ހިމަލަޔާ ސަރަހައްދަށް ކުރިމަތިވި ހާދިސާއާ ގުޅިގެން، ނޭޕާލާ އިންވެގެން އޮންނަ ޓިބެޓުގެ ބޯޑަރު ސަރަހައްދުން 23 ގައުމަކަށް ނިސްބަތްވާ 261 ބޭރު މީހުން ގެއްލިފައިވާ ކަމަށް ޗައިނާއިން އާދިއްތަ ދުވަހު ބުނެފި އެވެ.
މި ހާދިސާގައި ޓިބެޓުން މަރުވި މީހުންގެ އަދަދު މިހާރު ވަނީ 16 އަށް އަރާފަ އެވެ.
ޗައިނާގެ ޓިބެޓް އޮޓޮނޮމަސް ރީޖަންގެ އޮފިޝަލުން ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، ގެއްލުނު ބޭރު މީހުންގެ ތެރޭގައި އެންމެ ގިނައީ ނޭޕާލްގެ ރައްޔިތުން ކަމަށެވެ. އެގޮތުން ނޭޕާލްގެ 104 މީހަކާއި، އިންޑިއާގެ 49 މީހަކާއި، ލެޓްވިއާގެ 33 މީހަކާއި، އެމެރިކާގެ 18 މީހެއްގެ އިތުރުން އިނގިރޭސިވިލާތުގެ 15 ރައްޔިތަކު ވީނުވީއެއް ނޭނގި ގެއްލިފައިވާ ކަމަށް އޮފިޝަލުން ވިދާޅުވި އެވެ.
މިކަމާ ގުޅޭ މައުލޫމާތު ބެއިޖިންގައި ހުންނަ ބޭރު ގައުމުތަކުގެ މިޝަންތަކަށް މިހާރު އަންގާފައިވާ ކަމަށް ވެސް އޮފިޝަލުން ވިދާޅުވި އެވެ.
މިދިޔަ ބުދަ ދުވަހު ފަރުބަދަމަތިން ސްނޯ ފައިބައިގެން ގޮސް، ހިމަލަޔާގެ ކޯރުތަކަށް އައިސްގަނޑުތަކާއި، ހިލަޔާއި، ކިސަޑު އަދި ކުނިބުނިތައް އޮހިގަތް ހާދިސާއަށްފަހު، ގެއްލުނު މީހުންގެ ގައުމުތަކުގެ ތަފުސީލު ޗައިނާ ސަރުކާރުން ހާމަކުރި މިއީ ފުރަތަމަ ފަހަރެވެ.
ކަމާބެހޭ އިދާރާތަކުން ހާމަކުރި ގޮތުގައި، ހޮނިހިރު ދުވަހުގެ އިރުއޮއްސުމާ ހަމައަށް ޓިބެޓުގެ ގީރޮންގް ކައުންޓީން 16 މީހަކު މަރުވެފައިވާއިރު، ޖުމްލަ 546 މީހަކު ވަނީ ގެއްލިފަ އެވެ.
ނޭޕާލުގެ ޑިޒާސްޓާ އޮތޯރިޓީން ބުނި ގޮތުގައި، ބޯޑަރުގެ ނޭޕާލް ފަޅިން މިހާތަނަށް މަދުވެގެން 675 މީހުން މަރުވެ، 2,498 މީހުން ވަނީ ގެއްލިފަ އެވެ. އަދި މިހާތަނަށް 7,514 މީހަކު ސަލާމަތްކުރެވިފައިވާ ކަމަށް ވެސް އެ އިދާރާއިން ބުނެ އެވެ.
