ޖިންސީ ފުރައްސާރަ އާއި އިންސާނީ ވަގުފާރީގެ ކުށް ސާބިތުވެފައިވާ ގިލެއިން މެކްސްވެލްގެ ހުކުމް ބާތިލްކުރުމަށް އޭނާ ހުށަހެޅި އެންމެ ފަހުގެ ހުށަހެޅުން އެމެރިކާގެ ފަނޑިޔާރަކު ބޭރުކޮށްލައިފި އެވެ.
އުމުރުން 64 އަހަރުގެ މެކްސްވެލް މިހާރު ގެންދަނީ 20 އަހަރުގެ ޖަލު ހުކުމެއް ތަންފީޒު ކުރަމުންނެވެ. އޭނާގެ މައްޗަށް މި ހުކުމް އައީ، މަރުވެފައިވާ ޖިންސީ ކުށްވެރިޔާ ޖެފްރީ އެޕްސްޓީންއަށް އަންހެން ކުދިން ހޯދައިދިނުމުގައި އަދާކުރި ދައުރާ ގުޅިގެން 2021 ވަނަ އަހަރުގެ ޑިސެމްބަރު މަހު ކުށް ސާބިތުވުމުންނެވެ.
މެކްސްވެލް ވަނީ އޭނާގެ މައްޗަށް ސާބިތުވި ފަސް ޖިނާއީ ކުށުގެ ހުކުމް އިސްތިއުނާފުކޮށް، އޭނާގެ ދުސްތޫރީ ހައްގުތަކަށް އެކި ގޮތްގޮތުން އުނިކަން ލިބިފައިވާ ކަމަށް ބުނެފަ އެވެ.
ނަމަވެސް ނިއުޔޯކްގެ ފަނޑިޔާރު ވަނީ އެ އިސްތިއުނާފު އެއްކޮށް ބޭރުކޮށްލައްވާފަ އެވެ. އަދި އެއީ ވަރަށް ދިގު، އެއްވެސް ތަރުތީބެއް ނެތް ހުށަހެޅުމެއްގެ ގޮތުގައި ފަނޑިޔާރު ސިފަކުރެއްވި އެވެ.
މެކްސްވެލް ބުނެފައިވަނީ، މި އަހަރުގެ ކުރީކޮޅު އެމެރިކާގެ ޖަސްޓިސް ޑިޕާޓްމަންޓުން އާންމުކުރި އެޕްސްޓީންއާ ގުޅޭ ލިޔެކިޔުންތަކުން، އޭނާގެ މައްޗަށް ކުށް ސާބިތުވީ ނުބައިކޮށްކަން ހާމަވާ ކަމަށެވެ.
އެހެންނަމަވެސް ފަނޑިޔާރު ނިންމެވީ، އެ ލިޔެކިޔުންތަކުން އޭނާ ކުށުން ބަރީއަވުމުގެ ބަދަލުގައި، އޭނާގެ ކުށްވެރިކަން އިތުރަށް ހާމަވާ ކަމަށާއި، ކުރިން ކުރި ހުކުމަކީ ރަނގަޅު ހުކުމެއްކަން އެ ލިޔުންތަކުން ކަށަވަރުވާ ކަމަށެވެ.
ފަނޑިޔާރު އިތުރަށް ވިދާޅުވީ، މެކްސްވެލްގެ އިސްތިއުނާފަކީ އެއްވެސް އަމާޒެއް ނެތް ކަމެއް ކަމަށެވެ. އަދި އޭނާ ހުށަހެޅި ގިނަ ކަންކަމަކީ އިޖުރާއީ ގޮތުން ބަލައިގަނެވޭނެ ކަންކަން ނޫން ކަމަށާއި، ޝަރީއަތަށް ހުށަހެޅުނު ގިނަ ހެކިތަކުން އޭނާގެ ކުށް ކަށަވަރުވާ ކަމަށް ފަނޑިޔާރު ވިދާޅުވި އެވެ. މީގެ އިތުރުން މެކްސްވެލްގެ ހުށަހެޅުމަކީ އެއްވެސް އަސާސެއް ނެތް، ހީތަކާއި ހަގީގަތް އޮޅުވާލުމުގެ މައްޗަށް ބިނާވެފައިވާ ކަންކަން ކަމަށްވެސް ފަނޑިޔާރު ފާހަގަކުރެއްވި އެވެ.
ޝަރީއަތުގެ ނަތީޖާއަށް ބަދަލެއް އަތުވެދާނެ ފަދަ އެއްވެސް ހަގީގީ ހެއްކެއް މެކްސްވެލްއަށް ހުށަހެޅިފައި ނުވާ ކަމަށްވެސް ފަނޑިޔާރު ވިދާޅުވި އެވެ.
މި އަހަރުގެ ފެބްރުއަރީ މަހު އެމެރިކާގެ ހައުސް އޯވަސައިޓް ކޮމިޓީގެ ކުރިމައްޗަށް ވީޑިއޯ ކޮންފަރެންސް މެދުވެރިކޮށް މެކްސްވެލް ހާޒިރުކުރެވުނެވެ. ނަމަވެސް، ގާނޫނުއަސާސީގެ ފަސްވަނަ އިސްލާހުގެ ދަށުން ލިބިދޭ ހަނުހުރުމުގެ ހައްގުގެ ބޭނުން ހިފައި، އޭނާ ވަނީ ސުވާލުތަކަށް ޖަވާބު ދިނުމަށް އިންކާރުކޮށްފަ އެވެ.
