ރާއްޖޭގައި ބުޅަލަށް ހާއްސަ ރަށެއް ތަރައްގީކުރުމަށް ސަރުކާރުގެ ޝައުގުވެރިކަން އެބަހުރި ކަމަށް ފިޝަރީޒް މިނިސްޓަރު އަހްމަދު ޝިޔާމް މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ޝިޔާމް ވިދާޅުވީ ބުޅަލަށް ހާއްސަ ރަށެއް ތަރައްގީކުރުމަށް ބޭރު ފަރާތަކުން ޕްރޮޕޯޒަލްއެއް ލިބި، އެ ޕްރޮޕޯޒަލް އިވެލުއޭޓްކުރުމުގެ މަސައްކަތް ކުރަމުންދާ ކަމަށެވެ.
"ޝައުގުވެރިކަން އެބަހުރި ހަމަ ދިވެހިރާއްޖޭގައި ހަމަ ކެޓް އައިލެންޑް އައިލެންޑެއް ތަރައްގީކުރުމަށްޓަކައި ވެސް އެބަ އޮތް ވަރަށް ރަނގަޅު ޕްރޮޕޯޒަލެއް ލިބިފައި. އެ އިވެލުއޭޝަން މަސައްކަތްތަކެއްވެސް ކުރިއަށް އެބަދޭ. އެއީ ހަމަ އިންޓަނޭޝަނަލް ޕާޓީއަކުން ޕްރޮޕޯޒްކޮށްފައި އޮތް ޕްރޮޕޯޒަލްއެއް،" ޝިޔާމް ވިދާޅުވި އެވެ.
ބުޅަލަށް ޝައުގުވެރިވާ ބޮޑު ކޮމިއުނިޓީއެއް އޮންނައިރު، ރާއްޖެފަދަ ގައުމެއްގައި ބުޅަލަށް ހާއްސަ ރަށެއް ޒަމާނީ ހިދުމަތްތަކާއެކު ގާއިމުކުރުމުން އެކަމަށް ބޭރުގެ ފަރާތްތަކުގެ ޝައުގުވެރިކަންވެސް ބޮޑުވާނެ ކަމަށް ޝިޔާމް ވިދާޅުވި އެވެ.
ބުޅަލަށް ހާއްސަކޮށް ހުޅުމާލޭގައި މިހާރު ތަރައްގީކޮށްފައިވާ އޮޅުހިޔާ ޝެލްޓަރުގައި 281 ބުޅާ ގެންގުޅެމުންދާއިރު، އޭގެ ތެރެއިން 35 ބުޅާ ގެނެސްފައިވަނީ މިދިޔަ މަހު އެވެ.
އޮޅުހިޔާގެ ކެޕޭސިޓީ އިތުރުކޮށް މަރާމާތުކުރުމުގެ މަސައްކަތް މިހާރު ކުރިއަށްދާ ކަމަށް ޝިޔާމް ވިދާޅުވި އެވެ. މިނިސްޓަރު ވިދާޅުވީ އެ މަސައްކަތް ނިމުމުން އޮޅުހިޔާގެ ކެޕޭސިޓީ 500 އަށް އިތުރުކުރެވޭނެ ކަމަށެވެ.
