ލޭގެ ޕްރެޝަރު 130/80 ގެ މިންގަނޑުގައި ހުރި ނަމަ، އެ މިންގަނޑު ދަށްކުރުމަކީ ހާޓް އެޓޭކާއި، ވާގިނެތުމާއި، ކިޑްނީގެ ބަލިތަކާއި، ލޮލުގެ ބަލިތަކުގެ އިތުރުން ހަނދާން ބަލިވުމުން ވެސް ރައްކާތެރިކޮށްދޭނެ ކަމެކެވެ. ލޭގެ ޕްރެޝަރު މަތިވުމަކީ ސީރިއަސް ކަމެއްގެ ގޮތުގައި ދެކި، ދިރިއުޅުމުގެ އާދަކާދަތަކަށް ބަދަލު ގެނެސްގެން އެ މިންގަނޑު ދަށްކުރެވޭނެ އެވެ.
ނަމަވެސް، މިފަދަ ބަދަލުތައް ގެނައުމަކީ ގޮންޖެހުން ބޮޑު ކަމަކަށް ވެދާނެ އެވެ. ސިއްހަތަށް ފައިދާ ހުރި ކާނާ ކެއުމުގެ އަޒުމުގައި ހެނދުނު ހޭލާ މީހަކު، އޮފީހުގައި ހުންނަ ކުކީޒްގެ ސަބަބުން ނުވަތަ ރައްޓެހިންނާއެކު ބޭރަށް ކާންދާ ދިއުމެއްގެ ސަބަބުން އެ އަޒުމް ގުޑައިގެންދާ ފަހަރު މަދެއް ނޫނެވެ.
ކުދިކުދި ބަދަލުތަކުން ލޭގެ ޕްރެޝަރު ދަށްކުރުމަށް މުޅި ދިރިއުޅުން އެކަމަށް ހުސްކުރާކަށް ނުޖެހެ އެވެ. ލޭގެ ޕްރެޝަރު އާންމު މިންގަނޑަކަށް ގެނައުމަށްޓަކައި ކުރެވިދާނެ ހަ ކަމެއް ތިރީގައި އެވަނީ އެވެ.
1. ބަރުދަން ލުއިކުރުން
ސިއްހަތަށް ކުރެވޭނެ އެންމެ ފައިދާހުރި އެއް ކަމަކީ ބަރުދަން ލުއިކުރުމެވެ. މީގެ މާނައަކީ ބޮޑު މިންވަރަކަށް ބަރުދަން ލުއިކުރަން ޖެހުމެއް ނޫނެވެ. އެންމެ ދެ ކިލޯ އާއޮ ހަތަރު ކިލޯއާ ދެމެދުގެ މިންވަރެއް ލުއިކޮށްލުމުން ވެސް ލޭގެ ޕްރެޝަރަށް ހެޔޮ ބަދަލެއް އަންނާނެ އެވެ.
2. ލޭބަލްތައް ކިޔުން
ކާނާގެ ތެރޭގައި ސޯޑިއަމް ނުވަތަ ލޮނު ބޭނުންކުރާ މިންވަރު އާދަޔާ ހިލާފަށް ބައެއް ފަހަރު ގިނަ އެވެ. ލޭގެ ޕްރެޝަރު މަތި މީހަކަށް ދުވާލަކު ބޭނުންކުރުމަށް ލަފާދެނީ 1,500 މިލިގްރާމްގެ ސޯޑިއަމް ނަމަވެސް، ގިނަ މީހުން އޭގެ ތިންގުނަ އިތުރަށް ބޭނުންކުރެ އެވެ. ދުވާލަކަށް ކަނޑައެޅިފައިވާ 1,500 މިލިގްރާމްގެ މިންގަނޑަށް ހަމަވުމަށް ބޭނުންވަނީ އެންމެ ސައިސަމުސަލެއްގެ ހަތަރުބައިކުޅަ ތިންބައިގެ ލޮނެވެ. ކާނާ ގަންނައިރު އޭގައި ހުންނަ ސޯޑިއަމްގެ މިންވަރު ބެލުމަކީ މުހިންމު ކަމެކެވެ. އަމިއްލައަށް ކާނާ ތައްޔާރުކުރާ މީހަކަށް ނޫނީ، ލޭބަލް ނުކިޔައި ސޯޑިއަމް މަދުކުރުމަކީ އުނދަގޫ ކަމެކެވެ. ހާއްސަކޮށް ގިނަ އަދަދަކަށް ސޯޑިއަމް އެކުލެވޭ ހަ ބާވަތަށް ސަމާލުވާންޖެހެ އެވެ. އެއީ ޕާނާއި ރޯލްސް، ކޯލްޑް ކަޓް މީޓްސް އަދި ޕްރޮސެސްކޮށްފައިވާ މަސް، ޕިއްޒާ، ކުކުޅު މަސް، ސޫޕް، ސޭންޑްވިޗް އެވެ.
3. ހަރަކާތްތެރިވެ އުޅުން
ސިއްހަތަށް ހެޔޮ ބަދަލެއް ގެނައުމަށްޓަކައި މާ ގިނަ ވަގުތު ކަސްރަތު ކުރާކަށް ނުޖެހެ އެވެ. ހަފުތާއަކު މަދުވެގެން ފަސް ދުވަހު، ދުވާލަކު ބައިގަޑިއިރު ކަސްރަތު ކުރުމަށް އަމާޒު ހިފާށެވެ. އަދި އެއީ ތިމާ ކުރާހިތްވާ ކަމަކަށް ހަދަންވާނެ އެވެ. އެއީ ނެށުން ކަމުގައި ވިޔަސް، ބައިސްކަލް ދުއްވުން ކަމުގައި ވިޔަސް ނުވަތަ ރަހުމަތްތެރިއަކާއެކު ބާރަށް ހިނގާލުން ކަމުގައި ވިޔަސް ރަނގަޅެވެ. ގަސް އިންދުން ފަދަ ދުވަހުން ދުވަހަށް ކުރާ މަސައްކަތްތަކަކީ ވެސް މީގެ ތެރޭގައި ހިމެނޭ ކަންކަމެވެ.
4. ރެސިސްޓަންސް ޓްރެއިނިން ފަދަ ކަސްރަތު
ބަރުދަން ލުއިކުރުމަށާއި ދުޅަހެޔޮކޮށް ހުރުމަށްޓަކައި، ކަސްރަތު ކުރާއިރު "ރެސިސްޓަންސް ޓްރެއިނިން" ހިމަނާށެވެ. އުމުރުން ދުވަސްވާ ވަރަކަށް ހަށިގަނޑުގެ މަސްތަކުގެ ބާރު ދަށްވަމުންދާއިރު، މިފަދަ ކަސްރަތަކީ ގިނަ ފަހަރަށް، ހާއްސަކޮށް އަންހެނުންނަށް، ކަސްރަތު ޕްލޭންގައި ހިމަނަން ހަނދާން ނެތޭ ކަމެކެވެ.
5. ބޭނުންކުރާ ބުއިންތަކަށް ސަމާލުވުން
މާ ގިނައިން އަދި އަބަދު ބުއިންތައް ބޭނުންކުރުމަކީ ލޭގެ ޕްރެޝަރު މަތިވާ ކަމެކެވެ. އެހެންކަމުން، މިފަދަ ކަންކަމުގައި މެދުމިންގަނޑެއް ގެންގުޅުމަކީ މުހިންމު ކަމެކެވެ.
6. ނަފްސާނީ ދުޅަހެޔޮކަމަށް ވަގުތު ހުސްކުރުން
ސްޓްރެސްގެ ސަބަބުން އުފެދޭ ހޯމޯންތަކުން ލޭހިނގާ ނާރުތައް ހަނިވެ، ވަގުތީ ގޮތުން ލޭގެ ޕްރެޝަރު މަތިވެ އެވެ. މީގެ އިތުރުން، ގިނަ ދުވަސްވުމުން ސްޓްރެސްގެ ސަބަބުން ސިއްހަތަށް ގެއްލުންހުރި އާދަތަކަށް މަގުފަހިވެ އެވެ. މީގެ ތެރޭގައި މާ ގިނައިން ކެއުމާއި، ނިދި މަދުވުމާއި، މަސްތުވާތަކެއްޗަށް ދެވިހިފުން ހިމެނެ އެވެ. އެހެންކަމުން، ލޭގެ ޕްރެޝަރު ދަށްކުރަން ބޭނުންވާ ނަމަ، ނަފްސާނީ ދުޅަހެޔޮކަމަށް ސަމާލުކަން ދިނުން މުހިއްމެވެ.
މައުލޫމާތު: ހާވާޑް ހެލްތު
