ބްރެޑް ޕިޓް ފަދަ ދުނިޔޭގެ ފެންވަރުގެ މަޝްހޫރު ތަރިއަކު ހާމަކަން ބޮޑު ވާހަކަތަކެއް ދެއްކުމަކީ ވަރަށް ނާދިރު ކަމެކެވެ. ނަމަވެސް، އޮސްކާ އެވޯޑް ހާސިލްކޮށްފައިވާ މި އެކްޓަރު އަދި ޕްރޮޑިއުސަރު ވަނީ އޮގަސްޓް 10 ގައި "އެސްކުއަޔާ" މެގަޒިންއަށް ދިން އިންޓަވިއުއެއްގައި، އޭނާގެ ކުރީގެ އަނބިމީހާ އެންޖެލީނާ ޖޯލީއާ އެކު ލިބިފައިވާ ހަ ދަރިންނާ އޮތް ގުޅުން ކެނޑިފައިވާ ދަނޑިވަޅެއްގައި، އެކަމާ ގުޅޭ ގޮތުން ފުރަތަމަ ފަހަރަށް ވާހަކަދައްކާފަ އެވެ.
"ސެވަން" ފަދަ ކާމިޔާބު ފިލްމުތައް ކުޅެފައިވާ ބްރެޑް ޕިޓް އެ ނޫހަށް ކިޔައިދިން ގޮތުގައި، އޭނާއަކީ އަބަދުވެސް ނަފުސާނީ ގޮތުން ވަރުގަދަ މީހެކެވެ. ނަމަވެސް، އާއިލީ މައްސަލަތަކެއްގެ ސަބަބުން ކުރިމަތިވި ދަތި ދުވަސްވަރެއްގައި، އަމިއްލައަށް މަރުވާ މީހުންނަށް އެ އިހުސާސް ކުރެވޭ ސަބަބު "ވިސްނޭ" ހިސާބަށް ކަންތައްތައް ދިޔަ ކަމަށް އޭނާ ބުންޏެވެ.
"އެކަމަކު އަހަރެން ގަބޫލުކުރާ ގޮތުގައި އިންސާނުންގެ ކިބައިގައި ދިރިހުރުމުގެ ވަރުގަދަ ވިސްނުމެއް ހުރޭ. އަހަރެންގެ ކިބައިގައިވެސް ވަގުތުން އެ ހިތްވަރު އުފެދުނު."
އޭނާ ބުނީ، ދިރިއުޅުމުގައި ދިމާވާ މިފަދަ ކަންކަމަކީ ފަސޭހަ ކަންތައްތަކެއް ނޫން ކަމަށާއި، އޭނާއަކީ ނަސީބުގެ ގޮތުން ބަލާއިރު "ލޮޓަރީއެއް" ކާމިޔާބުވެފައިވާ މީހެއް ފަދަ މީހެއް ކަމަށެވެ.
އެ ދަތި ދުވަސްވަރަކީ ދަރިންނާ ގުޅުންހުރި ކަމެއްތޯ ސުވާލުކުރުމުން ޖަވާބު ދިނީ، އެއީ "އާއިލީ ކަންތައްތަކެއް" ކަމަށާއި، އެ ހިސާބުން އެ ވާހަކަ ބޭއްވުން ރަނގަޅުވާނެ ކަމަށެވެ.
ބްރެޑް ޕިޓް މި މޭރުމުން ވާހަކަދައްކާފައި މިވަނީ، އޭނާގެ ހަ ދަރިންގެ ތެރެއިން ހަތަރު ދަރިން ކަމަށްވާ މެޑޮކްސް، ޒަހާރާ، ޝައިލޯ އަދި ވިވިއަން، އެ ކުދިންގެ ނަމުގެ ފަހަތުން "ޕިޓް" އުނިކުރުމަށް ގާނޫނީ ގޮތުން ހުށަހަޅާފައިވާ ދަނޑިވަޅެއްގަ އެވެ.
މީގެ ކުރިން "އަސް ވީކްލީ" އަށް މައުލޫމާތު ދިން މަސްދަރަކުން ބުނި ގޮތުގައި، ދަރިން އޭނާގެ ނަން އުނިކުރަން ނިންމުމުން ބްރެޑް ޕިޓް ހުރީ ވަރަށް ބޮޑަށް މާޔޫސްވެފަ އެވެ. އެ މަސްދަރުން ހާމަކުރި ގޮތުގައި، އެއީ ހަމައެކަނި ނަމަކަށް އައި ބަދަލެއް ނޫން ކަމަށާއި އެއީ އެތައް އަހަރެއް ވަންދެން އާއިލީ ގުޅުން ހީނަރުވަމުން ދިޔަކަމުގެ ރަމްޒެއްގެ ގޮތުގައި ބްރެޑް ޕިޓް ދެކެ އެވެ.
އެހެން މަސްދަރަކުން ބުނި ގޮތުގައި، ފާއިތުވި އަހަރުތަކުގައި ބްރެޑް ޕިޓާއި އޭނާގެ ދަރިންނާ ދެމެދު މާ ބޮޑު ގުޅުމެއް ނެތެވެ. ނަމަވެސް، އެ ގުޅުން ރަނގަޅު ކުރުމަށް އޭނާ ވަރަށް ބޮޑަށް ބޭނުންވެ އެވެ. އެހެންކަމުން، ދަރިން އޭނާގެ ނަން ދޫކޮށްލާކަން އެނގުމަކީ އޭނާއަށް ލިބުނު ވަރަށް ބޮޑު ހިތާމައެކެވެ.
"ބްރެޑް ބޭރުފުށުން ހިތްވަރުގަދަކަން ދެއްކި ނަމަވެސް، އެތެރެއިން އޭނާއަށް މި ހަގީގަތް ގަބޫލުކުރަން ވަރަށް އުނދަގޫވެފައިވޭ،" ތިންވަނަ މަސްދަރަކުން މައުލޫމާތު ދީފައިވެ އެވެ.
