ސަރުކާރުން ހިންގާ ތަރައްގީގެ މަޝްރޫއުތައް ވިލަރެސްކުރުމުގެ ނަމުގައި ކޮންމެ މިނިސްޓްރީއެއްގައި ހާއްސަ ޔުނިޓެއް ގާއިމުކުރަނީ ސިޔާސީ ވަޒީފާ އުފެއްދުމުގެ ބޭނުމުގައި ކަމަށް އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ރައީސް އަބްދުالله ޝާހިދު ވިދާޅުވެއްޖެ އެވެ.
އިއްޔެ ބޭއްވި ވަޒީރުންގެ މަޖިލީހުގެ ބައްދަލުވުމުގައި ވަނީ ކޮންމެ މިނިސްޓްރީއެއްގައި އެފަދަ ޔުނިޓެއް ގާއިމުކުރަން ނިންމާފަ އެވެ. އެ ނިންމުމަށް ފާޑުވިދާޅުވެ ޝާހިދު ކުރެއްވި ޓްވީޓެއްގައި ވަނީ މަޝްރޫއުަތައް ހުއްޓާލާފައިވަނީ ސީދާ ސަަރުކާރުން ކަމަށް ތުހުމަތު ކުރައްވާފަ އެވެ.
"މަޝްރޫއުތައް ބަލާނެ ފަރާތްތަކާއި އެމަ ސައްކަތް ކުރާނެ ފަރާތްތައް މިހާރުވެސް ނިޒާމުގައި އެބަތިބި. މައްސަލައަކީ ލީޑަޝިޕެއް، ސިޔާސަތެއް އަދި އަމާޒެއް ނެތުން. ކުރަން މިއުޅޭހާވެސް ކަމަކީ އިތުރު ސިޔާސީ ވަޒީފާތައް އުފެއްދުން،" ޝާހިދު ވިދާޅުވި އެވެ.
އެފަދަ ޔުނިޓެއް ގާއިމުކުރުމުން ދައްކުވައިދެނީ ސަރުކާރު ހިންގުމުގެ ނިޒާމު ފެއިލްވެއްޖެ ކަމަށް އަމިއްލައަށް އިއުތިރާފުވުމުގެ ގޮތުގައި ޝާހިދު ސިފަކުރެއްވި އެވެ.
"ރައްޔިތުން ބޭނުންވަނީ އިތުރު ޔުނިޓްތަކާއި، ޕޯޓަލްތަކާއި، ކޮމިޓީތަކާއި، ބަހަނާތަކެއް ނޫން. ރައްޔިތުން ބޭނުންވަނީ މަޝްރޫއުތައް ނިމި، ކޮންޓްރެކްޓަރުންނަށް ފައިސާ ލިބި، ވަޢުދުތައް ފުދުން،" ޝާހިދު ވިދާޅުވި އެވެ.
ސަރުކާރު ހިއްސާވާ ކުންފުނިތަކަށް ދުވަހުން ދުވަހަށް ދިމާވާ މައްސަލަތައް ދެނެގަނެ، އެ މައްސަލަތަކަށް ހައްލު ހޯދުމަށް ފިނޭންސް މިނިސްޓްްރީގައި ވެސް ވަނީ ހާއްސަ ޔުނިޓެއް އުފައްދަން ނިންމާފަ އެވެ.
