ރާއްޖޭގެ ފުޓްބޯޅަ ސީޒަނުގެ ފުރަތަމަ މުބާރާތް، ކަޕް ވިނާސް ކަޕްގެ ފަހު ދެ މެޗުގެ ޝެޑިއުލަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބަދަލުތަކެއް ގެނެސްފި އެވެ.
މިދިިޔަ ސީޒަނުގެ ދިވެހި ޕްރިމިއާ ލީގުގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަން، އެފްއޭ ކަޕްގެ ޗެމްޕިއަން، ނިއު ރޭޑިއަންޓް ސްޕޯޓްސް ކްލަބް، ޕްރެޒިޑެންޓްސް ކަޕްގެ ޗެމްޕިއަން، އޮޑި ސްޕޯޓްސް ކްލަބްގެ އިތުރުން ލީގުގެ ހަތަރު ވަނައިގައި ނިންމި ބުރު ސްޕޯޓްސް ކްލަބާ އެކު ފެށި ކަޕް ވިނާސް ކަޕްގެ ކޮންމެ ޓީމެއް ވަނީ ދެ މެޗު ކުޅެފަ އެވެ.
މުބާރާތުގައި ދެން ބާކީ އޮތީ ތިން މެެޗެވެ. އެއީ، ލީގު ބުރުގެ ފަހު ދެ މެޗާއި ފައިނަލް މެޗެވެ.
ނިއު ރޭޑިއަންޓުން އޮޑި ބަލިކޮށް ކަޕް ވިނާސް ކަޕް ފައިނަލުގައި މާޒިޔާއާ ދެކޮޅަށް
ކަޕް ވިނާސް ކަޕްގައި އޮޑި 5-3 އިން ބަލިކޮށް، މުބާރާތުގެ ފައިނަލުގެ ޖާގައެއް ނިއު އިން ކަށަވަރުކޮށްފި. ލީގު ބުރުގައި ބާކީ މެޗެއް އޮއްވައި ނިއު އާއި މާޒިޔާ ފައިނަލަށް ދަތުރުކުރިއިރު، މި މެޗުގައި ނިއުގެ ބްރެޒިލް ފޯވާޑް ޑޮރިއެލްޓަން ވަނީ ހެޓްރިކެއް ހަދާފައި. ފައިނަލް މެޗު އޮތީ މި މަހު 18 ގައި. އޭގެ ކުރިން 15 ވަނަ ދުވަހު ވެސް މި ދެ ޓީމު ބައްދަލުކުރާނެ.
ނިއު އާއި މާޒިޔާ އިން ވަނީ ބާކީ މެޗެއް އޮއްވައި މުބާރާތުގެ ފައިނަލުން ޖާގަ ހޯދައިފަ އެވެ. ކަޕް ވިނާސް ކަޕް މެދުކަނޑާލީ އިއްޔެ މާޒިޔާ އިން ކުޅެން އޮތް އޭއެފްސީ ޗެލެންޖް ލީގުގެ ކޮލިފައިންގައި ތަޖިކިސްތާންގެ ރެގާރު ޓަޑާޒްއާ ކުޅެން އޮތް މެޗަށެވެ. އެ މެޗު، ރެގާރު ޓަޑާޒްގެ ދަތުރު ފަތުރުގެ މައްސަލައަކާ ހެދި ކުޅެވޭ ގޮތްވީ ޝެޑިއުލްކުރި ދުވަހަށް ވުރެން އެއް ދުވަސް ފަހުންނެވެ. އިއްޔެ ހަވީރު ކުޅުނު މެޗުން މާޒިޔާ ވަނީ 3-0 އިން ރެގާރު އަތްދަށުވެފަ އެވެ.
އެފްއޭއެމް އިން މިއަދު މައުލޫމާތު ދިން ގޮތުގައި، ކަޕް ވިނާސް ކަޕްގައި، ދެން އެންމެ އަވަހަށް އޮތް އޮޑި އާއި ބުރު ބައްދަލުކުރާ މެޗު އޮންނާނީ، އަންނަ ހޮނިހިރު ދުވަހު ހަވީރު 16:00 ގަ އެވެ. އަދި، ކަޕް ވިނާސް ކަޕްގެ ލީގު ބުރުގެ ފަހު މެޗުގައި، ނިއު އާއި މާޒިޔާ ކުޅޭ މެޗު އޮތީ އާދިއްތަ ދުވަހުގެ ރޭ 21:00 ގަ އެވެ.
ނިއު އާއި މާޒިޔާ ވާދަކުރަން ޖެހޭ ފައިނަލް މެޗު އޮތީ، އަންނަ ބުދަ ދުވަހުގެރޭ 21:00 ގަ އެވެ. މި ފަހަރުގެ ސީޒަނުގައި ނިއު އާއި މާޒިޔާ އިން މިހާތަނަށް އެއް މެޗުގައި ވަނީ ބައްދަލުކޮށްފަ އެވެ. އެއީ، ސީޒަން ހުޅުވަން ކުޅުނު ޗެރިޓީ ޝީލްޑް މެޗުގަ އެވެ. އެ މެޗުގައި ޕެނަލްޓީ ޖަހައިގެން މާޒިޔާ އިން ވަނީ ނިއު ބަލިކޮށްފަ އެވެ.
އެންމެ ފަހުން، 2008 ވަނަ އަހަރު ބޭއްވި ކަޕް ވިނާސް ކަޕްގެ ޗެމްޕިއަަނަކީ، ނިއު ރޭޑިއަންޓް އެވެ.
