ހަނގުރާމަ ހުއްޓުމަށް އެކަށީގެންވާ "ރަނގަޅު އެއްބަސްވުމަކަށް" އައުމަށް އިރާނުން އޮތީ ތައްޔާރަށް ނޫން ކަމަށް ގަބޫލުކުރައްވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ހުކުރު ދުވަހު ވިދާޅުވެއްޖެ އެވެ.
އިރާނާ ދެކޮޅަށް ބޭނުންކުރެވިދާނެ އަސްކަރީ ފިޔަވަޅުތަކަށް ހުރަސްތަކެއް އެބަހުރިތޯ ނޫސްވެރިން ސުވާލުކުރުމުން، ޓްރަމްޕް ވިދާޅުވީ އެމެރިކާއިން މިހާރު ބަލަމުންދަނީ މަސްރަހު ބަދަލުވަމުންދާ ގޮތް ކަމަށެވެ.
އިރާނުގެ ލީޑަޝިޕް ވައްޓާލުމުގެ މަގުސަދުގައި، ތާރީހުގައި ވެސް ކުރިމަތިނުވާ ފަދަ ހަރުކަށި މާލީ ދަތިކުރުމުގެ ފިޔަވަޅުތަކެއް އެ ގައުމާ ދެކޮޅަށް އަޅާނެ ކަމަށް ވައިޓް ހައުސްއިން ވަނީ އިއުލާންކޮށްފަ އެވެ.
އިރާނަށް އެއްވެސް ބާވަތެއްގެ އެހީތެރިކަމެއް ފޯރުކޮށްދޭ ކޮންމެ ގައުމަކަށް އިގްތިސާދީ ގޮތުން ބޮޑެތި ގެއްލުންތަކެއް ކުރިމަތިވާނެ ކަމުގެ އިންޒާރު ޓްރަމްޕް ދެއްވާފައިވާއިރު، އަޅަން ނިންމާފައިވާ ދަތިކުރުމުގެ ފިޔަވަޅުތަކުގެ ތަފުސީލުތައް އަންނަ ހޯމަ ދުވަހު ހާމަކުރައްވާނެ ކަމަށް އެމެރިކާގެ ޓްރެޝަރީ ސެކްރެޓަރީ ސްކޮޓް ބެސެންޓް ވިދާޅުވި އެވެ.
"ހޯރްމުޒް ކަނޑުއޮޅި ހިމެނޭ މުޅި ސަރަހައްދާއި އެ ސަރަހައްދުގެ އެއްގަމުގެ ސަރަހައްދުތައް ވެސް އޮތީ އަޅުގަނޑުމެންގެ ފުރިހަމަ ކޮންޓްރޯލްގެ ދަށުގައި. އެހެންކަމުން އެ މީހުން (އިރާނުން) އެއްބަސްވުމަކަށް އަންނަން ބޭނުންވި ނަމަވެސް، އަޅުގަނޑު ގަބޫލުކުރާ ގޮތުގައި އެކަށީގެންވާ ރަނގަޅު އެއްބަސްވުމަކަށް އައުމަށް އެ މީހުން އަދި ތައްޔާރެއް ނޫން،" ހުކުރު ދުވަހު ވާހަކަދައްކަވަމުން ޓްރަމްޕް ވިދާޅުވި އެވެ.
ފެބްރުއަރީ 28 ވަނަ ދުވަހު އެމެރިކާ އާއި އިޒްރޭލުން އިރާނަށް ހަމަލާދޭން ފެށުމުގެ ކުރިން، ދުނިޔޭގެ ބާޒާރަށް ސަޕްލައިކުރާ ތެލާއި އެލް.އެން.ޖީ (ލިކުއިފައިޑް ނެޗުރަލް ގޭސް) ގެ ފަސްބައިކުޅަ އެއްބައި އުފުލަމުން ދިޔައީ ހޯރްމުޒް ކަނޑުއޮޅި މެދުވެރިކޮށެވެ.
މި ހަނގުރާމައަށް ހަ މަސް ދުވަސް ފުރެން ކައިރިވެފައިވާއިރު، ތެޔޮ އުފުލާ ޓޭންކަރުތަކަށް ހުރަސް އެޅުމުގެ ގާބިލުކަން އިރާނުގެ މިސައިލް އަދި ޑްރޯން ފައުޖުތަކުގައި އަދިވެސް ހުރުމުގެ ސަބަބުން، އެ ކަނޑުއޮޅި މެދުވެރިކޮށް ހަކަތަ ފޯރުކޮށްދިނުމަށް ވަނީ ބޮޑެތި ހުރަސްތަކެއް ކުރިމަތިވެފަ އެވެ.
ހަނގުރާމައިގެ ކުރީކޮޅު ދިން ހަމަލާތަކުގެ ރައްދުގައި އިރާނުން ވަނީ އިޒްރޭލާއި އެމެރިކާގެ އަސްކަރީ މަރުކަޒުތައް ހުންނަ ގަލްފުގެ ގައުމުތަކަށް ހަމަލާދީފަ އެވެ. އެމެރިކާ އާއި އިޒްރޭލުން އިރާނަށް ދެމުންދާ ހަމަލާތަކާއި، އިޒްރޭލުން ލުބުނާނަށް ދެމުންދާ ހަމަލާތަކުގައި މިހާތަނަށް އެތައް ހާސް ބަޔަކު މަރުވެ، އެތައް މިލިއަން ބަޔަކު ވަނީ ހާލުގައި ޖެހި ގެދޮރު ދޫކޮށް ގޮސްފަ އެވެ.
