ސިޑްސް ގްލޯބަލް ބިޒްނަސް ނެޓްވޯކް (ޖީބީއެން) ފޯރަމް ރާއްޖޭގައި އިއްޔެ ފަށައިފި އެވެ.
ސިޑްސް ގްލޯބަލް ބިޒްނަސް ނެޓްވޯކް ފޯރަމްގެ އިފްތިތާހީ ރަސްމިއްޔާތު ރޭ ބާއްވާފައިވާއިރު، އެ ރަސްމިއްޔާތުގައި ސިޑްސް ތަމްސީލުކުރައްވާ ވަޒީރުންނާއި، ސަރުކާރުތަކުގެ އިސް އޮފިޝަލުންނާއި، ޑިޕްލޮމެޓުން އަދި ރާއްޖޭގެ ވަޒީރުންގެ މަޖިލީހުގެ މެންބަރުން ބައިވެރިވެވަޑައިގެންނެވި އެވެ.
ކޮންމެ ދެ އަހަރަކުން އެއް އަހަރަކު ތަރައްގީވަމުން އަންނަ ކުދި ޖަޒީރާ ގައުމެއްގައި ބާއްވާ މި ފޯރަމްގެ ތެރެއިން އެ ގައުމުތަކުގައި ވިޔަފާރި އާއި އިގްތިސާދު ކުރިއެރުވުމަށް ހުރި ގޮންޖެހުންތަކުން އަރައިގަތުމާއި އިންވެސްޓްމަންޓްތަކާ ގުޅޭގޮތުންވެސް މަޝްވަރާތައް ކުރުމަށް ވަނީ ހަމަޖެހިފަ އެވެ.
ރަސްމިއްޔާތުގައި މުހައްމަދު މުއިއްޒު ވަނީ ޖަޒީރާތަކުގެ އުންމީދީ ހިޔާލުތައް، ވިޔަފާރިތަކާއި، މާލީ އެހީތެރިކަމާއި، ފަންނިއްޔާތާއި، ބައިވެރިންނާއި ބާޒާރުތަކާ ގުޅުވައިދޭ މަރުކަޒީ މަންސައެއްގެ ގޮތުގައި ޖީބީއެން ތަރައްގީކުރުމަށް، ޔޫއެން އޮފިސް އޮފް ދަ ހައި ރެޕްރެޒެންޓެޓިވް ފޯ ދަ ލީސްޓް ޑިވެލޮޕްޑް ކަންޓްރީސް، ލޭންޑްލޮކްޑް ޑިވެލޮޕިން ކަންޓްރީސް އެންޑް ސްމޯލް އައިލެންޑް ސްޓޭޓްސް އަށް ގޮވާލައްވާފަ އެވެ.
ކުދި ޖަޒީރާ ގައުމުތަކުގެ ކުޑަކަމަކީވެސް، އެއިން ފައިދާ ހޯދޭނޭ ކަމަކަށް ހެދިދާނޭކަން މުއިއްޒު ފާހަގަކުރެއްވި އެވެ. އެގޮތުން އެފަދަ ގައުމުތައް، ފަންނިއްޔާތާއި، ހައްލުތަކާއި، ޚިޔާލުތަކާއި، އީޖާދުތައް ތަހުލީލުކުރާ ލެބޯޓަރީތަކަކަށް ހެދިދާނޭކަމަށް އެމަނިކުފާނު ވިދާޅުވި އެވެ.
ފޯރަމްގައި ފަސް ޕެނަލްއަކާއި، ކުދި އަދި މެދުފަންތީގެ ވިޔަފާރިތަކުގެ މާކެޓްޕްލޭސްއަކާއި، އިންވެސްޓްމަންޓު ޝޯކޭސްތަކެއްގެ އިތުރުން ނެޓްވޯކިން ފުރުސަތުތައް ފަހިވެގެންދާނެ އެވެ.
މި އަހަރުގެ ފޯރަމްގައި 30 އަށްވުރެ ގިނަ ގައުމުތަކުން ވިޔަފާރިތަކާއި، ޖަމިއްޔާތަކާއި، އިންވެސްޓަރުން ހިމެނޭގޮތަށް 200 އަށްވުރެ ގިނަ މީހުން ދަނީ ބައިވެރިވަމުންނެވެ.
