ހޮރްމޫޒް ކަނޑުއޮޅިއާ ގުޅޭގޮތުން އީރާނާއި އޮމާނުން އެކުލަވައިލާ އެއްބަސްވުމުގެ ފަހުގެ ތަފުސީލުތައް ކަނޑައެޅުމުގެ މަސައްކަތް އެ ދެ ގައުމުން އަދިވެސް ކުރަމުންދާ ކަމަށް އީރާނުގެ އިސް މަސްދަރަކުން ބުދަ ދުވަހު ބުނެފި އެވެ.
އެ މަސްދަރުން މިހެން ބުނެފައި މިވަނީ، އެ ކަނޑުއޮޅި ބޭނުންކުރުމާއި އެތަނުން ލިބޭ އާމްދަނީ ހިއްސާކުރާނެ ގޮތަކާ މެދު ދެ ގައުމުން އެއްބަސްވުމަކަށް އައިސްފައިވާ ކަމަށް އީރާނުގެ ރިވޮލިއުޝަނަރީ ގާޑްސްއިން ބުނެފައި ވަނިކޮށެވެ.
އީރާނުގެ ސަރުކާރުގެ ރަސްމީ ސިޔާސަތާ އެއްގޮތަށް ވާހަކަދައްކަވަމުން، ރިވޮލިއުޝަނަރީ ގާޑްސްގެ ތަރުޖަމާނު ވިދާޅުވީ، މިދިޔަ ޖޫން މަހު އެކުލަވައިލި ނަމަވެސް ފަހުން އަމަލުކުރުން ހުއްޓާލާފައިވާ ވަގުތީ ހަނގުރާމަ ހުއްޓާލުމުގެ އެއްބަސްވުމުގެ ދަށުން އީރާނުން ހުށަހަޅާފައިވާ ޝަރުތުތަކަށް އެމެރިކާއިން އެއްބަސްނުވާހާ ހިނދަކު ހޮރްމޫޒް ކަނޑުއޮޅި ނުހުޅުވާނެ ކަމަށެވެ.
އީރާނުން ހުށަހަޅާފައިވާ ޝަރުތުތަކުގެ ތެރޭގައި، އެ ގައުމުގެ ބަނދަރުތަކަށް އެމެރިކާއިން ކުރިމަތިކޮށްފައިވާ ހުރަސްތައް ނައްތާލުމާއި، ލިބުނު ގެއްލުމުގެ ބަދަލު ދިނުމުގެ އިތުރުން އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުން ހިމެނެ އެވެ.
މިދިޔަ ފެބުރުއަރީ މަހު ހަނގުރާމަ ފެށުމުގެ ކުރިން ދުނިޔޭގެ ބާޒާރަށް ސަޕްލައިކުރާ ތެލާއި ގުދުރަތީ ގޭހުގެ ފަސްބައިކުޅަ އެއްބައި އުފުލި ހޮރްމޫޒް ކަނޑުއޮޅީގެ ދަތުރުފަތުރުތައް ކޮންޓްރޯލްކުރުމާ ގުޅޭގޮތުން އީރާނާއި އޮމާނުން ދަނީ މެދުކެނޑުމެއްނެތި އެތައް ހަފުތާއެއް ވަންދެން މަޝްވަރާ ކުރަމުންނެވެ.
ހޮރްމޫޒް ކަނޑުއޮޅީގެ ކޮންޓްރޯލް ހޯދުމަށް ތެހެރާނާއި ވޮޝިންޓަނުން ވަކިވަކިން މަސައްކަތްކޮށް، އެ ސަރަހައްދު ބަންދުކުރުމާ ގުޅިގެން، ހަނގުރާމަ ފެށުނު ފަހުން އެ ކަނޑުއޮޅިން ކުރާ ގިނަ ދަތުރުފަތުރުތައް ވަނީ ހުއްޓިފަ އެވެ. މީގެ ސަބަބުން ދުނިޔޭގެ ބާޒާރުގައި ހަކަތައިގެ އަގުތައް ވަނީ ވަރަށް ބޮޑަށް އުފުލިފަ އެވެ.
