ސިންގަޕޫރުގެ ފުޑް ކޯޓެއްގެ ތެރޭގައި ކުޑަ އަންހެން ކުއްޖެއްގެ ބޮލުގައި ފިރުމާލި އުމުރުން ދުވަސްވީ މީހަކަށް ހަމަލާދިން މައްސަލައެއް އެ ގައުމުގެ ފުލުހުން ތަހުގީގު ކުރަން ފަށައިފި އެވެ.
އެ ކުއްޖާގެ ބޮލުގައި އަތްލުމުން އެކަމާ ރުޅި އައިސްފައި ހުރި، އެ ކުއްޖާގެ ބައްޕަ ކަމަށް ބެލެވޭ މީހަކު، އުމުރުން 73 އަހަރުގެ އެ މީހާ ބިމަށް ވައްޓާލި ކަމަށް ތުހުމަތުކުރެވެ އެވެ.
ނިމިދިޔަ ހޮނިހިރު ދުވަހު ހިނގި މި ހާދިސާގެ ސެކިއުރިޓީ ކެމެރާ ފުޓޭޖް ސޯޝަލް މީޑިއާގައި އާންމުވުމާ އެކު، ފިރިހެން މީހާ އަމަލުކުރި ގޮތާމެދު ގިނަ ބަޔަކު ވަނީ ނުރުހުން ފާޅުކޮށްފަ އެވެ.
އާދިއްތަ ދުވަހުގެ ރޭ ފުލުހުން ނެރުނު ބަޔާނެއްގައި ބުނެފައިވަނީ، މި ހާދިސާގައި ހިމެނޭ އުމުރުން 40 އަހަރުގެ ފިރިހެން މީހާ މިހާރު ދެނެގަނެވިފައިވާ ކަމަށެވެ.
މި ހާދިސާއާ ގުޅޭގޮތުން ނުވަތަ ކަން ހިނގާދިޔަ ގޮތާ މެދު "ހަގީގަތާ ހިލާފު ވާހަކަ ނުފެތުރުމަށާއި"، ފުލުހުން "މައްސަލަ ތަހުގީގުކޮށް ކަން ހިނގާދިޔަ ގޮތުގެ ހަގީގަތް ހޯދުމަށް" ފުރުސަތު ދިނުމަށް ފުލުހުން ވަނީ އާންމުންގެ ކިބައިން އެދިފަ އެވެ.
ވީޑިއޯއިން ފެންނަ ގޮތުގައި، ޝޮޕިން ސެންޓަރެއްގެ ފުޑް ކޯޓެއްގައި ހުރި މޭޒެއްގެ ކައިރިން އެ އުމުރުން ދުވަސްވީ މީހާ ހިނގާފައި ދިޔައިރު، އެ މޭޒު ކައިރީގައި އިން ކުޑަކުއްޖާގެ ބޮލުގައި އޭނާ ފިރުމާލަ އެވެ.
އެ މޭޒު ކައިރީގައި އިން، އެ ކުއްޖާގެ މަންމަ ކަމަށް ބެލެވޭ އަންހެން މީހާ ވަގުތުން އޭނާ ހުއްޓުވި އެވެ. އަދި އެ ވަގުތު މޭޒު ކައިރިއަށް އައި، އެ ކުއްޖާގެ ބައްޕަ ކަމަށް ބެލެވޭ މީހާ، އުމުރުން ދުވަސްވީ މީހާއާ ކުރިމަތިލައި ޒުވާބު ކުރަން ފެށި އެވެ.
ދެމީހުންގެ މެދުގައި ހޫނު ބަހުގެ ހަމަލާތަކެއް ބަދަލުކުރުމަށް ފަހު، ފިރިހެން މީހާ އެ އުމުރުން ދުވަސްވީ މީހާގެ އަތުގައި ހިފައި ބިމަށް ވައްޓާލާ މަންޒަރު ވީޑިއޯއިން ފެނެ އެވެ.
މި ވީޑިއޯ ސިންގަޕޫރުގައި ވަރަށް ބޮޑަށް އާންމުވެފައިވާއިރު، ފިރިހެން މީހާގެ އަމަލުތައް ގިނަ ބަޔަކު ވަނީ ކުށްވެރިކޮށްފަ އެވެ. ބައެއް މީހުން ބުނާ ގޮތުގައި ބެލެނިވެރިންގެ ހުއްދައާ ނުލައި ކުއްޖާގެ ގައިގައި އަތްލައިގެން ނުވާނެ އެވެ. ނަމަވެސް، ކުއްޖާގެ ބޮލުގައި ފިރުމާލުމުން އެފަދަ އަނިޔާވެރި ގޮތަކަށް އަމަލުކުރުމަކީ ބަލައިގަނެވޭނެ ކަމެއް ނޫން ކަމަށް ގިނަ ބަޔަކު ބުންޏެވެ.
އެ ވީޑީއޯ އާއްމުކުރީ އަނިޔާލިބުނު އުމުރުން ދުވަސްވީ މީހާގެ ދަރިފުޅު ކަމަށް ބުނާ މީހެކެވެ. އޭނާ އެ ޕޯސްޓް މެދުވެރިކޮށް އެދިފައިވަނީ އޭނާގެ ބައްޕައަށް ހަމަލާދިން މީހާ ދެނެގަތުމަށް އެހީތެރިވެދިނުމަށެވެ.
"އެ ހާދިސާއަށްފަހު، އެ މީހާ އަހަރެންގެ ބައްޕައާ އެކު އިށީނދެ، މާފަށް އެދުނު،" ޕޯސްޓުގައި ބުނެފައިވެ އެވެ.
"އޭނާ ފަހުން މާފަށް އެދުމުން އެކަން ބަލައިގަންނަ ނަމަވެސް، މި ހާދިސާއާ ގުޅިގެން އަހަރެންގެ ބައްޕަ މިހާރު ދަނީ ބުރަކަށީގައި ވަރަށް ބޮޑަށް ރިއްސާތީ ވޭން ތަހައްމަލު ކުރަމުން."
އަނިޔާ ލިބުނު އުމުރުން ދުވަސްވީ މީހާ އެ ގައުމުގެ "ޗެނަލް ނިއުސް އޭޝިއާ" އަށް މައުލޫމާތު ދެމުން ބުނީ، އޭނާ އެ ކުޑަ އަންހެން ކުއްޖާގެ ބޮލުގައި ފިރުމާލީ އެ ކުއްޖާ "ވަރަށް ލޯބިކަމުން" ކަމަށެވެ.
"އުމުރުން ދުވަސްވީ މީހުން ކުޑަކުދިން ފެނުމުން ބޮލުގައި ފިރުމާލާ ހިތްވާނެ،" އޭނާ ބުންޏެވެ.
އޭނާ އިތުރަށް ބުނި ގޮތުގައި، ބިމަށް ވެއްޓުނުތާ މަދު ގަޑިއިރުތަކެއްގެ ތެރޭގައި ހަށިގަނޑުގައި ރިއްސަން ފެށި އެވެ. އަދި މިހާރު ތަދު ކަނޑުވަން ޕެނަޑޯލް ބޭނުންކުރަމުންދާ ކަމަށް ވެސް އޭނާ ބުންޏެވެ.
އެ މީހާގެ ދަރިފުޅު ކުރި އެހެން ޕޯސްޓެއްގައި، ފުލުހުން މި މައްސަލައަށް އަވަސް އިޖާބައެއް ދީފައިވާތީ ޝުކުރު އަދާކޮށްފައިވެ އެވެ. އަދި އޭނާގެ ބައްޕައަށް އިންސާފު ލިބޭނެ ކަމަށް އުންމީދު ކުރާ ކަމަށް ވެސް ބުނެފައިވެ އެވެ.
