އިރާނާއެކު މިދިޔަ ޖޫން މަހު ސޮއިކުރި ވަގުތީ އެއްބަސްވުމުގައިވާ ޝަރުތުތަކަށް އެމެރިކާއިން އަމަލުކުރަންދެން ހޮރްމޫޒް ކަނޑުއޮޅި ބަންދުކޮށްފައި ބާއްވާނެ ކަމަށް، އިރާނުގެ އިސް އޮފިޝަލް މުހައްމަދު ބާގިރު ގާލީބާފް ވިދާޅުވެއްޖެ އެވެ.
އިރާނުގެ ދައުލަތުގެ މީޑިއާއިން އަންގާރަ ދުވަހު އާންމުކުރި މި ހަބަރުގައި ގާލީބާފް މިހެން ވިދާޅުވެފައިވަނީ އެ ގައުމުގެ މަޖިލީހުގަ އެވެ.
އިރާނުގެ ބަނދަރުތަކަށް އެމެރިކާއިން އަޅާފައިވާ ހުރަސްތައް ނައްތާލުމާއި، ތެލުގެ މުއާމަލާތްތަކާ ގުޅޭ ދަތިކުރުމުގެ ފިޔަވަޅުތައް އުވާލުމާއި، ހިފަހައްޓާފައިވާ އިރާނުގެ ފައިސާތައް ދޫކޮށްލުމުގެ އިތުރުން، ހުރިހާ ދިމާލަކުން އިރާނަށް ދެމުންދާ އިންޒާރުތަކާއި އަސްކަރީ ހަރަކާތްތައް ހުއްޓާލުން އެ ޝަރުތުތަކުގެ ތެރޭގައި ހިމެނޭ ކަމަށް ގާލީބާފް މަޖިލީހުގައި ވިދާޅުވި އެވެ.
މިދިޔަ ޖޫން މަހުގެ 17 ވަނަ ދުވަހު ދެ ގައުމުގެ ދެމެދުގައި ސޮއިކުރި މި ފަހުމުނާމާ އުވާލަން ޖެހުނީ، ހޮރްމޫޒް ކަނޑުއޮޅީގެ ކޮންޓްރޯލާ ގުޅޭ ގޮތުން އުފެދުނު ހިޔާލުތަފާތުވުންތަކާ ގުޅިގެންނެވެ. ހޮރްމޫޒް ކަނޑުއޮޅިއަކީ ހަނގުރާމަ ފެށުމުގެ ކުރިން ދުނިޔޭގެ ބާޒާރަށް ސަޕްލައިކުރާ ތެލާއި ގުދުރަތީ ގޭހުގެ ފަސްބައިކުޅަ އެއްބައި އުފުލަމުންދިޔަ މުހިންމު މަގަކަށް ވުމުން، މި ސަރަހައްދުގެ ކޮންޓްރޯލަކީ ދެ ގައުމަށް ވެސް ނުހަނު މުހިންމު ކަމެކެވެ.
އެމެރިކާގެ ރައީސް ޑޮނަލްޑް ޓްރަމްޕް ޖުލައި މަހުގެ 7 ވަނަ ދުވަހު އެ އެއްބަސްވުން "ނިމުމަކަށް އަތުވެއްޖެ" ކަމަށް ވިދާޅުވެފައިވާއިރު، އޭގެ ހަފުތާއެއް ފަހުން އިރާނުގެ ފޮރިން މިނިސްޓްރީން ވަނީ އެ އެއްބަސްވުން "މެދުކަނޑާލާފައިވާ" ކަމަށް އިއުލާންކޮށްފަ އެވެ.
އެ ފަހުމުނާމާގެ ދަށުން، އިރާނުގެ ނިއުކްލިއާ ޕްރޮގްރާމް ފަދަ ބޮޑެތި މައްސަލަތައް ހިމެނޭ ގޮތަށް ދާއިމީ އެއްބަސްވުމަކަށް އައުމަށްޓަކައި، އެންމެ ގިނަވެގެން 60 ދުވަހުގެ ތެރޭގައި މަޝްވަރާތައް ނިންމުމަށް އިރާނާއި އެމެރިކާއިން ކުރިން އެއްބަސްވެފައިވެ އެވެ. އަދި ދެ ގައުމުން ބޭނުންވެއްޖެ ނަމަ އެ މުއްދަތު އިތުރުކުރެވޭނެ ކަމަށް ވެސް އެއްބަސްވުމުގައިވެ އެވެ.
މި މައްސަލައަށް ދާއިމީ ހައްލެއް ހޯދުމަށް ކުރަމުންދާ ޑިޕްލޮމެޓިކް މަސައްކަތްތައް ހުއްޓުމަކަށް އައުމާ ގުޅިގެން، އިރާނުން ދެން އަމަލުކުރާނީ ވަރުގަދަ ހަމަލާތަކެއް ދިނުމުގެ ސިޔާސަތަކަށް ކަމަށް، އިރާނުގެ އިސް އޮފިޝަލަކު ހޯމަ ދުވަހު ރޮއިޓާސް ނިއުސް އެޖެންސީއަށް މައުލޫމާތު ދީފައިވެ އެވެ.
