މެޑްރިޑް (ސެޕްޓެމްބަރު 2) - ގެބޮން ސަރުކާރަށް ފާޑުކިޔުމަށް ފަހު، އެ ގައުމުގެ ކެޕްޓަން، ތަޖުރިބާކާރު ފޯވާޑް، ޕިއޭ އެމެރިކް އޮބާމަޔަން ގައުމީ ޓީމުން ރިޓަޔާކޮށްފި އެވެ.
އެފްރިކަން ކަޕް އޮފް ނޭޝަންސްގައި ގެބޮން އިން ނެރުނު ނަތީޖާތައް ދަށް ކަމަށް ބުނެ، އެ ގައުމުގެ ސަރުކާރުން، ގައުމީ ފުޓްބޯޅަ ޓީމު ސަސްޕެންޑްކޮށް، އޮބާމަޔަން ހިމެނޭ ގޮތަށް ސީނިއާ ކުޅުންތެރިންނަށް ފިޔަވަޅު އެޅި އެވެ.
ގެބޮން ސަރުކާރުން ޓީމު ސަސްޕެންޑްކޮށް، އޮބާމަޔަން އަށް ފިޔަވަޅު އަޅައިފި
އެފްރިކަން ކަޕް އޮފް ނޭޝަންސްގައި ގެބޮން އިން ނެރުނު ނަތީޖާތައް ދަށް ކަމަށް ބުނެ، އެ ގައުމުގެ ސަރުކާރުން، ގައުމީ ފުޓްބޯޅަ ޓީމު ސަސްޕެންޑްކޮށް، ޓީމުގެ މުހިންމު ކުޅުންތެރިޔާ، ޕިއޭ އެމެރިކް އޮބާމަޔަން ހިމެނޭ ގޮތަށް ސީނިއާ ކުޅުންތެރިންނަށް ވަނީ ފިޔަވަޅު އަޅައިފައި.
މޮރޮކޯގައި މި އަހަރުގެ ކުރީކޮޅުގައި ބޭއްވި އެފްރިކަން ކަޕްގައި ގެބޮން ކުޅުނު ތިން މެޗުން ވެސް ބަލިވެ، މުބާރާތުން ކެޓީ ޕޮއިންޓެއް ވެސް ނުލިބި އެވެ. ފުރަތަމަ މެޗުން ކެމަރޫން އަތުން 1-0 އިން ބަލިވިއިރު، ދެ ވަނަ މެޗުގައި، މޮޒަމްބީކު އަތުން 3-2 އިން ބަލިވި އެވެ. އަދި، ފަހު މެޗުގައި އައިވަރީ ކޯސްޓާ ކުޅެގެން ވެސް 3-2 އިން ބަލިވި އެވެ.
އައިވަރީ ކޯސްޓު މެޗަށް ފަހު، ގެބޮންގެ ކުޅިވަރު ވަޒީރު، ސިމްޕްލީސް-ޑެޒެއާ މަމްބޫލާ ވަނީ ޓީމުގެ ކުޅުމަށް ފާޑުކިޔައި، މުޅި ޓީމު ސަސްޕެންޑް ކުރުމުގެ އިތުރުން ކޯޗު ތިއަރީ މަޔޫމާ ވެސް ވަކިކުރަން އަންގައިފަ އެވެ. އަދި، މުބާރާތުގައި ގެބޮންގެ ފަރާތުން ފެނުނީ ލަދުވެދި ކުޅުމަކާއި ނަތީޖާތަކެއް ކަމަށް ވިދާޅުވެ، މަމްބޫލާ ވަނީ ޓީމުގައި ހިމެނޭ ސީނިއާ ކުޅުންތެރިން ދެން ޓީމަށް ނެގުން މަޑުޖައްސާލަން އަންގައިފަ އެވެ.
ގެބޮންގެ ރައީސް، ބްރައިސް ކްލޯޓެއާ އޮލިގީ އެންގޭމާ ވެސް ވަނީ އޮބާމަޔަން އާއި ސީނިއާ ކުޅުންތެރިންނަށް ފާޑުކިޔައިފަ އެވެ.
"އެ މީހުން (ސަރުކާރުން) އަހަރެން ލަދުގަންނަވާލީ. އަހަރެން އެފްރިކަން ކަޕްގައި ކުޅުނީ އަނިޔާގައި ހުރެ، އެ ވަރު ވެސް އެ މީހުންނަށް ނުވިސްނުނު. މިއީ، އެންމެ ފަހު ފަހަރު، މި ހިސާބުން ދެން ނިމުނީ، މައްސަލަ އޮތީ އަހަންނާ ހަމަޔަކުން ނޫން. އެ އަށް ވުރެން ފުނަށް ގޮސްގެން މައްސަލަ ހައްލުކުރަންވީ،" އުމުރުން 37 އަހަރުގެ އޮބާމަޔަން ބުންޏެވެ.
ގެބޮން އަށް އެންމެ ފުރަތަމަ 2009 ވަނަ އަހަރު މެޗެއް ކުޅެދިން އޮބާމަޔަން، ގައުމީ ޓީމުން ރިޓަޔާކުރަނީ، އެ ޓީމަށް އެންމެ ގިނަ ގޯލު ޖަހައިދިން ކުޅުންތެރިޔާގެ ރެކޯޑް ހޯލްޑަރުގެ ގޮތުގަ އެވެ. އެ ގޮތުން، އޮބާމަޔަން ވަނީ 83 މެޗުން 40 ގޯލު ގެބޮން އަށް ކާމިޔާބުކޮށްދީފަ އެވެ.
ބޮރޫޝިއާ ޑޯޓްމަންޑް، އާސެނަލް، ޗެލްސީ، ބާސެލޯނާ، އޭސީ މިލާން، މޮނާކޯ، ސެއިން އެޓިއެން، ލިލް، ޑިޖޯން، އަލް ގަދްސިއާ، މާސޭ އަށް ކުޅުނު އޮބާމަޔަން މިހާރު ކުޅެމުން އަންނަނީ ސްޕެއިނުގެ ޑިޕޯޓިވޯ ލަކަރޫނިއާ އަށެވެ. މެދުކެނޑުމަކަށް ފަހު ސްޕެނިޝް ލީގަށް އެނބުރި އައި ޑިޕޯޓިވޯ އަށް މި ފަހަރު ކުޅެދިން ތިން މެޗުން އޮބާމަޔަން ވަނީ ތިން ގޯލު ޖަހައިފަ އެވެ.
