އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީގައި ވާދަކުރައްވާނެކަން އިއުލާނުކުރައްވާފައިވާ އެ ޕާޓީގެ ކުރީގެ ރައީސް، އަބްދުﷲ ޝާހިދުގެ ކެމްޕޭނުގައި ކުރީގެ ޓޫރިޒަމް މިނިސްޓަރު، އަލީ ވަހީދު ބައިވެރިވެވަޑައިގަންނަވާތީ އެކަމަށް ފާޑުކިޔުން އަމާޒުވެއްޖެ އެވެ.
ޝާހިދުގެ ކެމްޕޭނުގައި އަލީ ވަހީދު ބައިވެރިވާކަމުގެ އަޑުތައް މީގެކުރިން ވެސް ކޮންމެވެސް ވަރަކަށް ތިލަވި އެވެ. ނަމަވެސް، ރޭ ކުޅުދުއްފުށީގައި ބޭއްވި ޖަލްސާގައި އަލީ ވަހީދު ވަނީ ރަސްމީކޮށް ކެމްޕޭނަށް ނިކުމެވަޑައިގެން ވާހަކަ ވެސް ދައްކަވައިފަ އެވެ.
ފާޑުކިޔުން އަމާޒުވީ، ފަތުރުވެރިކަމާ ބެހޭ މިނިސްޓަރުގެ މަގާމުގައި އަލީ ވަހީދު ހުންނެވިއިރު ސަރުކާރުގެ ވަޒީފާގައި ތިބި ބަޔަކަށް ޖިންސީ ގޯނާ ކުރިކަމުގެ ތުހުމަތު މީގެ ކުރިން އަމާޒުވެފައި އޮތުމުންނެވެ. އެ މައްސަލައިގައި ފާޑުކީ ބައެއް މީހުން ބުނެފައި ވަނީ އަލީ ވަހީދު ކައިރިކޮށްގެން ޝާހިދުއަށް ލިބޭ ވޯޓަށްވުރެ ގެއްލޭ ވޯޓު އިތުރުވާނެ ކަމަށެވެ.
"އަލީ ވަހީދުގެ ސަބަބުން ޝާހިދުއަށް ވަރަށް ބޮޑަށް ގެއްލުން ކުރާނެ، މީނާ ދުރުކޮށްލަންޖެހޭ،" އެކްސްގައި މީހަކު ކުރި ޕޯސްޓެއްގައި ލިޔެފައިވެ އެވެ.
އެކަމަށް ފާޑުކިޔައި ސޯޝަލްމީޑިއާގައި ޕޯސްޓުކުރި އެހެން މީހަކު ބުނެފައި ވަނީ އަލީ ވަހީދު އެންމެ ކުރީބަރީގައި ބައިންދައިގެން އަންހެނުންގެ ބާރުވެރިކުރުވާ ވާހަކަދެއްކުމަކީ ވެސް ލަދެއް ކަމަށެވެ.
އެކަމާ ގުޅޭގޮތުން އަލީ ވަހީދު އަދަދު އަށް ވިދާޅުވީ އޭނާއަށް ގިނައިން ފާޑުކިޔަނީ "ފެށުނީއްސުރެ" ޒާތީގޮތުން އޭނާއަށް ޓާގެޓުކުރާ "ވަގު އެކައުންޓަކުން" ކަމަށާއި އެމްޑީޕީ ތެރެއިން ވެސް އޭނާއަށް ފާޑުކިޔަނީ އޭނާއަށް ތާއީދުނުކުރާ މީހުން ކަމަށެވެ. ނަމަވެސް، އޭނާއަށް ފާޑުކިޔާ މީހުން، އެ މައްސަލައިގެ ފަސްފަހަތް ބެލުން ރަނގަޅުވާނެ ކަމަށް އޭނާ ވިދާޅުވި އެވެ. އަލީ ވަހީދު ވިދާޅުވީ އޭނާގެ މައްޗަށް ކުރި ތުހުމަތުތަކަކީ ސިޔާސީ ގޮތުން ކުރި ތުހުމަތުތަކެއް ކަމަށެވެ.
"އަޅުގަނޑު އޭގައި ޑޭ ވަންގައި ވެސް ދެންނެވިން އެއީ އަޅުގަނޑާ ދެކޮޅަށް ސިޔާސީ ގޮތުން ހިންގި ޖަރީމާއެކޭ، ހަމަ މިއަދު ވެސް ދަންނަވަން އޮތީ އެހެން،" އަލީ ވަހީދު ވިދާޅުވި އެވެ.
އޭގެ އިތުރުން، އެ ބާވަތުގެ ތުހުމަތުތަކެއް ކޮށްފިނަމަ، އެކަމުގެ މައްޗަށް ފުލުހުން ހިންގާ ތަހުގީގަށް އެ ތުހުމަތުކުރާ ފަރާތްތަކުން އެއްބާރުލުން ވެސް ދޭންޖެހޭ ކަމަށް އޭނާ އަލީ ވަހީދު ވިދާޅުވި އެވެ. ނަމަވެސް، އޭނާގެ ތުހުމަތު ކުރި އެއްވެސް މީހަކު މެޑިކަލް ލީގަލް ރިޕޯޓާއި ސައިކޯ ސޯޝަލް ރިޕޯޓެއް ހެދުމަށް ފުލުހުންނަށް އެއްބާރުލުން ދީފައިނުވާ ކަމަށް އޭނާ ވިދާޅުވި އެވެ.
"މިއިން އެއްވެސް ކަމަކަށް ވެސް އަޅުގަނޑަށް ތުހުމަތުކުރި އެއްވެސް މީހަކު ގޮސްފައެއް ނުވޭ، ފުލުހުންގެ ތަހުގީގު ރަނގަޅަށް ބައްލަވައިލެއްވީމާ އެނގޭނެ،" އަލީ ވަހީދު ވިދާޅުވި އެވެ.
އަލީ ވަހީދު ވިދާޅުވީ އޭނާއަށް ޖަވާބުދާރީ ނުވެވޭވަރުގެ އެއްވެސް ކަމެއް އޭނާ ކުރައްވާފައި ނުވާނެ ކަމަށެވެ. ނަމަވެސް، ސިޔާސީ މައިދާނުގައި އުޅޭއިރު، ތަފާތު އެކި ތުހުމަތުތައް ކޮންމެ މީހަކަށް ވެސް އަމާޒުވާނެ ކަމަށް އޭނާ ވިދާޅުވި އެވެ.
"އަޅުގަނޑު ސިޔާސީ ކަންކަމުގައި ވެސް އުޅޭނަން، ޕަބްލިކްގައި ވެސް އުޅޭނަން، އަޅުގަނޑު ފޮރުވަންޖެހޭ ކަމެއް އޮތްނަމަތާ ފަހަތުގައި އޮންނަންޖެހޭނީ، އަޅުގަނޑު ޖެހިލުން ވާންޖެހޭ ކަމެއް، ލަދުގަންނަންޖެހޭ ކަމެއް ކޮށްފައެއް ނޯންނާނެ، އަޅުގަނޑަކީ ވަރަށް އިހުލާސްތެރިކަމާއެކު ޓޫރިޒަމް މިނިސްޓަރުކަމުގައި ވެސް އަދި ރާއްޖެއަށް ދިމާވި ކޮވިޑުގެ ތެރޭގައި ވެސް މަސައްކަތްކުރި މީހެއް،" އަލީ ވަހީދު ވިދާޅުވި އެވެ.
މިދިޔަ ސަރުކާރުގައި އަލީ ވަހީދު ޓޫރިޒަމް މިނިސްޓަރުކަމަށް އައްޔަން ކުރީ ޖުމްހޫރީ ޕާޓީގެ ސްލޮޓެއްގަ އެވެ. އެ މަގާމުގައި ހުންނަވައި ޓޫރިޒަމް މިނިސްޓަރީގައި މަސައްކަތް ކުރި އަންހެނުންތަކަކަށް ޖިންސީ ގޯނާ ކުރިކަމުގެ ތުހުމަތު އަލީ ވަހީދުގެ މައްޗަށް ކުރެވުނީ 2021 ގަ އެވެ.
އެ މައްސަލަ ފެންމަތިވީ ޓޫރިޒަމް މިނިސްޓަރީގައި މަސައްކަތް ކުރި 13 މުވައްޒަފުން އޭރުގެ ޖެންޑާ މިނިސްޓަރާ އެކު ރައީސް އޮފީހަށް ގޮސް އަލީ ވަހީދުގެ ޖިންސީ ގޯނާގެ މައްސަލަ ރައީސްއަށް ކިޔައިދިނުމުންނެވެ. އެ ވާހަކަތައް ކިޔައިދިނުމުން އޭރުގެ ރައީސް އިބްރާހިމް މުހައްމަދު ސޯލިހު އަށް ކީރިތި ކުރެއްވުނު ކަމަށް ވެސް އޭރު މީޑިއާތަކުން ރިޕޯޓު ކުރި އެވެ.
އެ މައްސަލަ ތަހުގީގުކޮށް ޕީޖީން އަލީ ވަހީދުގެ މައްޗަށް ދައުވާ ކުރަން ވެސް އޭރު ފޮނުވި އެވެ. އެ ޝަރީއަތްތައް ކުރިއަށް ދަނިކޮށް ބޭސްފަރުވާއަށް ކަމަށް ބުނެ އަލީ ވަހީދު ގައުމުން ބޭރަށް ފުރައިގެން ވަޑައިގަތީ އެވެ.
އިނގިރޭސިވިލާތުގައި އަލީ ވަހީދާ ހުންނަވަނިކޮށް އޭނާއާ ދެކޮޅަށް ހެކީގެ ގޮތުގައި ހުށަހަޅާފައި ހުރި ބަޔާންތައް އަނިޔާ ލިބުނު ކަމަށް ބުނާ ކުދިން އަނބުރާ ނެގުމުން ޕީޖީން ވެސް އެ މައްސަލަ އަނބުރާ ގެންދިޔައީ އެވެ.
