އެޕްސްޓީންގެ ޖިންސީ ގޯނާގެ މައްސަލަތައް ތަހުގީގުކުރުމަށް ބޭނުންވާ ލިޔެކިޔުންތައް ފޯރުކޮށްނުދީ، އެމެރިކާގެ ޖަސްޓިސް ޑިޕާޓްމަންޓުން އެކަމަށް ހުރަސްއަޅަމުންދާ ކަމަށް ނިއު މެކްސިކޯގެ އެޓާނީ ޖެނެރަލް ރައުލް ޓޮރޭޒް ތުހުމަތުކުރައްވައިފި އެވެ.
މިދިޔަ ބުރާސްފަތި ދުވަހު އާންމުކުރި ސިޓީއެއްގައި ޓޮރޭޒް ވިދާޅުވީ، އެޕްސްޓީން ހިންގާފައިވާ ޖިންސީ ގޯނާގެ މައްސަލަތައް ބެލުމަށް އެ ސްޓޭޓުން ކުރަމުންދާ މަސައްކަތްތަކަށް ފެޑެރަލް ސަރުކާރުން އެއްބާރުލުން ނުދޭ ކަމަށެވެ.
ޖޫން މަހުގެ 30 ވަނަ ދުވަހު ފޮނުއްވި މި ސިޓީގައި ޓޮރޭޒް ފާހަގަކުރެއްވި ގޮތުގައި، ފެބްރުއަރީ މަހުން ފެށިގެން އެކި ފަހަރު މަތިން އެދިފައިވާ ލިޔެކިޔުންތައް ޖަސްޓިސް ޑިޕާޓްމަންޓުން ފޯރުކޮށްދީފައެއް ނުވެއެވެ. އަނގަބަހުން އެއްބާރުލުން ދޭނެ ކަމުގެ ޔަގީންކަން ދިން ނަމަވެސް، 130 އަށްވުރެ ގިނަ ދުވަސް ވެގެންދިޔައިރުވެސް އެދެވޭ ޖަވާބެއް ލިބިފައިނުވާ ކަމަށް އޭނާ ވިދާޅުވިއެވެ. މިއީ އެއްވެސް ހަމައަކުން ބަލާއިރު ގަބޫލުކުރެވޭނެ ލަސްވުމެއް ނޫން ކަމަށްވެސް އެޓާނީ ޖެނެރަލް ވިދާޅުވިއެވެ.
ނިއު މެކްސިކޯއިން އެޕްސްޓީންގެ މައްސަލަ އަލުން ބަލަން ފެށީ، ފެޑެރަލް ސަރުކާރުން އެޕްސްޓީންއާ ގުޅޭ މިލިއަނަކަށްވުރެ ގިނަ ފައިލްތައް އާންމުކުރުމާ ގުޅިގެންނެވެ. މީގެ ތެރޭގައި 1993 ވަނަ އަހަރުން ފެށިގެން އެޕްސްޓީންގެ މިލްކިއްޔާތުގައި އޮތް "ޒޯރޯ ރޭންޗް" ގައި ހިންގާފައިވާ ކަންކަމާ ގުޅޭ މުހިންމު މައުލޫމާތުތައް ހިމެނެއެވެ. އެ ރޭންޗުގައި އިންސާނީ ވަގުފާރި ހިންގާފައިވާ ކަމުގެ ތުހުމަތުތައް ކުރެވުނު ނަމަވެސް، އެކަން މީގެ ކުރިން ފުރިހަމައަށް ތަހުގީގު ކުރެވިފައެއް ނުވެއެވެ.
މީގެ ކުރިން 2019 ވަނަ އަހަރުވެސް ނިއު މެކްސިކޯއިން މި މައްސަލަ ބަލަން މަސައްކަތް ކުރިއެވެ. ނަމަވެސް ފެޑެރަލް ޕްރޮސިކިއުޓަރުންގެ ތަހުގީގަށް ފުރުސަތު ދިނުމުގެ ގޮތުން އެ މަސައްކަތް އޭރު މަޑުޖައްސާލަން ޖެހުނެވެ.
ޓޮރޭޒް ވިދާޅުވާ ގޮތުގައި، އޭރު މެދުކަނޑާލި ތަހުގީގު ކުރިއަށް ގެންދިއުމަށް ބޭނުންވާ މުހިންމު ހެކިތައް މިހާރު ހުރީ ޖަސްޓިސް ޑިޕާޓްމަންޓުގެ އަތުގައެވެ. އެ ލިޔެކިޔުންތައް ނުލިބި ލަސްވާ ކޮންމެ ދުވަހަކީ ހެކިތައް ގެއްލި، ހެކިބަސް ދޭނެ މީހުން ހޯދަން އުނދަގޫވާނެ ދުވަހެއް ކަމަށް އޭނާ އިންޒާރު ދެއްވިއެވެ.
މި މައްސަލައިގައި ރައީސް ޑޮނަލްޑް ޓްރަމްޕްގެ ސަރުކާރަށްވެސް ބޮޑެތި ފާޑުކިޔުންތަކެއް ވަނީ އަމާޒުވެފައެވެ. އެޕްސްޓީންއާ ގާތް ގުޅުމެއް އޮތް ޓްރަމްޕް، އެޕްސްޓީންގެ ފައިލްތައް ހާމަކުރުމަށް ފަސްޖެހެނީ އަމިއްލަ މަސްލަހަތެއް އޮތުމުން ކަމަށް ބައެއް ފަރާތްތަކުން ތުހުމަތު ކުރެއެވެ. ނަމަވެސް ޓްރަމްޕް ވަނީ އެޕްސްޓީންގެ ޖިނާއީ އަމަލުތަކާ އެއްވެސް ގުޅުމެއް ނެތް ކަމަށް ވިދާޅުވެފައެވެ. ޓްރަމްޕް ފަހުން ވަނީ އެޕްސްޓީންގެ ފައިލްތައް ހާމަކުރުމުގެ ގާނޫނުގައި ސޮއިކުރައްވާފައެވެ. އެހެންނަމަވެސް، އާންމުކުރި ގިނަ ލިޔެކިޔުންތަކުގައި މުހިންމު ބައިތައް ފޮރުވާފައި ހުރުމުން ގާނޫނު ހަދާ މަޖިލީހުގެ މެންބަރުން ވަނީ ކަންބޮޑުވުން ފާޅުކުރައްވާފައެވެ.
ޖަސްޓިސް ޑިޕާޓްމަންޓުން މި ތުހުމަތުތައް ދޮގުކުރެއެވެ. އެ އިދާރާއިން ބުނެފައިވަނީ ނިއު މެކްސިކޯގެ ތަހުގީގަށް އެހީތެރިވުމަށް ތައްޔާރަށް އޮތް ކަމަށެވެ. އެޕްސްޓީންގެ މައްސަލައިގައި ނިއު މެކްސިކޯއިން ވަނީ "ޓްރުތް ކޮމިޝަން" އެއް އުފައްދާފައެވެ. މި ކޮމިޝަނުގެ ރިޕޯޓު މިއަހަރުގެ ނިޔަލަށް ނެރުމަށް ވަނީ ހަމަޖެހިފައެވެ. ޖެފްރީ އެޕްސްޓީން 2019 ވަނަ އަހަރު ޖަލުގައި މަރުވިއިރު، އޭނާގެ މައްޗަށް ދިޔައީ އިންސާނީ ވަގުފާރީގެ ބޮޑެތި ތަހުގީގުތަކެއް ހިންގަމުންނެވެ.
