އިރާނު ހަނގުރާމައާ ގުޅިގެން ހަކަތައިގެ އަގު އުފުލި، ތެލުގެ އިމްޕޯޓުތަކަށް ހަރަދުކުރަން ޖެހޭ ފައިސާ ވަރަށް ބޮޑަށް އިތުރުވެފައިވާ ދަނޑިވަޅެއްގައި، ތެޔޮ އިމްޕޯޓަށް ބޭނުންވާ 50 މިލިއަން ޑޮލަރުގެ ލޯނު އެއްބަސްވުމުގައި އޭޝިއަން ޑިވެލޮޕްމަންޓް ބޭންކް (އޭޑީބީ) އާއެކު ދިވެހި ސަރުކާރުން ސޮއިކޮށްފި އެވެ.
މިއަދު ލޯނު އެގްރީމެންޓުަގައި ދިވެހި ސަރުކާރުގެ ފަރާތުން ސޮއިކުރެއްވީ ފިނޭންސް މިނިސްޓަރު ހަސަން ޒަރީރު އެވެ. މިއީ "އެނާޖީ ސެކިއުރިޓީ އެމަޖެންސީސް ޕްރޮޖެކްޓް" ގެ ނަމުގައި ސޮއިކުރި ލޯނެކެވެ. ރާއްޖެއަށް ތެޔޮ އިމްޕޯޓުކުރާ ސަރުކާރުގެ ކުންފުނި ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ ފަރާތުން ޕްރޮޖެކްޓު އެގްރީމެންޓުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު ޝިމާދު އިބްރާހިމް އެވެ.
އެ ދެ އެއްބަސްވުމުގައި އޭޑީބީގެ ފަރާތުން ސޮއިކުރެއްވީ އެ ބޭންކުގެ ހެޑް އޮފް ރީޖަނަލް ކޯޕަރޭޝަން އެންޑް އިންޓެގްރޭޝަން ޔުނިޓް، ޑރ. ތިއަމް ހީ އަންގު އެވެ.
މި ފައިސާ ހަމަޖައްސައިދިނީ ހަނގުރާމައިގެ ސަބަބުން ތެލުގެ އަގު އުފުލި، ޓޫރިސްޓުން މަދުވެ، ތެޔޮ އިމްޕޯޓުކުރަން ބޭނުންވާ ފައިސާ ހޯދުމުގެ ގާބިލުކަން ކުޑަވެފައިވާތީ ކަމަށް މީގެކުރިން އޭޑީބީން ބުނެފައިވެ އެވެ.
އޭޑީބީން 50 މިލިއަން ޑޮލަރު ނެގިއިރު، މީގެ ކުރިން ސަރުކާރުން ވަނީ ހަމަ މި ބޭނުމަށް ވާލްޑް ބޭންކުން 40 މިލިއަން ޑޮލަރު (618 މިލިއަން ރުފިޔާ) ގެ ލޯނެއް ނަގާފަ އެވެ. މިއާ އެކީ މި އަހަރުގެ ތެރޭގައި ތެޔޮ އިމްޕޯޓުކުރަން ހޯދި ޖުމްލަ އަދަދު ވަނީ 90 މިލިއަން ޑޮލަރު (1.3 ބިލިއަން ރުފިޔާ) އަށް އަރާފަ އެވެ.
ރާއްޖޭގައި އުފައްދާ ތެލާއި ފެނުގެ 94 ޕަސެންޓު އުފައްދަނީ ޑީސަލް ބޭނުންކޮށްގެންނެވެ. ސަރުކާރުން ބުނަނީ އިރާން ހަނގުރާމަ ފެށުމުގެ ކުރިން، މި ބޭނުންތަކަށް ތެޔޮ އިމްޕޯޓުކުރަން މަހަކު 50 މިލިއަން ޑޮލަރު ހަރަދުވީއިރު، މިހާރު މަހަކު 116 މިލިއަން ޑޮލަރު (1.7 ބިލިއަން ރުފިޔާ) ހަރަދުވެ އެވެ.
