ދިވެހިރާއްޖޭގެ ބޭރު ފައިސާގެ ބާޒާރުގައި ޔޫއެސް ޑޮލަރަށް ހާއްސަ އިސްކަމެއް ދެވިފައިވެ އެވެ. އެހެން ގައުމުތަކުގެ ފައިސާތަކާ ހިލާފަށް، ޑޮލަރު މާރުކުރުމުގެ މުއާމަލާތްތައް ހިންގަންޖެހެނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކަނޑައަޅާފައިވާ ރަސްމީ ރޭޓުގަ އެވެ. މިގޮތުން، މިހާރު އެމްއެމްއޭ އިން ކަނޑައަޅާފައިވާ މެދުމިން (މިޑް އެކްސްޗޭންޖް) ރޭޓަކީ 12.85 ރުފިޔާ އެވެ. އަދި މި ރޭޓަށް ހުއްދަކުރެވިފައިވާ 20 އިންސައްތައިގެ ފްލަކްޗުއޭޝަން ބޭންޑާއެކު، ޑޮލަރެއްގެ އެންމެ މަތީ އަގަކީ 15.42 ރުފިޔާ އެވެ.
ނަމަވެސް، ހަގީގަތުގައި ބާޒާރުގައި ޑޮލަރުގެ މުއާމަލާތްތައް ހިނގަމުންދަނީ މި ރޭޓަށްވުރެ އެތައް ގުނައެއް މަތީ އަގެއް ގައެވެ. ގާނޫނީ ނަޒަރަކުން ބަލާއިރު ފާހަގަކުރަންޖެހޭ މުހިންމު އެއްކަމަކީ، ބޭރު ފައިސާގެ މުއާމަލާތްތަކަކީ އެއްވެސް އުސޫލެއް ނެތި، ނުރަސްމީ ބާޒާރުގެ އޮއިވަރަށް ދޫކޮށްލެވިފައިވާ ކަމެއް ނޫން ކަމެވެ. މިއީ އެމްއެމްއޭ އިން ދޫކުރާ މަނީ-ޗޭންޖިންގ ލައިސަންސެއްގެ ދަށުން، ހަރުދަނާ ގަވާއިދުތަކާ އެއްގޮތްވާ ގޮތުގެމަތިން ހިންގަންޖެހޭ ހާއްސަ މާލީ ހިދުމަތެކެވެ.
މިކަން އޮންނަގޮތް ދެނެގަތުމަށްޓަކައި ކުރަންޖެހެނީ ވަރަށް އާދައިގެ ސާދާ ސުވާލެކެވެ. އެއީ، އެމްއެމްއޭގެ ލައިސަންސް ލިބިފައިވާ މަނީ ޗޭންޖަރަކަށް، ގާނޫނީ އޮނިގަނޑުގެ ތެރެއިން ޑޮލަރު ގަނެވިއްކޭނީ ކޮން ރޭޓެއްގައި ހެއްޔެވެ؟
ރަސްމީ ރޭޓާއި ބާޒާރުގެ ރޭޓާ ދެމެދު އޮތް ފަރަގު ދުވަހެއް ދުވަހަކަށް ބޮޑުވަމުންދާތީ، މިކަމަށް ސާފު ޖަވާބެއް ލިބުމަކީ ނުހަނު ބޭނުންތެރި ކަމެކެވެ. ބާޒާރުގައި ޑޮލަރު ގަނެވިއްކަނީ 20 ރުފިޔާއަށް ނުވަތަ 22 ރުފިޔާއަށްތޯ ބަހުސްކުރުމަށްވުރެ، މާލީ ނިޒާމުގެ ހަރުދަނާކަން ކަށަވަރުކުރުމަށްޓަކައި އުފެދޭ އެންމެ އަސާސީ ސުވާލަކީ، ކަނޑައެޅިފައިވާ ގާނޫނީ އަދި ރެގިއުލޭޓަރީ އޮނިގަނޑުގެ ތެރެއިން ހުއްދަކުރަނީ ކޮން އުސޫލުތަކެއްކަން ސާފުކޮށް އެނގުމެވެ.
އެމްއެމްއޭ ގެ ގާނޫނުގައި ބުނަނީ ކީކޭ ހެއްޔެވެ؟
މޯލްޑިވްސް މަނިޓަރީ އޮތޯރިޓީ ގެ ނަންބަރު 81/6 ގާނޫނުގެ 23 ވަނަ މާއްދާގައި އެމްއެމްއޭއަށް ފޮރިން އެކްސްޗޭންޖް މުއާމަލާތްތައް ރެގިއުލޭޓްކުރުމުގެ ބާރު ފުޅާދާއިރާއެއްގައި ދީފައިވެ އެވެ. އެ ގާނޫނުގެ 23 ވަނަ މާއްދާގެ (2) ގެ ދަށުން ބޭންކުތަކާއި، ހުއްދަ ދެވިފައިވާ އެހެން ފަރާތްތަކުން، ދިވެހިރާއްޖޭގައި ބޭރު ފައިސާ ގަނެ ވިއްކައި އަދި އެތަކެތިން ވިޔަފާރި ކުރެވިދާނެ ރޭޓްތައް ކަނޑައަޅައި އެކަން އާންމުކޮށް އިއުލާނު ކުރެވިދާނެ އެވެ. އަދި 23 ވަނަ މާއްދާގެ (3) ގައި ވަނީ އެމްއެމްއޭ އިން ކަނޑައަޅާ މެދުމިން ރޭޓަކާ ގުޅޭގޮތުން އެއޮތޯރިޓީން ކަނޑައަޅާ ދާއިރާއެއްގެ ތެރޭގައި ބޭރު ފައިސާ ގަނެ ވިއްކުމުގެ ރޭޓް ހަމަޖެއްސިދާނެ ކަމަށެވެ.
ޤާނޫނުގެ 24 ވަނަ މާއްދާ ބިނާވެފައިވަނީ ބޭރު ފައިސާގެ އަގު ކަނޑައެޅުމުގެ ނިޒާމު (އެކްސްޗޭންޖް ރޭޓް ރެޖީމް) ގެ މައްޗަށެވެ. މި ނިޒާމު ހަރުދަނާކަމާއެކު ހިންގުމަށް ބޭނުންވާ ސިޔާސަތުތައް ކަނޑައަޅައި ތަންފީޒުކުރުމުގެ ފުރިހަމަ އިހުތިޔާރާއި މަސްއޫލިއްޔަތު މި މާއްދާގެ ދަށުން އެމްއެމްއޭ އަށް ލިބިދެ އެވެ. މީގެ އިތުރުން، އެކްސްޗޭންޖް ރޭޓް ނިޒާމުގެ ތެރެއިން ވަކި ބޭރު ފައިސާއެއްގެ އަގު ކަނޑައަޅާފައިވާ ހާލަތެއްގައި، އެ ރޭޓަށްވުރެ ތަފާތު އަގެއްގައި އެ ފައިސާއެއް ގަނެވިއްކުމަކީ 24 ވަނަ މާއްދާގެ (ށ) ގެ ދަށުން މަނާކަމެކެވެ. އަދި މި އުސޫލުތަކާ ހިލާފުވާ ފަރާތްތަކަށް ދެވޭނެ އަދަބުތައް 24 ވަނަ މާއްދާގެ (ނ) ގައި ބަޔާންކޮށްފައިވެ އެވެ.
އެހެންކަމުން، ބޭރު ފައިސާގެ މުއާމަލާތްތަކުގައި ބޭނުންކުރާނެ ރޭޓުތައް ކަނޑައެޅުމާއި، އެކްސްޗޭންޖް ރޭޓް ނިޒާމު އެގޮތުގެ މަތިން ތަންފީޒުކުރުމުގެ ގާނޫނީ ބާރު އެމްއެމްއޭ އަށް ފުރިހަމައަށް ލިބިދީފައިވެ އެވެ. މިގޮތުން، މިއީ ހަމައެކަނި ރޭޓުތަކެއް އާންމުކުރުމަށްވުރެ ފުޅާ ބާރެކެވެ.
ނަމަވެސް، ޔޫއެސް ޑޮލަރުގެ އެކްސްޗޭންޖް ރޭޓް ނިޒާމު ދެމެހެއްޓުމަށާއި، ހުއްދަދެވިފައިވާ މަނީ ޗޭންޖަރުންގެ މައްޗަށް ހިނގާ އުސޫލުތައް ތަންފީޒުކުރުމުގައި އެމްއެމްއޭ އިން އެ ބާރުތަކުގެ ބޭނުން ހިފަނީ ކިހިނެއްތޯ، މިއީ އުފެދޭ ބޮޑު ސުވާލެކެވެ.
ޔޫއެސް ޑޮލަރުގެ މުއާމަލާތް ހިންގޭނެގޮތް އެހެން ފައިސާތަކާ ތަފާތު
ފައިސާ މާރުކުރުމުގެ ލައިންސަސް ލިބިފައިވާ ފަރާތްތަކަކީ އިގުތިސާދީ ދައުރެއް އޮންނަ ބަޔެކެވެ. ދަތުރުވެރިންނާއި ވިޔަފާރިވެރިންނަށް ޔޫރޯ، ސްޓާލިން ޕައުންޑް، އިންޑިއަން ރޫޕީ އަދި ސިންގަޕޫރު ޑޮލަރު ފަދަ ވަކި ހާއްސަ އެކްސްޗޭންޖް ރޭޓެއް އެމްއެމްއޭ އިން ކަނޑައަޅާފައި ނުވާ އެހެނިހެން ބޭރު ފައިސާ ވެސް ބޭނުންވެ އެވެ.
"އެމްއެމްއޭ އިން މަނީ ޗޭންޖިންގ ލައިސަންސް ދީފައިވާ ފަރާތްތަކަށް ޑޮލަރު ގަނެވިއްކޭނެ ގާނޫނު ހުއްދަކުރާ ރޭޓަކީ ކޮބައި ހެއްޔެވެ؟"
މިގޮތުން ވަކި ހާއްސަ އެކްސްޗޭންޖް ރޭޓެއް އެމްއެމްއޭ އިން ކަނޑައަޅާފައިވާ ނުވާ ބޭރު ފައިސާ ގަނެވިއްކުމުގައި، ބާޒާރުގެ ހާލަތަށާއި ވިޔަފާރީގެ ފައިދާއަށް ރިއާޔަތްކޮށް، އަމިއްލަ ރޭޓުތައް މަނީ ޗޭންޖަރުންނަށް ކަނޑައެޅިދާނެ އެވެ. އަދި މިގޮތަށް ކަނޑައަޅާ ރޭޓްތައް، ލައިސަންސް ދޫކުރެވިފައިވާ ވިޔަފާރި ހިންގާ ތަނުގައި އާންމުކޮށް ފެންނާނެހެން ބަހައްޓަންޖެހެ އެވެ.
ނަމަވެސް، ޔޫއެސް ޑޮލަރާ މެދު އަމަލުކުރަންޖެހެނީ ތަފާތު އުސޫލަކުންނެވެ. އެއީ ޑޮލަރަކަށްވާ ދިވެހި ރުފިޔާގެ އަގު ކަނޑައެޅިފައިވަނީ ރަސްމީ އެކްސްޗޭންޖް ރޭޓްގެ އޮނިގަނޑުގެ ތެރެއިން ކަމަށްވާތީ އެވެ.
މަނީ ޗޭންގިންގ ވިޔަފާރިއާބެހޭ ގަވާއިދު (2024/R-92) ގެ 37 ވަނަ މާއްދާއަށް ރިއާޔަތްކުރާއިރު މިއީ ނުހަނު މުހިންމު ތަފާތެކެވެ. 37 ވަނަ މާއްދާގެ (ހ) އަދި (ށ) ގައި ބަޔާންކޮށްފައިވާ ގޮތުގެމަތިން، މަނީ ޗޭންޖިންގ ވިޔަފާރި ކުރުމުގެ ހުއްދަ ލިބިފައިވާ ފަރާތްތަކުން، ބޭރު ފައިސާ ގަންނަ އަދި ވިއްކާ ރޭޓުތައް ފަސޭހައިން ފެންނާނެހެން އާންމުކޮށްފައި ބެހެއްޓުމަށް ލާޒިމުކުރެ އެވެ. ނަމަވެސް، 37 ވަނަ މާއްދާގެ (ނ) ގައި މިކަމަށް މުހިންމު އިސްތިސްނާއެއް ކަނޑައަޅާފައިވެއެވެ. މިގޮތުން، މޯލްޑިވްސް މަނިޓަރީ އޮތޯރިޓީގެ ގާނޫނުގެ 24 ވަނަ މާއްދާގެ (ށ) ގެ ދަށުން، ވަކި ބޭރު ފައިސާއެއް ގަނެވިއްކާނެ ރޭޓު އެމްއެމްއޭ އިން ކަނޑައަޅާފައިވާ ނަމަ، އެ އަގު ފިޔަވައި އެހެން އަގެއްގައި އެ ބޭރު ފައިސާއެއް ގަތުމަކީ އަދި ވިއްކުމަކީ މަނާކަމެކެވެ. އަދި އެމްއެމްއޭ ގެ ހުއްދަނެތި، އެފަދަ މުޢާމަލާތަކަށް އިތުރު ކޮމިޝަނެއް ނުވަތަ އެހެން ފީއެއް ނެގުމަކީ ވެސް މަނާކަމެކެވެ.
އެމްއެމްއޭ ގާނޫނުގެ 24 ވަނަ މާއްދާގެ (ނ) ގެ ދަށުން ދެވޭނެ އަދަބުތައް އިސްވެ ދެންނެވި ގަވާއިދުގެ 37 ވަނަ މާއްދާގެ (ރ) ގައި ބަޔާންކޮށްފައިވެއެވެ. މިގޮތުން 10,000 ރުފިޔާއާއި 1 މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރުން، ނުވަތަ އެ މުއާމަލާތުގެ އަގުގެ ފަސްގުނައަށްވުރެ ބޮޑުނޫން އަދަދަކުން ޖޫރިމަނާކުރުން މި އަދަބުތަކުގެ ތެރޭގައި ހިމެނެއެވެ.
ޔޫއެސް ޑޮލަރުގެ ރަސްމީ ރޭޓް ބޭންޑަކީ ކޮބައި؟
އިސްވެ ފާހަގަ ކުރެވުނު ކަންކަމުގެ އަލީގައި ތިރީގައިވާ އެވަނީ އަޅާނުލާ ދޫކޮށްލެވޭ ވަރަށް ވުރެ މުހިންމު ގާނޫނީ ސުވާލެކެވެ.
އެމްއެމްއޭގެ ގާނޫނުގެ 24 ވަނަ މާއްދާގެ (ށ) އަށް ހަވާލާދީ، މަނީ ޗޭންޖިންގ ވިޔަފާރިއާބެހޭ ގަވާއިދުގެ 37 ވަނަ މާއްދާގެ (ނ) ގައި ބަޔާންކޮށްފައިވާ "ވަކި ބޭރު ފައިސާއެއް ގަންނަ އަގާއި ވިއްކާ އަގު އޮތޯރިޓީން ކަނޑައެޅުން" ބެލެވެނީ، ޔޫއެސް ޑޮލަރަށް ކަނޑައަޅާފައިވާ 10.28 އާއި 15.42 ރުފިޔާގެ ރަސްމީ އެކްސްޗޭންޖް ރޭޓް ބޭންޑަށް ނޫންތޯ އެވެ؟
ޖަވާބަކީ އާނއެކޭ ނަމަ، އެމްއެމްއޭ އިން ލައިސަންސް ދީފައިވާ މަނީ ޗޭންޖަރަކަށް، އެ އޮތޯރިޓީން ކަނޑައަޅާފައިވާ ރަސްމީ ބޭންޑުން ބޭރު އަގެއްގައި ޔޫއެސް ޑޮލަރު ގަނެވިއްކުމަކީ ހުއްދަކަމެއް ހެއްޔެވެ؟
އަދި ޖަވާބަކީ ނޫނެކޭ ނަމަ، އާންމުކޮށްފައިވާ އެކްޗޭންޖް ރޭޓް ބޭންޑުގެ ގާނޫނީ ހައިސިއްޔަތަކީ ކޮބައި ހެއްޔެވެ؟ އަދި އެ ބޭންޑުން ހާސިލުކުރެވެނީ ކޮން ބޭނުމެއް ހެއްޔެވެ؟
ކަމާގުޅޭ ގާނޫނާއި ގަވާއިދުތަކުގައި އުސޫލުތައް ކަނޑައަޅާފައިވީ ނަމަވެސް، ލައިސަންސް ލިބިފައިވާ މަނީ ޗޭންޖަރުން ހިންގާ ޔޫއެސް ޑޮލަރުގެ މުއާމަލާތްތަކާ ގުޅިގެން، ގަވާއިދުގެ 37 ވަނަ މާއްދާގެ (ނ) އެމްއެމްއޭ އިން ތަންފީޒު ކުރަމުންދާ ގޮތެއް މާ ރަނގަޅަކަށް ސާފެއް ނުވެއެވެ. ވުމާއެކު، މިކަމާބެހޭ ގޮތުން އެމްއެމްއޭ ގެ ބަހެއް ލިބުމަކީ މުހިންމު ކަމެކެވެ.
ރެގިއުލޭޓަރީ ނިޒާމުގެ އިތުބާރާމެދު އުފެދޭ ސުވާލު
ފިކްސްޑް އެކްސްޗޭންޖް ރޭޓް ނިޒާމެއްގެ ދަށުން ހިނގާ ކޮންމެ މުއާމަލާތެއް، އެއް އަގެއްގައި ހިންގުމަކީ ލާޒިމުކަމެއް ނޫނެވެ. އާންމުގޮތެއްގައި ބޭންކުތަކާއި މަނީ ޗޭންޖަރުން މުއާމަލާތް ކުރަނީ ގަންނަ އަގާއި ވިއްކާ އަގުގެ ދެމެދުގައި ކުޑަ ފަރަގެއް ނުވަތަ ސްޕްރެޑެއް ބާއްވައިގެންނެވެ. ނަމަވެސް، ރަސްމީ ރޭޓާ ގުޅިފައިވާ ވިޔަފާރީގެ މިފަދަ ފަރަގުތަކާއި، ރަސްމީކޮށް ކަނޑައަޅާފައިވާ ބޭންޑުގެ އެންމެ މަތީ އިމަށްވުރެ 40 އިންސައްތައަށްވުރެ ބޮޑުކޮށް އަގު ހުރުމާ ދެމެދު އަސާސީ ބޮޑު ތަފާތެއް ވެއެވެ.
"ކަނޑައަޅާފައިވާ ރަސްމީ ބޭންޑުގެ ބޭރުން ޔޫއެސް ޑޮލަރު ގަނެވިއްކުމަކީ ގާނޫނީ ގޮތުން ހުއްދަ ކަމެއްނަމަ، އެކަން ބިނާވާ އުސޫލުތައް ސާފުކޮށް އެނގެން އޮންނަންވާނެ އެވެ. ނަމަވެސް، އެއީ ހުއްދަ ކަމެއް ނޫންނަމަ، ގާނޫނު ތަންފީޒު ކުރެވޭ ގޮތާމެދު ސުވާލު އުފެދެ އެވެ."
މިކަމާމެދު ވިސްނާއިރު، މިއީ 'އެކްސްޗޭންޖް ރޭޓް އިކޮނިމިކްސް' ގެ އޮނިގަނޑުން ބޭރު، ރެގިއުލޭޓަރީ އިތުބާރާއި، ޤާނޫނީ އިމުގެ ތެރެއިން ކަންކަން ހިނގާކަން ކަށަވަރު ކުރުމާ ގުޅުންހުރި މައްސަލައެކެވެ.
މޯލްޑިވްސް މަނިޓަރީ އޮތޯރިޓީ އަކީ ރާއްޖޭގެ އެކްސްޗޭންޖް ރޭޓް ސިޔާސަތު ކަނޑައަޅައި ތަންފީޒުކުރާ އިދާރާއެވެ. މީގެ އިތުރުން، މަނީ ޗޭންޖިންގ ވިޔަފާރި ހިންގުމުގެ ހުއްދަ ދޫކުރުމާއި، އެފަދަ ވިޔަފާރިތައް ސުޕަވައިޒްކުރުމަކީވެސް އެ އޮތޯރިޓީގެ ޒިންމާއެކެވެ.
ޤާނޫނުން ހުއްދަކުރާ ކަންކަމަކީ ކޮބައިކަން ވިޔަފާރިތަކަށް ސާފުކޮށް އެނގެންޖެހެ އެވެ. ހަމައެއާއެކު، ކަސްޓަމަރުން މުޢާމަލާތްކުރާ ބާޒާރަކީ ޤާނޫނީ ގޮތުން ހުއްދަ ކުރާ ބާޒާރެއްކަން ކަސްޓަމަރުންނަށް ކަށަވަރުވާންޖެހެއެވެ. ކަނޑައެޅިފައިވާ އުސޫލުތައް އެންމެހައި ފަރާތްތަކުގެ މައްޗަށް އެއްހަމައެއްގައި ތަންފީޒު ކުރުމަކީ ރެގިއުލޭޓަރީ އިދާރާތަކުގެ ޒިންމާއެކެވެ. އަދި ޤާނޫނުގައި މަނާކޮށްފައިވާ ކަންކަމާއި، އެކަންކަމަށް ކަނޑައެޅިފައިވާ އަދަބުތައް ފުރިހަމައަށް ތަންފީޒުކުރެވޭކަން ކަށަވަރުކުރުމަކީ ވެސް ރެގިލޭޓަރީ އިދާރާތަކުގެ ޒިންމާއެކެވެ.
ރަސްމީކޮށް ކަނޑައަޅާފައިވާ ޑޮލަރުގެ ރޭޓުގެ އިމުން ބޭރުން މުއާމަލާތްކުރުމަކީ ގާނޫނީ ގޮތުން ހުއްދަ ކަމެއް ނަމަ، އެކަމުގެ ރެގިއުލޭޓަރީ އަސާސުތައް ސާފުކޮށް އެނގެން އޮންނަންވާނެއެވެ. އަދި އެއީ ގާނޫނާ ހިލާފު ކަމެއް ނަމަ، ގާނޫނާއި ގަވާއިދު ތަންފީޒުކުރެވޭ ގޮތާމެދު ސުވާލު އުފެދެއެވެ.
ޑޮލަރުގެ ރަސްމީ ރޭޓަކީ 15.42 ރުފިޔާ ކަމަށް ވީނަމަވެސް، ބާޒާރުގައި ޑޮލަރުގެ އަގު މިހާރު 22 ރުފިޔާއަށް ވުރެ މަތީގައި ހުރުމަކީ އާދައިގެ 'ސްޕްރެޑް' އެއްގެ ގޮތުގައި ބެލެވޭނެ މިންވަރަށް ވުރެ ބޮޑު ތަފާތެކެވެ. މީގެއިތުރުން، މި ރޭޓަކީ ކަނޑައެޅިފައިވާ ރަސްމީ ބޭންޑުގެ އިންތަކުން ވެސް މާބޮޑަށް ބޭރުގައިވާ އަދަދެކެވެ.
އެހެންކަމުން، މި މައްސަލައަކީ ހަމައެކަނި ޑޮލަރުގެ އަގާ ގުޅިފައިވާ ކަމަކަށްވުރެ މާ ފުޅާ ދާއިރާއެއްގެ ކަމެކެވެ. މިއީ ކަމާބެހޭ އިދާރާތަކުގެ ނިޒާމީ އިތުބާރާ ގުޅިފައިވާ، އަދި އެންމެ ފަހުން ގޮސް ގާނޫނުގެ ބާރު ދެމެހެއްޓުމާ ގުޅޭ މުހިންމު މައްސަލައެކެވެ.
ބޭރު ފައިސާގެ ބާޒާރު ހިންގާނެ އުސޫލުތައް ގާނޫނުން ކަނޑައަޅާފައިވާ ހިނދު، އެ އުސޫލުތަކަށް ފުރިހަމައަށް އަމަލުކުރަމުންދާކަން ކަށަވަރުކުރުމުގެ މަސްއޫލިއްޔަތު އަދާކުރަންޖެހޭނީ ކޮން ފަރާތަކުން ހެއްޔެވެ؟
އެޑިޓަރުގެ ނޯޓް
އަހުމަދު މުހައްމަދަކީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ޗެއާމަން އަދި ސީއީއޯގެ މަގާމާއި، އިކޮނޮމިކް މިނިސްޓަރުކަމުގެ އިތުރުން އިންޑިއާއަށް ކަނޑައަޅުއްވާފައި ހުންނެވި ސަފީރުކަން ހިމެނޭހެން، ދައުލަތުގެ އިސް މަގާމުތަކެއް ފުރައްވާފައިވާ ބޭފުޅެކެވެ. އޭނާއަކީ ޕަބްލިކް ޕޮލިސީއާއި، އިގުތިސާދީ ދާއިރާގެ އިތުރުން ގައުމީ ތަރައްގީއާ ގުޅޭގޮތުން ލިޔުއްވާ ފަރާތެކެވެ. މީގެ ތެރެއިންވެސް، ކުދި ގައުމުތަކުގެ މުއައްސަސާތަކާއި ހިންގުމުގެ ނިޒާމުތައް ހަރުދަނާކުރުމަށް އޭނާ ހާއްސަ އިސްކަމެއް ދެއްވަ އެވެ.
