ މުއިއްޒު ވެރިކަމާ ހަވާލުވުމާ ހަމައަށް މިހާރު މަޖިލިސް ރައީސް އަބްދުއްރަހީމް އާއި ޕީއެންސީގެ ޕީޖީ ލީޑަރު އިބްރާހިމް ފަލާހު އާއި ޕީއެންސީގެ އެހެން ލީޑަރުންގެ ބަސްމަގު ހުރި ގޮތެވެ. ޔާމީންގެ ސަރުކާރަށް އަމާޒުވި ހުރިހާ ތުހުމަތެއް ދޮގުކޮށް އެ ސަރުކާރު ދިފާއުކުރުމުގައި އެންމެ އިސްކޮށް ކުރިން ތިއްބެވީ އެ ބޭފުޅުންނެވެ. 

ނަމަވެސް، ރޭ ބޭއްވި ޖަލްސާގައި ޕީއެންސީގެ ލީޑާޝިޕްގެ ނެރޭޓިވް ހުރީ ޔާމީނަށް ފާޑު ވިދާޅުވުމަށެވެ. މިގޮތުން އެމަނިކުފާނުގެ ވެރިކަމަކީ މިހާތަނަށް އެންމެ ކޮރަޕްޓު ވެރިކަން ކަމާއި، އެ ވެރިކަމުގައި ނާއިންސާފުން ކަންކަން ކުރި ވާހަކަވެސް އެބޭފުޅުން ދެއްކެވި އެވެ. އެކަމަކު އެމަނިކުފާނުގެ ވެރިކަމުގައި އެބޭފުޅުން އޭރު ދިފާއުކުރެއްވި އެވެ. 

ކުއްލިއަކަށް ރޭ  ޔާމީނުގެ ވެރިކަން ގޯސްކުރައްވާ ރައީސް މުހައްމަދު މުއިއްޒުގެ ވެރިކަން ދިފާއުކުރައްވާ  އެބޭފުޅުން ވާހަކަ މިދައްކަވަނީ މިވަގުތު ވެރިކަމުގައި މުއިއްޒު ހުންނެވުމުން ކަމަށް ވެދާނެ އެވެ. މުއިއްޒުގެ ވެރިކަން ނިމުމާއެކު އެބޭފުޅުންގެ ރާގު އަނެއްކާވެސް ބަދަލުވެދާނެ ކަމަށް ބެލެވެ އެވެ. 

މިހާރު އެންމެ ކޮރަޕްޓު މީހަކީ ޔާމީން

ޔާމީނުގެ ވެރިކަމަށް އިޝާރާތްކުރައްވާ އެ މަނިކުފާނުގެ ވެރިކަމަކީ ކޮރަޕްޓް ވެރިކަމެއް ކަމަށް ރޭގެ ޖަލްސާގައި އެންމެ ފުރަތަމަ ސިފަކުރެއްވީ ވިލިމާލޭ ދާއިރާގެ ޕީއެންސީ މެންބަރު މުހައްމަދު އިސްމާއިލް އެވެ. އޭނާ ވިދާޅުވީ ޔާމީނުގެ ވެރިކަމުގައި ޕީޕީއެމްއަށް ލިބުނު ފައިސާ ހަރަދު ކުރެއްވީ އެމަނިކުފާނުގެ އަމިއްލަ ބޭނުމަށް ކަމަށެވެ. 

"އޭރުގައި ޕީޕީއެމް އޮތްއިރުގައި ޕީޕީއެމަށް ދައުލަތުން ދިން ފައިސާގައި ކުރި ކަންތައް އަޅުގަނޑުމެންގެ ހަނދާނުގައި އެބަހުރި. އެމަނިކުފާނު ޖަލުން ނެރުމަށްޓަކައި ލޯޔަރު ޓީމަށް ފީ ދެއްކުމާއި ގޭގެ ކަރަންޓު ބިލު ދެއްކުމާއި، ދަރިންގެ ސްކޫލް ފީ ދެއްކުމާއި، މިކަންކަން ޕާޓީއަށް ލިބޭ ލާރިން ކުރަމުންދިޔައީ،" މުހައްމަދު އިސްމާއިލް ވިދާޅުވި އެވެ.

މީގެއިތުރުން ޖަލްސާގައި ފަލާހު ވިދާޅުވީ ޔާމީނުގެ ވެރިކަމަކީ މިހާތަނަށް ރާއްޖޭގައި އުފެދުނު އެންމެ ގިނަ ކޮރަޕްޝަނުގެ އަމަލު ހިންގި ސަރުކާރު ކަމަށްވާއިރު، އެ ހުރިހާ ކަމެއްގެ މޭސްތިރިއަކީވެސް ޔާމީނު ކަމަށެވެ. 

ފަލާހު ވިދާޅުވީ ޔާމިީނުގެ ގެއަށް ވައްދާ ފޮށިތަކުގައި ހުންނަ ފައިސާއަކީ ހަލާލު ފައިސާ ނޫން ކަމަށް އަމިއްލަފުޅަށް އެއްބަސްވެވަޑައިގަތުމަށްފަހު، އެގޮތަށް ވިދާޅުނުވާ ކަމަށް ފަހުން ނޫސްވެރިންގެ ބައްދަލުވުމެއްގައި ވިދާޅުވި ކަމަށެވެ. އެހެންކަމުން ޔާމީނަކީ ކާކުކަން ދިވެހިންނަށް އެނގޭނެ ކަމަށް އޭނާ ވިދާޅުވި އެވެ. 

"ރައީސް ޔާމީނުގެ ވެރިކަމަކީ ދިވެހިރާއްޖޭގެ ތާރީހުގައި މިތާގައި މުހައްމަދު އިސްމާއިލް ފާހަނގަކުރި ގޮތަށް އެންމެ ގިނަ ކޮރަޕްޝަނުގެ އަމަލުތައް ހިންގި ސަރުކާރު. އެ ހުރިހާ ކޮރަޕްޝަންގެ އަމަލެއްގެ މޭސްތިރިއަކީ ރައީސް ޔާމީން. ޝައްކެއް އޮތް ކަމެއް ނޫން. އަމިއްލަފުޅަށް އިއުތިރާފުވެވަޑައިގެންނެވީ ތިމަންނަ ގެއަށް ކޮންމެ ރެއަކު މިވައްދާ ލާރި ފޮށިފޮށި މިއީ ހަލާލު ފައިސާއެއް ނޫނޭ،" ފަލާހު ވިދާޅުވި އެވެ. 

"ޖެހިގެން އައި ދުވަހު ނޫސްވެރިޔަކު ސުވާލުކުރީމަ ވިދާޅުވީ  ނޫން ނޯންނާނެއޭ ތި ވާހަކަ ދަންނަވާފައެއް. އެހެންވީމަ ރައީސް ޔާމީނަކީ ކާކުކަން ދިވެހިރައްޔިތުންނަށް ވަރަށް ރަނގަޅަށް އެނގިވަޑައިގަންނަވާނެ."

ސިހުރު ހަދާކަމުގެ ތުހުމަތު

ޔާމީނަކީ ސިހުރުހާހޫރަ ހެއްދެވުމަށް ލޯބިކުރާ ބޭފުޅެއް ކަމަށް ސިފަކުރައްވާ ފަލާހު ވިދާޅުވީ އެ ކަންކަން ކުރެއްވީ 2018 ވަނަ އަހަރުގެ ތެރޭގައި ކަމަށެވެ. ސިހުރުގެ ކަންކަން ކުރައްވަން ޔާމީނު ގެންގުޅުއްވި މީހާ ދަންވަރު ގަޑިތަކުގައި އޮރިޔާމާ ރާޅުގަނޑު ސަރަހައްދަށްވެސް ނެރުނު ކަމަށް ފަލާހު ވިދާޅުވި އެވެ. 

މީގެ އިތުރުން ފަލާހު ވިދާޅުވީ 2018 ވަނަ އަހަރުގެ ރިޔާސީ އިންތިހާބުގެ ދުވަސްވަރު އަތޮޅުތެރޭގައި ރަތްކުލައިގެ ހާލެއްވެސް ނުލިބޭނެ ކަމަށާއި ހުރިހާ ހާލެއް ހުރީ ޔާމީނުގެ ބެލުމުގެ ދަށުގައި ކަމަށެވެ. 

"އެއްދުވަހު ފަންޑިތައާ ބެހޭ ވަރަށް ވަރުގަދަ ހުތުބާއެއް އައިސްފި ސިހުރުހާހޫރައާ ބެހޭ. އައިމަ އެބޭފުޅާ ބުނީ ތިމަންނަ ގޮސް ދަންނަވައިފީމޭ އަޅުގަނޑަށް ދެން ނުކުރޭނެއޭ މިކަން ކުރާކަށް. މިއަދު މިއައީ އާދައިގެ ހުތުބާއެއް ނޫނޭ. ބުނީމަ ބުނެފިއޯ އެބޭފުޅެއްގެ ނަން ކިޔާފައި އޭ ބަލަ ކޮން ވާހަކައެއްހޭ މިހާރު ތި ދައްކަނީ. އަދި ތިބުނާ ސުވާލުތަކެއް އަންނާނީ މާ ފަހުން ނުންހޭ. މިއީ އަދި މި ދުނިޔެ ނުންހޭ. ތިބުނާ ދުނިޔެ އަންނާނީ ފަހުން ނުންހޭ. ކުރިއަށް ގެންދޭން،" ފަލާހު ވިދާޅުވި އެވެ. 

"މިބުނާ ބޭފުޅާ ކޮންމެ ރެޔަކު އޭރު ބްރިޖު ކައިރީ މިއޮންނަ ރާޅުގަނޑު، ކޮންމެ ރެއަކު ދަންވަރު މިހުންނަނީ ރާޅުގަނޑު ތެރެއަށް އޮރިޔާމުން އެރުވާފައި. މިއީ ސީރިއަސް ހަގީގީ ވާހަކައެއް އެނގޭތޯ. އެހިސާބުން އޭނަ ރައްކާވެއްޖެ. ނޫން ތިބޭފުޅުންނަށް އެނގޭނެ އެދުވަސްވަރު 2018 ގައި ނުއުޅޭނެ ރަތް ހާލެއް އާންމުކޮށް ރާއްޖެތެރެއަކު ނުހުންނާނެ. ހުރިހާ ރަތް ހާލެއް ހުންނާނީ ޔާމީނުގެ ބެލުމުގެ ދަށުގައި."

ވެރިކަމާމެދު ބަސްމަގު ބަދަލުވެއްޖެ

ޔާމީނުގެ ވެރިކަން ނިމުނު ގޮތަށް އިޝާރާތްކުރައްވާ މަޖިލީހުގެ ރައީސް އަބްދުއްރަހީމް ވިދާޅުވީ އެމަނިކުފާނުގެ ވެރިކަން ނިމުނީ ބަސް ނޭހުމުންނާއި އަނިޔާވެރިވުމުގެ އިތުރުން ދިވެހި ރައްޔިތުންގެ ބައިތުލްމާލު ދިރުވާލުމުން ކަމަށެވެ. 

"ވެރިކަން ނިމުނީ ބޮޑާކަމުން. ވެރިކަން ނިމުނީ ކިބުރުވެރިކަމުން. ވެރިކަން ނިމުނީ ނުލަފާކަމުން. ވެރިކަން ނިމުނީ ބަސް ނޭހީމަ. ވެރިކަން ނިމުނީ އަދުލުއިންސާފު ގާއިމުނުކުރީމަ. ވެރިކަން ނިމުނީ އަނިޔާވެރިވީމަ. ވެރިކަން ނިމުނީ ހިޔާނާތްތެރިވީމަ. ވެރިކަން ނިމުނީ ދިވެހި ރައްޔިތުންގެ ބައިތުލްމާލު ދިރުވާލީމަ. ވެރިކަން ނިމުނީ އަނބިމީހާގެ ދަށުވީމަ،" އަބްދުއްރަހީމް ވިދާޅުވި އެވެ. 

---

މި ބޭފުޅުންގެ ބަސްމަގު މި ބަދަލުވީ އެންމެ ސަބަބަކާ ހުރެ އެވެ. އެއީ ސިޔާސީ ވަފާތެރިކަމާ ގުޅިފައި އޮތް ކަމެކެވެ. އެންމެ ފުރަތަމަ އެ ވަފާތެރިކަން އޮތީ މައުމޫންއަށެވެ. ދެން އޮތީ ޔާމީނަށެވެ. މިހާރު އެއީ މުއިއްޒު އެވެ. ހައްތަހާވެސް އެކަން ގުޅިފައި އޮތީ ސިޔާސީ ބާރުވެރިކަމާ އެވެ. ސިޔާސީގޮތުން އެއްވެސް ކަހަލަ ލޯޔަލްޓީއެއް މިބޭފުޅުންގެ ނެތެވެ.