މި އަންނަ ބުރާސްފަތި ދުވަހުގެ ރޭ ސޯޝަލް ސެންޓަަރުގައި ބޭއްވުމަށް ތާވަލުކޮށްފައިވާ އޮސްޓްރޭލިއާގެ ބޭންޑު "ބިޔޯން އަގެއިން" ގެ ޝޯ ބާއްވަން ސޯޝަލް ސެންޓަރު ނުދިނީ އެފަދަ ޝޯއެއް ބާއްވަން އެތަން އެކަށީގެން ނުވާތީ ކަމަށް ޔޫތު މިނިސްޓްރީން މިއަދު ބުނެފި އެވެ.
ޔޫތު މިނިސްޓްރީގެ ސްޓޭޓް މިނިސްޓަރު އަބްދުލް ރައްޒާގު އިބްރާހިމް އަދަދު އަށް ވިދާޅުވީ ޝޯ ބާއްވަން ސޯޝަލް ސެންޓަރު ނުދޭން ނިންމީ އެފަދަ ޝޯއެއް ބޭއްވުމަށް އެތަން އެކަށީގެން ނުވާތީ އާއި އެކި ކަހަލަ މައްސަލަތައް ތަނުގެ ތެރޭގައި ހުރުމުން އެކަންކަން ހައްލުކުރަން މަރާމާތުތަކެއް ކުރުމަށް ބޭނުންވާތީ ކަމަށެވެ.
"އެބޭފުޅުންނަށް ޝޯ ބާއްވަންވެގެން ހުއްދަ ދީފައި އޮއްވާ ދެން މިވީ ގޮތަކީ ޖެހިޖެހިގެން އެތައް ބައިވަރު އިވެންޓްތަކެއް އެއްފަހަރާ މިދިޔައީ. ކުޅިވަރު މުބާރާތްތަކާއި ދެން ގައުމީ ދުވަހުގެ ހަފްލާ އާއި މި ހުރިހާ ކަންތައްތަކެއް ދިޔައީ. ދިޔައިރުގައި މިވީ ގޮތަކީ ކުއްލިއަކަށް ތަނުގެ ތެރޭގައި ޓެކްނިކަލް އިޝޫސްތަކެއް ހުރެގެން އިލެކްޓްރިކް މައްސަލަތަކެއް ވެސް އެބައުޅޭ،" ރައްޒާގު ވިދާޅުވި އެވެ.
ރައްޒާގް ވިދާޅުވީ ސޯޝަލް ސެންޓަރުގައި އެއާކޯންގެ މައްސަލަތައް ވެސް ދިމާވެފައިވާ ކަމަށާއި ޝޯ އިންތިޒާމުކުރާ މީހުންނާ ވާހަކަދައްކައިގެން އެފަދަ އެހެން ތަނެއް ގްރޭޓާ މާލެ ސަރަހައްދުން ހޯދައި ދިނުމަށް މަސައްކަތް ކުރަމުންދާ ކަމަށެވެ.
"އެއާކޯން މައްސަލަތަކެއް ވެސް އެބަ އުޅޭ. ދެން ޕްލަސް އެކަހަލަ މައްސަލަތަކެއް ހުރެގެން އެފަދަ ޝޯއެއް ބޭއްވުމަށްޓަކައި ތަން އެކަށީގެންނުވާތީ އެބޭފުޅުންނާ އަޅުގަނޑުމެން މަޝްވަރާވެސް. އެބޭފުޅުންނާ މަޝްވަރާކޮށްގެން އެހެން އޮޕްޝަންތަކެއް ހޯދޭތޯވެސް މަސައްކަތްކުރިން،" ރައްޒާގު ވިދާޅުވި އެވެ.
އުބާ އިވެންޓްސްގެ ފަރާތުން ބާއްވާ މި ޝޯއަށް ސްޕޮންސަރުން ހޯދައި ވަރަށް ބޮޑަށް އިޝްތިހާރު ކުރަމުން ދަނިކޮށް ޝޯ ނުބޭއްވޭނެކަން އެންގީ އިއްޔެގަ އެވެ. ޝޯ ކެންސަލް ކުރަން އެންގިއިރު ޓިކެޓުތައް ވެސް ވިކިފައިވާކަމަށް ވަނީ މައުލޫމާތު ލިބިފަ އެވެ.
"ބިޔޯން އަގެއިން" ގެ ކުރިން އޯޕެނިން އެކްޓުތަކުގެ ގޮތުގައި ދިވެހި އާޓިސްޓުންގެ ހުށަހެޅުންތަކެއް ވެސް ކުރިއަށްގެންދަން އޮތީ ނިންމާފަ އެވެ. ޝޯ ބޭއްވުމަށްޓަކައި ސޯޝަލް ސެންޓަރުގައި ސްޓޭޖު އަޅައި ފަހުގެ ތައްޔާރީތައް ދިޔައީ ވަމުންނެވެ.
"ބިޔޯން އަގެއިން" ބޭންޑަކީ 1970 ގެ އަހަރުތަކުގެ ތެރޭ މަޝްހޫރުވި ސްވިޑެންގެ "އެބާ" ބޭންޑުގެ ލަވަތައް ކަވަރުކުރާ ޓްރިބިއުޓް ބޭންޑެކެވެ. އެ ބޭންޑުން ވަނީ ފާއިތުވި އަހަރުތަކުގައި ދުނިޔޭގެ 72 ގައުމެއްގައި 5،300 އަށްވުރެ ގިނަ ޝޯ ދީފަ އެވެ.
