ސިންގަޕޫރުގެ ދަރިމައިވާ ނިސްބަތް ވަރަށް ބޮޑަށް ދަށަށް ދާތީ އާބާދީ އިތުރުކުރުމަށްޓަކައި އުފަންވާ ކޮންމެ ކުއްޖަކަށް 55،000 އެމެރިކާ ޑޮލަރަށްވުރެ ގިނަ ފައިސާގެ އެހީ ދިނުމަށް އެ ގައުމުގެ ސަރުކާރުން ނިންމައިފި އެވެ.
އިއްޔެ ބޭއްވި ސިންގަޕޫރުގެގައުމީ ދުވަހުގެ ޖަލްސާގައި ބޮޑުވަޒީރު ލޯރެންސް ވޮންގް ވިދާޅުވި ގޮތުގައި ދުނިޔޭގައި އެންމެ ހަލުވިކަމާއެކު އާބާދީ މުސްކުޅިވަމުންދާ ގައުމުތަކުގެ ތެރޭގައި ހިމެނޭ އެ ގައުމު ހިމެނޭތީ މި ފިޔަވަޅު އެޅީ، އާއިލާ ބިނާކުރުމަށް ބޭނުންވާ ފަރާތްތަކަށް ސަރުކާރުގެ އެހީތެރިކަން އިތުރުކުރުމުގެ މަގްސަދުގަ އެވެ.
ވޮންގް ވިދާޅުވީ، ދަރިން ހޯދުމަށް ނިންމާ ކޮންމެ އާއިލާއަކާއެކު ސަރުކާރު އޮންނާނެ ކަމަށާއި، ކުރިއަށް އޮތް އަހަރުތަކުގައި އެހީތެރިކަން އިތުރަށް ފުޅާކުރައްވާނެ ކަމަށެވެ.
އާ ސިޔާސަތުގެ ދަށުން، ކުއްޖާއަށް 17 އަހަރު ފުރެންދެން ސަރުކާރުން ގާތްގަނޑަކަށް 70،000 ސިންގަޕޫރު ޑޮލަރު ނުވަތަ 55،150 އެމެރިކާ ޑޮލަރުގެ މާލީ އެހީތެރިކަން ފޯރުކޮށްދޭނެ އެވެ.
މީގެ ތެރޭގައި ކުއްޖާ އުފަންވުމުން ދޭ 10،000 ޑޮލަރުގެ ހަދިޔާއަކާއި، ތައުލީމީ ކަންކަމަށް އެހީވުމުގެ ގޮތުން ދޭ 10،000 ޑޮލަރުގެ ފައިސާ ހިމެނެއެވެ. މީގެ އިތުރުން، މައިންބަފައިންނަށް ދޭ ޗުއްޓީ އިތުރުކުރުމާއި، އަލަށް ކައިވެނިކުރާ ފަރާތްތަކަށް ބޯހިޔާވަހިކަން ހޯދުމުގައި ލުއިފަސޭހަ ގޮތްތަކެއް ހަމަޖައްސައިދިނުން ވެސް މި ޕެކޭޖުގައި ހިމެނެއެވެ.
ތަފާސްހިސާބުތަކުން ދައްކާގޮތުގައި، މިދިޔަ އަހަރު ސިންގަޕޫރުގެ ދަރިމައިވުމުގެ ރޭޓް ވަނީ ރެކޯޑް މިންވަރަކަށް ދަށްވެފައެވެ. އެގޮތުން ކޮންމެ އަންހެނަކަށް ޖެހޭ ކުދިންގެ ނިސްބަތް ވަނީ 0.87 އަށް ވެއްޓިފަ އެވެ. މިއީ ދުނިޔޭގެ އެންމެ ދަށް ރޭޓް އޮތް ދެކުނު ކޮރެއާގެ 0.8 އާ ވަރަށް ގާތް އަދަދެކެވެ. އާބާދީއެއް ހަމަހަމަކަންމަތީ ދެމެހެއްޓުމަށްޓަކައި މި ނިސްބަތް 2.1 ގައި ހުންނަން ޖެހޭ ކަމަށް މާހިރުން ލަފާކުރެ އެވެ.
އުފަންވާ ރޭޓް ދަށްވުމާއި ސިއްހީ ހިދުމަތްތައް ރަނގަޅުވުމުގެ ސަބަބުން މީހުން ދިރިއުޅޭ މުއްދަތު އިތުރުވުމަކީ ސިންގަޕޫރުގެ އާބާދީ "ސުޕަރ-އޭޖްޑް" ނުވަތަ އާބާދީގެ ބޮޑު ބައެއް މުސްކުޅިންނަށް ވުމަށް މެދުވެރިވާ ސަބަބެކެވެ. އދ. އިން ކަނޑައަޅާފައިވާ މިންގަނޑުތަކަށް ބަލާއިރު، އާބާދީގެ 21 ޕަސެންޓަށް ވުރެ ގިނަ މީހުންނަކީ 65 އަހަރުން މަތީގެ މީހުން ކަމުގައިވާނަމަ އެއީ މުސްކުޅި އާބާދީއެއް އޮތް ގައުމެކެވެ. ލަފާކުރެވޭ ގޮތުގައި 2030 ވަނަ އަހަރާ ހަމައަށްދާއިރު ސިންގަޕޫރުގެ ކޮންމެ ހަތަރު މީހަކުން އެކަކީ 65 އަހަރުން މަތީގެ މީހަކަށް ވާނެއެވެ.
ބޮޑުވަޒީރު ވޮންގް ފާހަގަކުރެއްވި ގޮތުގައި، ސަރުކާރުން ކިތަންމެ ގިނަ އެހީތަކެއް ދިން ނަމަވެސް، ގިނަ ޒުވާނުން މިހާރު އިސްކަންދެނީ މާލީ ގޮތުން ފުދުންތެރިވުމަށް ކަމަށްވާތީ ކުދިން ހޯދުން ލަސްކުރެއެވެ. އެހެންކަމުން، ހަމައެކަނި އުފަންވާ ކުދިންގެ އަދަދަށް ބުރަވެގެން އާބާދީ ދެމެހެއްޓުމަކީ ދަތި ކަމަކަށް ވާނެތީ، ބޭރު ގައުމުތަކުގެ މީހުންނަށް ރަށްވެހިކަން ދިނުމުގެ ސިޔާސަތު ވެސް ދެމެހެއްޓެނިވި ގޮތެއްގައި ކުރިއަށް ގެންދާނެ ކަމަށް އޭނާ ވިދާޅުވި އެވެ.
ނަމަވެސް މިކަން ކުރާނީ ސިންގަޕޫރުގެ އަސްލު ރައްޔިތުންގެ އަގުލަބިއްޔަތު ނުގެއްލޭނެ ފަދަ މިންގަނޑެއްގެ ތެރެއިން ކަމަށް ވެސް ބޮޑުވަޒީރު ވިދާޅުވި އެވެ.
