ލޮސް އެންޖެލްސް، ޔުނައިޓެޑް ސްޓޭޓްސް (އޮގަސްޓް 13) - ދުނިޔޭގެ އެންމެ މަޝްހޫރު އެއް ބާސްކެޓްބޯޅަ ކްލަބް، ލޮސް އެންޖެލްސް ލޭކޭސް (އެލްއޭ ލޭކާސް)، 12.5 ބިލިއަން ޑޮލަރުގެ އަގަކަށް ވިއްކާލަން ތައްޔާރުވެއްޖެ އެވެ.
އެމެރިކާގެ ރައީސް، ޑޮނާލްޑް ޓްރަމްޕްގެ ދަނބިދަރި، ޖަރެޑް ކުޝްނާގެ ބޭބެ ޖޯޝް ކުޝްނާ އާއި ޑިޒްނީގެ ކުރީގެ ޗީފް، ބޮބް އައިގާ، ގުޅިގެން، އެލްއޭ ލޭކާސް، ގަންނަން ނިންމާފައި މި ވަނީ، މާކް ވޯލްޓާސް އެ ކްލަބްގެ މެޖޯރިޓީ ހިއްސާ ގަތްތާ އަހަރެއް ވެސް ނުވަނީހެވެ.
އެ ގޮތުން، މިދިޔަ އަހަރު ވޯލްޓާސް، އެލްއޭ ލޭކާސްގެ މެޖޯރިޓީ ހިއްސާ ގަތީ 10 ބިލިއަަން ޑޮލަރު ހަރަދުކޮށްފަ އެވެ. ބަސް ފެމިލީ އަތުން މެޖޯރިޓީ ހިއްސާ ގަންނަން ވޯލްޓާސް ކުރިއަށް ގެންދިޔަ ޑީލް، މިދިޔަ އަހަރުގެ އޮކްޓޫބަރު މަހު، އެންބީއޭގެ ބޯޑް އޮފް ގަވަރްނާސް އިން ވަނީ އެޕްރޫވްކޮށްފަ އެެވެ.
ޖެރީ ބަސް، 1979 ވަނަ އަހަރު އެލްއޭ ލޭކާސް ގަތީ 67.5 މިލިއަން ޑޮލަރު ދީފަ އެވެ. އެ ފަހަރުގެ ޑީލުގައި އެލްއޭ ލޭކާސްގެ އިތުރުން، ލޮސް އެންޖެލްސް ކިންގްސް ހޮކީ ޓީމާއި ލޮސް އެންޖެލްސް އެރީނާ ވެސް ހިމެނެ އެވެ. ޖެރީ، 2013 ވަނަ އަހަރު މަރުވުމުން، އޭނާގެ ހިއްސާތައް ވަނީ ހަ ދަރިންނަށް ލިބޭ ގޮތަށް ޓްރަސްޓެއް އެކުލަވާލައިފަ އެވެ. އެކަމަކު، ފަހުން، އެ ކްލަބްގެ ކޮންޓްރޯލް މިދިޔަ އަަހަރު ވޯލްޓާސް އަށް ވިއްކާލަން އެ ޓްރަސްޓުން ނިންމީ އެވެ.
އެލްއޭ ލޭކާސް ވަނީ 17 ފަހަރު އެންބީއޭގެ ޗެމްޕިއަންކަން ހޯދައިފަ އެވެ. މިއީ، އެންމެ ގިނައިން ޗެމްޕިއަންކަން ހޯދާފައިވާ ބޮސްޓަން ސެލްޓިކްސް އަށް ވުރެން އެއް ތަށި މަދު އަދަދެކެވެ. މި ފަހަރުގެ ޓްރާންސްފާގައި، އެލްއޭ ލޭކާސް އަށް ވަނީ 41 އަހަރުގެ ލެޖެންޑަރީ ތަރި، ލެބްރަން ޖޭމްސް ގެއްލިފަ އެވެ. ލެބްރަން ޖޭމްސް ވަނީ، ފިލަޑެލްފިއާ 96އާސް އަށް ބަދަލުވެފަ އެެވެ. ލެބްރަން ޖޭމްސް ނެތްތަނަށް ދެން ލީޑަރަކަށް ހުންނާނީ، ލޫކާ ޑޮންޗިޗް އެވެ. ޑޮންޗިޗް، އެލްއޭ ލޭކާސް އަށް އައީ މިދިިޔަ އަހަރުގެ ފެބްރުއަރީ މަހު ޑަލަސް މެވްރިކްސް ދޫކޮށްލުމަށް ފަހު އެވެ.
އެލްއޭ ލޭކާސްގެ މެޖޯރިޓީ ހިއްސާ ގަންނަން މަސައްކަތްކުރާ ގްރޫޕްގައި ހިމެނޭ ކުޝްނާ އަކީ، ދާދި ފަހުން، ފީފާއާ އެކު ޑީލެއް ކުރިއަށްގެންދަން މަސައްކަތްކުރި ފަރާތެކެވެ. އެ ގޮތުން، ފީފާގެ ރައީސް، ޖިއާނީ އިންފަންޓީނޯ، އިސްވެ، އުފައްދަން އުޅުނު ފީފާ ފޯވާޑް އެންޓަޕްރައިސް (އެފްއެފްއީ)ގެ ދަށުން ފީފާ ވޯލްޑް ކަޕް ހިމެނޭހެން ފީފާގެ މުބާރާތްތަކުގެ ހިއްސާއެއް ވިއްކާލާ ޑީލުގައި، ކުޝްނާގެ ކުންފުނި ތުރައިވް ކެޕިޓަލް ބައިވެރިވުމަށް އޮތީ ހަމަޖެހިފަ އެވެ. އެކަމަކު، އެ ޑީލްގެ ކަންކަން މުޅިން ހުއްޓާލައި، އެފްއެފްއީ ކުރިއަށް ނުގެންދަން، ފީފާ އިން ނިންމީ ގިނަ ގައުމުތަކެއްގެ ޕްރެޝަރާ އެކުގަ އެވެ.
އޭގެ ފަހުން، ކުޝްނާ ބައިވެރިވެ، އެލްއޭ ލޭކާސް ގަންނަން މި ކުރިއަށްދާ ޑީލަކީ، ކުޅިވަަރުގެ މާކެޓް/ވިޔަފާރި ތެރެއަށް ވަނުމަށްޓަކައި އޭނާ ކުރަމުން އަންނަ މަސައްކަތުގެ ތެރެއިން ބައެކެވެ.
