މި އަހަރުގެ ޑިސެމްބަރު މަހު ތ. ފުނައްޑޫއަށް މަސް ގަންނަން ފަށާނެކަމަށް ފިޝަރީޒް މިނިސްޓަރު، އަހުމަދު ޝިޔާމް ވިދާޅުވެއްޖެ އެވެ.
މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ޝިޔާމް ވިދާޅުވީ ފުނައްޑޫ ތަރައްގީ ކުރުމުގެ މަސައްކަތް އޮތީ މިހާރު ޕްރައިވެޓު ކުންފުންޏަކާ ހަވާލުކޮށްފައި ކަމަށެވެ. ނަމަވެސް، އެއީ ކޮން ކުންފުންޏެއްކަމެއް އޭނާ ވިދާޅެއް ނުވެ އެވެ.
"އަޅުގަނޑުމެން މިވަނީ ހަމަ ޕްރައިވެޓު ކުންފުންޏަކަށް ފުނައްޑޫ އޮޕަރޭޝަނަށް ގެނައުމަށްޓަކައި ދީފައި، އެ ކުންފުނިން އަޅުގަނޑުމެންނަށް ޔަގީންކަން އެބަ އަރުވާ، މި ޑިސެމްބަރަށް އިނގޭތޯ؟ މަސްވެރިންގެ ދުވަހާ ދިމާކޮށް އެ ތަނަށް މަސްގަތުމުގެ އެ ބޭފުޅުން ފަށްޓަވައި އޮޕަރޭޝަންގެ ވާހަކަ އެއީ، ފުނައްޑޫގެ އޮޕަރޭޝަން ފަށްޓަވާނެކަމުގެ ޔަގީންކަން އެބަ ދެއްވާ،" ޝިޔާމް ވިދާޅުވި އެވެ.
ފުނައްޑޫ މަސް ފެކްޓްރީ ތަރައްގީކޮށްގެން ކުރިން ހިންގީ ކުރީގެ ހޯމް މިނިސްޓަރު އަދި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަހުމަދު ތަސްމީން އަލީ ހިއްސާވާ ކުންފުންޏަކުންނެވެ. އެތަން ވިއްކާލުމަށް ބޭންކް އޮފް މޯލްޑިވްސް އިން މަސައްކަތް ކުރަމުން އަންނަތާ އަހަރުތަކެއްވީ ފަހުން މިދިޔަ ސަރުކާރުން ވަނީ މާޗް 2022، ގައި އެ ފެކްޓްރީ ގަނެފަ އެވެ.
ތ. ތިމަރަފުށްޓާ ދާދި ކައިރީގައި އޮންނަ ފުނައްޑޫގައި މަސް ބަންދުކުރާ ކާރުހާނާއެއް އަޅަން، ތަސްމީން ހިއްސާވާ ކުންފުންޏަކަށް އެ ރަށް ދޫކުރީ ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގަ އެވެ.
އެ ރަށުގައި މަސްފެކްޓްރީއެއް ހަދައިގެން ހިންގާތާ އަަހަރުތަކެއް ފަހުން ބޭންކް އޮފް މޯލްޑިވްސްއަށް އެ ރަށް ނަގައި ވިއްކައިލަން އިއުލާނު ކުރީ ފުނައްޑޫ ޓޫނާ ޕްރޮޑަކްޓްސް ޕްރައިވެޓް ލިމިޓެޑުން ނަގާފައިވާ ލޯނެއް ނުދެއްކުމުންނެވެ. އެރަށާއި އެހެން ބައެއް ތަންތަން ރަހުނުކޮށްގެން ނަގާފައިވާ ލޯނާއި އެލޯނަށް އިތުރުވި އިންޓަރެސްޓާއި އެކު ބޭންކަށް ދައްކަން އޭރު 200 މިލިޔަން ރުފިޔާއަށް ވުރެ ގިނަ ފައިސާ އޮތެވެ.
ފުނައްޑޫ ވިއްކައިލަން ބީއެމްއެލް އިން ފުރަތަމަ އިއުލާނު ކުރީ 2013 ވަނަ އަހަރު އެވެ. އެފަހަރު ގަންނާނެ ބަޔަކު ނުވެގެން 2014 ވަނަ އަހަރު ދެވަނަ ފަހަރަށް ވެސް އިއުލާނު ކުރި އެވެ. އެންމެފަހުން އެ ރަށް ސަރުކާރުން ގަތީ އެވެ.
ފުނައްޑޫ އަލުން އޮޕަރޭޝަނަށް ގެނައުމަށްޓަކައި މިދިޔަ ސަރުކާރުން އެ ރަށް ކުއްޔަށް ދިނީ މިފްކޯއަށެވެ. އެހެންނަމަވެސް، މި ސަރުކާރު ފެށުނުއިރު ވެސް އެ ރަށް އޮޕަރޭޝަނަށް ގެނެވޭވަރު އޮތީ ނުވެ އެވެ.
