ސިމްޑީ ގްރޫޕާއި ކެއާ ސޮސައިޓީ ގުޅިގެން ނުކުޅެދުންތެރިކަން ހުންނަ ކުދިންނަށް އަމާޒުކޮށްގެން ހިންގާ ހާއްސަ އިންޓާންޝިޕް ޕްރޮގްރާމް މިއަހަރު ވެސް ފަށައިފި އެވެ.
މިއީ ސިމްޑީ ގްރޫޕްގެ އިޖުތިމާއީ ޒިންމާގެ ދަށުން ކެއާ ސޮސައިޓީއާ ގުޅިގެން މި ޕްރޮގްރާމް މެދުނުކެނޑި ކުރިއަށްގެންދާ ހަތަރުވަނަ އަހަރެވެ. މި ޕްރޮގްރާމްގެ މައިގަނޑު މަގްސަދަކީ ނުކުޅެދުންތެރިކަން ހުންނަ ކުދިންނަށް މަސައްކަތުގެ އަމަލީ މާހައުލުގެ ތަޖުރިބާ ހޯދައިދިނުމާއި، ވަޒީފާގެ ބާޒާރަށް ނުކުތުމަށް ބޭނުންވާ މުހިންމު ހުނަރުތަކާއި އަމިއްލަ ނަފްސަށް އޮންނަ އިތުބާރު ބިނާކޮށްދިނުމެވެ.
މިއަހަރުގެ އިންޓާންޝިޕް ޕްރޮގްރާމްގައި ބައިވެރިވަނީ ކެއާ ޑިވެލޮޕްމަންޓް ސެންޓަރުގެ ރެޑިނަސް ފޯ އެމްޕްލޯއިމަންޓް ޕްރޮގްރާމްގައި ކިޔަވަމުންދާ ދަރިވަރެއް ކަމަށްވާ ފާތިމަތު ޔަދުޔާ ރަޝީދެވެ. ޔަދުޔާގެ އިންޓާންޝިޕް ކުރިއަށްދާނީ ސިމްޑީ ގްރޫޕްގެ އެންމެ މުހިންމު އެއް ޑިވިޝަން ކަމަށްވާ ސިމްޑީ ސީޕީޑީ ގަ އެވެ.
މި މުއްދަތުގެ ތެރޭގައި ރީޓެއިލް ވިޔަފާރީގެ މާހައުލުގައި މަސައްކަތްކުރާނެ ގޮތުގެ އަމަލީ ތަމްރީނާއި، ދާއިރާގެ ތަޖުރިބާކާރުންގެ ފަރާތުން ބޭނުންވާ އިރުޝާދު ޔަދުޔާއަށް ލިބިގެންދާނެ އެވެ. މި ޕްރޮގްރާމަކީ މުޖުތަމައުގައި އެންމެން ބައިވެރިކުރުމާއި، ހާއްސަކޮށް ޒުވާނުން ބާރުވެރިކުރުވުމަށް ސިމްޑީ ގްރޫޕުން ކުރަމުންދާ މަސައްކަތްތަކުގެ ތެރެއިން ފާހަގަކޮށްލެވޭ މުހިންމު ހަރަކާތެކެވެ.
ސިމްޑީ ގްރޫޕަކީ 2000 ވަނަ އަހަރުން ފެށިގެން ރާއްޖޭގައި ފުޅާ ދާއިރާއެއްގައި ވިޔަފާރިކުރަމުން އަންނަ، ރާއްޖޭގެ އެންމެ ބޮޑު އެއް ކުންފުންޏެވެ. ސިމްޑީ އިން ހިންގާ މިފަދަ ޕްރޮގްރާމްތަކުގެ ސަބަބުން ނުކުޅެދުންތެރިކަން ހުންނަ ފަރާތްތަކަށް މުޖުތަމައުގެ ތެރޭގައި ބިނާކުރަނިވި މަސައްކަތްތަކެއް ކުރުމުގެ ފުރުސަތު ފަހިވެގެންދެ އެވެ.
ކެއާ ސޮސައިޓީއަކީ 1998 ވަނަ އަހަރުން ފެށިގެން ރާއްޖޭގައި ނުކުޅެދުންތެރިކަން ހުންނަ ފަރާތްތަކުގެ ހައްގުގައި އަދި އެފަރާތްތައް ބާރުވެރިކުރުވުމަށް ގިނަގުނަ މަސައްކަތްތަކެއް ކުރަމުން އަންނަ ޖަމިއްޔާއެކެވެ.
ސިމްޑީ ގްރޫޕާއި ކެއާ ސޮސައިޓީ ގުޅިގެން ކުރިއަށްގެންދާ މި އިންޓާންޝިޕް ޕްރޮގްރާމަކީ، ނުކުޅެދުންތެރިކަން ހުންނަ ކުދިންނަށް ވަޒީފާގެ މާހައުލަށް އަހުލުވެރިވުމަށް ލިބޭ ރަނގަޅު ފުރުސަތެއްގެ ގޮތުގައި އެ ޖަމިއްޔާއިން ފާހަގަކުރެ އެވެ. މި ޕްރޮގްރާމްގެ ސަބަބުން މުޖުތަމައުގެ އެކި ދާއިރާތަކުގައި އެންމެންގެ ބައިވެރިވުން އިތުރުވެ، އިޖުތިމާއީ ގޮތުން ހެޔޮ ބަދަލުތަކެއް އަންނާނެ ކަމަށް ބެލެވެ އެވެ.
