ރާއްޖޭގެ މާލީ އިގުތިސޯދީ ހާލަތާ ގުޅޭގޮތުން މައުލޫމާތު ސާފުކުރުމަށް މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއެކު ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ބޭއްވި ބައްދަލުވުން ސިއްރުކޮށްފި އެވެ.
މިއަދު މެންދުރުފަހު ބޭއްވި ކޮމިޓީ ބައްދަލުވުން ސިއްރުކުރުމަށް ހުށަހެޅުއްވީ ވެރިކަން ކުރާ ޕާޓީއަށް ނިސްބަތްވާ ފުނަދޫ ދާއިރާގެ މެންބަރު މުހައްމަދު މަމްދޫހު އެވެ. އޭނާގެ ހުށަހެޅުމަށް ތާއިދުކުރެއްވީ ގުރައިދޫ ދާއިރާގެ މެންބަރު ހަނާން މުހައްމަދު ރަޝީދު އެވެ.
މާލިއްޔަތު ކޮމިޓީގައި އޮންނަ ސަރުކާރުގެ މެޖޯރިޓީން ނިންމީ ކޮމިޓީ ބައްދަލުވުން ސިއްރުކުރުމަށެވެ. އެ ވަގުތު ކޮމިޓީ އަޑުއެހުމަށްޓަކައި އިދިކޮޅު ޕާޓީއަށް ނިސްބަތްވާ ފަސް މެންބަރަކު ތިއްބެވި އެވެ. އެ ކޮމިޓީ ކުރިއަށްގެންދިޔައީ އެ މެންބަރުން ކޮމިޓީން ބޭރުކުރުމަށްފަހު އެވެ.
"ކޮމިޓީ ބައްދަލުވުން ގަވަރުނަރު އެދިގެން ސިއްރުކޮށްފި. މި ބައްދަލުވުން އަޑުއެހުމަށް ފިއްޓޭ، އަމީން، ނިއުޝާދު، ޝާކިރު އަދި އަޅުގަނޑު ތިއްބާ މަޖިލިސް ގަވާއިދުގެ ދަށުން އަޅުގަނޑުމެން އެންމެން ވެސް ވަނީ ބައްދަލުވުމުން ބޭރުކޮށްފައި. ރައްޔިތުންގެ މަންދޫބުންނަށް ސިއްރު ކުރާ ކަންކަން ގައުމުގަ ހިނގާ،" ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ލިޔުއްވި އެވެ.
މާލިއްޔަތު ކޮމިޓީގެ މުހިންމު ބައްދަލުވުމެއް ސިއްރުކޮށްފައި މިވަނީ ދިވެހި ފައިސާގެ އަގު ތާރީހުގައި ވެސް ނުވެއްޓޭހާ މިންވަރަށް ދަށަށް ގޮސްފައިވާ ދަނޑިވަޅެއްގަ އެވެ. އެ ގޮތުން ރަސްމީ ރޭޓު 15.42ރ. ގައި ހިފެހެއްޓިފައި ހުއްޓަސް، ކަޅު ބާޒާރުން ޑޮލަރު ލިބޭ ރޭޓު އުޅެނީ 22.40ރ. އަށްވުރެ ބޮޑު ރޭޓެއްގަ އެވެ.
މިފަހުން އެމްއެމްއޭއިން ވަނީ ބޭންކިން ނިޒާމުގެ ތެރެއަށް ވަންނަ ޑޮލަރު އިތުރުކުރަން ބޭރު ފައިސާގެ ގާނޫނަށް ބަދަލުތަކެއް ވެސް ހުށަހަޅާފަ އެވެ. އެގޮތުން، ރިސޯޓުތަކަށް އަންނަ ކޮންމެ ޓޫރިސްޓެއްގެ ބޮލަކަށް 500 ޑޮލަރު މާރުކުރަން އޮންނަ އިހުތިޔާރު އުވާލައި ހުރިހާ ރިސޯޓުތަކުން ލިބޭ އާމްދަނީގެ 20 ޕަސެންޓު މާރުކުރަން މަޖުބޫރުކުރަން ވަނީ ހުށަހަޅާފަ އެވެ.
