މަޝްހޫރު މިއުޒިކް ބޭންޑް "އެލްއެމްއެފްއޭއޯ" އިން 2011 ވަނަ އަހަރު ނެރުނު ހިޓް ލަވަ "ޕާޓީ ރޮކް އެންތަމް" އިން މަގުބޫލުކަން ހޯދި އިނގިރޭސި ލަވަކިޔުންތެރިޔާ ލޯރެން ބެނެޓް، އުމުރުން 37 އަހަރުގައި މަރުވެއްޖެ އެވެ.
ލޯރެން މަރުވިކަން ހާމަކޮށްފައިވަނީ އޭނާ ކުރިން މަސައްކަތް ކުރި މިއުޒިކް ގްރޫޕް "ޖީއާރްއެލް" ގެ ރަސްމީ އިންސްޓަގްރާމް އެކައުންޓުން ހޯމަ ދުވަހު އާންމުކުރި ބަޔާނެއްގަ އެވެ.
ލޯރެން މަރުވާން ދިމާވި ސަބަބެއް އެ ބަޔާނުގައި ހާމަކޮށްފައެއް ނުވެ އެވެ. އަދި މިކަމާ ގުޅޭ ގޮތުން ލޯރެންގެ މަންދޫބުން ވެސް ވަކި އެއްޗެއް ބުނެފައެއް ނުވެ އެވެ.
"ޕާޓީ ރޮކް އެންތަމް" އަކީ 2011 ވަނަ އަހަރު ބިލްބޯޑް ހޮޓް 100 ޗާޓުގެ އެއްވަނައިގައި ވިދިވިދިގެން ހަ ހަފުތާ ވަންދެން އޮތް ލަވަ އެކެވެ. ބިލްބޯޑުން ވަނީ މި ލަވައަކީ މިހާތަނަށް ދުނިޔޭގައި ނެރުނު ފަސްވަނައަށް އެންމެ ކާމިޔާބު ލަވަ ކަމަށް ކަނޑައަޅާފަ އެވެ.
ޔޫޓިއުބްގައި 2.5 ބިލިއަނަށް ވުރެ ގިނަ ވިއުސް ލިބިފައިވާ މި ލަވައިގެ މިއުޒިކް ވީޑިއޯއިން ވެސް "އެލްއެމްއެފްއޭއޯ" ގެ މެންބަރުންނާއެކު ލޯރެން ފެނިގެންދެ އެވެ.
ލޯރެން 2014 ވަނަ އަހަރު ޕޮޕް ގްރޫޕް ޖީއާރްއެލްއާ ގުޅުނީ "ދަ ޕުސީކެޓް ޑޯލްސް" ބޭންޑު އަލުން އުފެއްދުމުގެ ގޮތުންނެވެ. މި ގްރޫޕުގައި އޭނާއާއެކު ޕައުލާ ވަން އޮޕެން، ނަޓާޝާ ސްލޭޓަން، ސިމޯން ބެޓްލް އަދި އެމަލިން އެސްޓްރާޑާ ހިމެނެ އެވެ.
މި ގްރޫޕުގެ އެންމެ މަގުބޫލު ލަވައަކީ 2014 ވަނަ އަހަރު ނެރުނު "އަގްލީ ހާޓް" އެވެ. މީގެ އިތުރުން އެ އަހަރު ނެރުނު ޕިޓްބުލްގެ "ވައިލްޑް ވައިލްޑް ލަވް" ގައި ވެސް މި ގްރޫޕުން ބައިވެރިވެފައިވެ އެވެ.
"ޖީއާރްއެލް" ގްރޫޕް ރޫޅާލާފައިވަނީ 2015 ވަނަ އަހަރު އެ ގްރޫޕުގެ މެންބަރު ސިމޯން ބެޓްލް އަމިއްލައަށް މަރުވުމާ ގުޅިގެންނެވެ.
މީގެ އިތުރުން ލޯރެން ވަނީ "ޑޭޓް ނައިޓް" އަދި "21 ޖަމްޕް ސްޓްރީޓް" ފަދަ ފިލްމުތަކުގެ ސައުންޑްޓްރެކްތަކަށް ވެސް ލަވަ ކިޔައިދީފަ އެވެ.
