ދިވެހިރާއްޖޭގެ މަޝްހޫރު ވިޔަފާރި ކުންފުނި ސިމްޑީ ގްރޫޕާއި ދުނިޔޭގެ މަގުބޫލު ކެނަން ކުންފުންޏާ ދެމެދު އޮތް 30 އަހަރަށްވުރެ ދިގުވީ ވަރުގަދަ ވިޔަފާރީގެ ގުޅުން ފާހަގަކުރުމަށްޓަކައި ކެނަން ސިންގަޕޫރުގެ ރައީސް އަދި ސީއީއޯ މިސްޓަރ ތޮޝިޔުކީ (ޓައިގާ) އިޝީ ރާއްޖެއަށް ރަސްމީ ޒިޔާރަތެއް ކުރައްވައިފި އެވެ.
މިދިޔަ ބުދަ ދުވަހު ކުރިއަށްދިޔަ މި ޒިޔާރަތަކީ ދެ ކުންފުނީގެ ދެމެދުގައި އޮތް އިތުބާރާއި ގާތް ގުޅުން ރަމްޒުކޮށްދޭ މުހިންމު ދަތުރެކެވެ. ސިމްޑީ ގްރޫޕުން ރާއްޖޭގެ ބާޒާރަށް ކެނަންގެ އުފެއްދުންތައް އެންމެ ފުރަތަމަ ތައާރަފްކޮށްފައިވަނީ 1995 ވަނަ އަހަރުގަ އެވެ.
މި ޒިޔާރަތުގެ ތެރެއިން މިސްޓަރ އިޝީ ވަނީ ދިވެހިރާއްޖޭގެ ގައުމީ ދިފާއީ ބާރު (އެމްއެންޑީއެފް) ގެ އިސް ބޭފުޅުންނާ ބައްދަލުކުރައްވާފަ އެވެ. އެމްއެންޑީއެފް އަކީ ކެނަންގެ އުފެއްދުންތައް ރާއްޖޭގައި ގަވާއިދުން ބޭނުންކުރަމުންދާ އެންމެ މުހިންމު އެއް މުއައްސަސާއަށް ވާތީ، އެ ފަރާތުން ކެނަންގެ އުފެއްދުންތަކަށް ކުރާ އިތުބާރު ފާހަގަކޮށް މި ބައްދަލުވުމުގައި ޝަރަފުގެ ޕްލެކެއް އަރުވާފައިވެ އެވެ. މީގެ އިތުރުން، ކެނަންގެ ރާއްޖޭގެ ޝޯރޫމާއި ސިމްޑީ ޓެކް ސާވިސް ސެންޓަރަށް ޒިޔާރަތްކުރައްވައި، އެ ތަންތަނުގެ މަސައްކަތްތައް ހިނގާގޮތް މިސްޓަރ އިޝީ ވަނީ ބައްލަވާލައްވާފަ އެވެ.
ސިމްޑީގެ ހެޑް އޮފީހުގައި ބޭއްވުނު ނޫސްވެރިންގެ ބައްދަލުވުމެއްގައި، ކެނަން ކުންފުނީގެ ކުރިމަގުގެ ތަސައްވުރާއި، ކުރިއަށް އޮތް ތަނުގައި ބާޒާރަށް ނެރުމަށް ހަމަޖެހިފައިވާ އާ އީޖާދުތަކާ ބެހޭ ގޮތުން މައުލޫމާތު ހިއްސާކުރެވުނެވެ. މި ބައްދަލުވުމުގައި ސިމްޑީގެ މެނޭޖިންގ ޑިރެކްޓަރ މިޝްއަލް އިބްރާހީމް މުހައްމަދު ދީދީ ވިދާޅުވީ، ކެނަންއާ އެކު އޮތް ދިގު މުއްދަތުގެ ގުޅުމަކީ ސިމްޑީ ގްރޫޕަށް ލިބިފައިވާ ބޮޑު ކާމިޔާބީއެއް ކަމަށެވެ. އަދި މި ގުޅުމުގެ ސަބަބުން ދިވެހި ކަސްޓަމަރުންނަށް އެންމެ ފަހުގެ ޓެކްނޮލޮޖީ ފޯރުކޮށްދިނުމަށް މަގުފަހިވެފައިވާކަން އޭނާ ފާހަގަކުރެއްވި އެވެ.
މިސްޓަރ އިޝީގެ ވާހަކަފުޅުގައި، ރާއްޖޭގެ ކަސްޓަމަރުންގެ ބޭނުންތައް ދެނެގަނެ، އެންމެ ފުރިހަމަ ހިދުމަތް ފޯރުކޮށްދިނުމުގައި ސިމްޑީން ކުރަމުންދާ މަސައްކަތްތަކަށް ވަރަށް ބޮޑަށް ތައުރީފު ކުރެއްވި އެވެ. މި ޒިޔާރަތުގެ ސަބަބުން ދެ ކުންފުނީގެ ދެމެދުގައި އޮތް ގުޅުން އިތުރަށް ބަދަހިވެ، ރާއްޖޭގެ މާކެޓަށް ބޭނުންވާ ޒަމާނީ ޓެކްނޮލޮޖީ އާއި ފަންނީ އެހީތެރިކަން އިތުރަށް ފުޅާވެގެންދާނެ ކަމަށް ދެ ފަރާތުންވެސް ގަބޫލުކުރެ އެވެ. ސިމްޑީ އާއި ކެނަންގެ މި ގުޅުމަކީ ރާއްޖޭގެ ވިޔަފާރީގެ ދާއިރާގައި ނަމޫނާ ގުޅުމެއްގެ ގޮތުގައި ބެލެވެ އެވެ.
