ރާއްޖޭގައި ބާއްވާ އެންމެ ބޮޑު ފުޓްސަލް މުބާރާތް، ގޯލްޑަން ފުޓްސަލް އެސޯސިއޭޝަން (ޖީއެފްއޭ) އިން އިންތިޒާމްކުރާ، ގޯލްޑަން ފުޓްސަލް ޗެލެންޖު އަންނަ އަހަރު މާޗު މަހު 27 ވަނަ ދުވަހު ފަށަން ތާވަލުކޮށް، މުބާރާތުގައި ބައިވެރިވުމުގެ ފުރުސަތު ހުޅުވާލައިފި އެވެ.
ޖީއެފްއޭ އިން ގޯލްޑަން ފުޓްސަލް ޗެލެންޖު އެންމެ ފުރަތަމަ ބޭއްވީ 2015 ވަނަ އަހަރު އެވެ. މާފަންނު ވެލި ދަނޑުގައި ފެށި މުބާރާތް ފަހުން ކުރިއަށްގެންދިޔައީ، ހުޅުމާލެ ރެހެންދި ފުޓްސަލް ދަނޑުތަކުގަ އެވެ. ކޮވިޑް-19 އާ ހެދި އައި މެދުކެނޑުމާ އެކު ވެސް، މިހާތަނަށް ގޯލްޑަން ފުޓްސަލް ޗެލެންޖުގެ 10 މުބާރާތެއް ވަނީ ބާއްވައިފަ އެވެ.
ފާއިތުވި އަހަރުތަކަށް ބަލާއިރު، ކޮންމެ އަހަރަކު ވެސް 100 އަށް ވުރެން ގިނަ ރަށުން މުބާރާތުގައި ބައިވެރިވެ އެވެ. އެއާ އެކު، މިއީ މުޅި ރާއްޖެ އަށް ބަލާއިރު، އެންމެ ތަރުހީބު ބޮޑު ކުޅިވަރު ހަރަކާތެވެ.
އަންނަ އަހަރުގެ މާޗްގައި ބާއްވާ މުބާރާތުގައި ބައިވެރިވުމުގެ ފުރުސަތު ހުޅުވާލާފައިވާއިރު، މި ކަން ކުރިއަށްދާނީ ތިން ފޭސް އަކަށް ބަހާލައިގެންނެވެ. ފުރަތަމަ ފުރުސަތު ލިބޭނީ، ކައުންސިލް ތަކަށެވެ. އެ މުއްދަތު އޮތީ އަންނަ މަހުގެ 18 ވަނަ ދުވަހުގެ ނިޔަލަށެެވެ. އޭގެ ފަހުން، ކައުންސިލުން ބައިވެރިނުވާ ރަށްތަކަށް ފުރުސަތު ލިބޭނީ އެންމެ ފަހުން މުބާރާތުގައި ވާދަކުރި މެނޭޖްމަންޓަށެވެ. އަދި، އެ އަށް ފަހު ވެސް ބައިވެރިނުވާ ރަށްތަކަށް ފުރުސަތު އޮންނާނީ މުޅިން އާ މެނޭޖްމަންޓަކާ އެކު މުބާރާތުގައި ވާދަކުރުމަށެެވެ.
މިދިޔަ އަހަރު ގޯލްޑަން ފުޓްސަލް ޗެލެންޖަކީ ތާރީހީ މުބާރާތެކެވެ. އެ ގޮތުން، އެ މުބާރާތަކީ، މުޅި ރާއްޖެ އަށް ހުޅުވާލައިގެން ބާއްވާ ފުޓްސަލް މުބާރާތެއްގައި، ފުރަތަމަ ފަަހަރަށް ވީޑިއޯ ސަޕޯޓް (ވީއެސް) ބޭނުންކުރި ފަހަރަށެެވެ.
ގޯލްޑަން ފުޓްސަލް އެސޯސިއޭޝަންގެ ރައީސް، ރިލުވާން މޫސާ ވަނީ ކުރިއަށް އޮތް 2027 ވަނަ އަހަރުގެ މުބާރާތް އިތުރަށް ފުރިހަމަ ކުރުމަށްޓަކައި ދުރާލާ މަސައްކަަތް ފަށާފައިވާ ކަމަށް ވިދާޅުވެފަ އެެވެ.
ގޯލްޑަން ފުޓްސަލް އެސޯސިއޭޝަނުން ދާދި ފަހުން ވަނީ، ކުޅިވަރާ ބެހޭ ވަޒީރު، އަބްދުﷲ ރާފިއު (ރާއްޕެ)އާ ބައްދަލުކުރައްވައިފަ އެވެ. އަދި، މި މުބާރާތާ ގުޅޭގޮތުން، ގިނަ މަޝްވަރާތަކެއް ކުރެވުނުއިރު، ގޯލްޑަން އިން ވަނީ ރާއްޖޭގެ ކުޅިވަރު ކުރިއެރުވުމަށްޓަކައި، މިނިސްޓަރު ރާފިއުގެ ލީޑަޝިޕުން ކުރައްވަމުން އަންނަ މަސައްކަތަށް ޝުކުރު އަދާކޮށްފަ އެެވެ.
މި އަހަރުގެ ގޯލްޑަން ފުޓްސަލް ޗެލެންޖުގެ ޗެމްޕިއަންކަން ހޯދީ، ހދ. ނައިވާދޫ އެވެ. އެއީ، ފައިނަލުގައި، 9-3 އިން ގއ. ދެއްވަދޫ ބަލިކޮށްފަ އެވެ. މީގެ ކުރިން މި މުބާރާތުގެ ތަށި ހޯދާފައިވަނީ، ތ. ތިމަރަފުށި ތިން ފަހަރުގެ އިތުރުން، ލ. ގަން، ބ. އޭދަފުށި، ބ. ހިތާދޫ، މާފަންނު، ހެންވޭރު އަދި ކ. ކާށިދޫ އެވެ.
