ހއ. މާރަންދޫ ފެނަކަ އޮފީހުން އިންޒާރަކާ ނުލައި 13 މުވައްޒަފުން ވަކިކުރީ އިދިކޮޅު ސިޔާސީ ފިކުރުތަކުގެ މީހުން ބަލިކޮށްލުމަށްޓަކައި ވަކި ބަޔަކަށް ޓާގެޓުކޮށްގެން ކަމަށް އެ ރަށު ކައުންސިލުން ބުނެފި އެވެ.
މާރަންދޫ ކައުންސިލުން އިއްޔެ ނެރުނު ބަޔާނެއްގައި ވަނީ އެ 13 މުވައްޒަފުން ވަޒީފާއިން ވަކިކުރުން ކުށްވެރިކޮށް އެއީ ފިނޑި އަމެލެއްގެ ގޮތުގައި ސިފަކޮށްފަ އެވެ.
"ވަޒީފާގެ ޔަގީންކަން ކަށަވަރުކޮށްދެއްވާނެ ކަމަށް ވިދާޅުވެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ރިޔާސީ ވައުދުފުޅު ބޮލާލައި ޖެހުމަށްފަހު، ކުންފުނި ރައިޓްސައިޒް ކުރުމުގެ ނަމުގައި އިދިކޮޅު ސިޔާސީ ފިކުރުތަކުގެ މީހުން ބަލިކަށިކޮށްލުމަށް ވަކި ބަޔަކަށް އަމާޒުކޮށް ވަޒީފާއިން ވަކިކުރުމަކީ ވަރަށް ފިނޑި، އަދި ބަލައިގަނެވޭނެ އަމަލެއް ނޫންކަމުގައި މި ކައުންސިލުން ދެކެން،" އެ ބަޔާނުގައި ބުންޏެވެ.
ކުންފުނިތައް ރައިޓްސައިޒް ކުރުމުގެ ނަމުގައި ދަށް ފަންތީގެ އެތައް މުވައްޒަފުންނެއް ވަޒީފާއިން ވަކިކޮށް އެމީހުންގެ އާއިލާތައް ބިކަ ކުރުމަށްފަހު، ސިޔާސީ ބޮޑެތި މަގާމުތަކަށް މީހުން އައްޔަނުކުރަންމުން ދިޔުމަކީ ވަރަށް ނާތަހުޒީބު އަމަލެއްގެ ގޮތުގައި އެ ކައުންސިލުން ވަނީ ސިފަކޮށްފަ އެވެ.
"މިއީ ސިޔާސީ ގޮތުން، ރައްޔިތުން ބަލިކަށިކޮށް ރައްޔިތުން އަޅުދާސްތުކުރުމަށްޓަކައި އަޅަމުންދާ އަނިޔާވެރި ފިޔަވަޅުތަކެއް ކަމުގައި މި ކައުންސިލުން ދެކޭހިނދު، ވަޒީފާއިން ވަކިކުރި މުވައްޒަފުންނަށް އިންސާފު ހޯދައިދިނުމަށް ކަމާބެހޭ އެންމެހައި ފަރާތްތަކަށް ގޮވައިލަން،" އެ ބަޔާނުގައި ބުންޏެވެ.
އައްޑޫ ފެނަކައިން ވަކިކުރި 189 މުވައްޒަފުންގެ ހައްގުގައި މުޒާހަރާކުރަން ފަށައިފި
އައްޑޫ ސިޓީ ފެނަކައިގެ 189 މުވައްޒަފަކު ކުއްލި ގޮތަކަށް ވަޒީފާއިން ވަކިކުރުމާ ގުޅިގެން، އެ މީހުންގެ ހައްގުގައި ހިތަދޫ ފެނަކަ އޮފީސް ދޮރުމަތީގައި މުޒާހަރާކުރަން ވަނީ ފަށާފައި. މި މުޒާހަރާގައި ސިޓީ ކައުންސިލަރުންނާއި އާންމުން ބައިވެރިވާއިރު، މިއީ ސިޔާސީ ނުފޫޒުންނާއި ނާއިންސާފުން ކޮށްފައިވާ ކަމެއް ކަމަށް މޭޔަރު އަލީ ނިޒާރު ވަނީ ތުހުމަތު ކުރައްވާފައި.
މާރަންދޫގެ އިތުރުން ވެސް ރާއްޖޭގެ އެކި ކަންކޮޅުތަކުގައި މަސައްކަތްކުރާ ސަރުކާރު ކުންފުނިތަކުގެ މުވައްޒަފުން ދަނީ ވަޒީފާއިން ވަކިކުރަމުންނެވެ.
އޭގެ ސަބަބެއްގެ ގޮތުގައި ކުންފުނިތަކުން ދައްކަނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ނެރެފައިވާ ސާކިއުލާ އެވެ. ސަރުކާރު ހިއްސާވާ ކުންފުނިތަކުން 33 ޕަސެންޓު މުވައްޒަފުން ވަކިކުރަން ޕީސީބީން އެންގީ މިދިޔަ އޭޕްރިލް މަހު އެވެ. ޕީސީބީގެ އެ އެންގުމަކީ ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓުގައި ސަރުކާރަށް ލިބުނު ނާކާމިޔާބީގެ ސަބަބުން، އެންެގި އެންގުމެއް ކަމަށް ގިނަ ބަޔަކު އަންނަނީ ބުނަމުންނެވެ.
އެ ސާކިއުލާއާ އެއްގޮތަށް، ސަރުކާރު ހިއްސާވާ ކުންފުނިތަކުން 33 ޕަސެންޓު މުވައްޒަފުން ތިން މަސްދުވަހުގެ ތެރޭގައި ވަކިކޮށް ނިންމުމަށް އަންގައި މިދިޔަ މަހުގެ 18، ގައި ޕީސީބީން ވަނީ އިތުރު ސާކިއުލާއެއް ނެރެފަ އެވެ. އެ ސާކިއުލާގައި އަންގާފައި ވަނީ ޖުލައި 13. އިން ފެށިގެން ތިން މަސްދުވަހުގެ ތެރޭގައި އެ މަސައްކަތްކޮށް ނިންމުމަށެވެ. އެ މުއްދަތު ހަމަވާނީ އަންނަ އޮކްޓޫބަރު މަހު އެވެ.
