އެމެރިކާގެ ފިލްމީ ސިނާއަތުގެ އެންމެ ޝަރަފުވެރި އެވޯޑު ކަމަށްވާ އޮސްކާ އެވޯޑު ދިނުމުގައި އާޓިފިޝަލް އިންޓެލިޖެންސް ނުވަތަ އޭއައި ބޭނުންކޮށްގެން އުފައްދާ އެކްޓިންއާއި ލިޔުންތަކަށް އެވޯޑު ނުދޭން އެކަޑަމީ އޮފް މޯޝަން ޕިކްޗާ އާޓްސް އެންޑް ސައިންސަސް އިން ނިންމައިފިއެވެ.
އެކަޑަމީން އާންމުކުރި އާ ގަވާއިދުތަކުގައިވާ ގޮތުން، އޮސްކާ އެވޯޑަށް ނޮމިނޭޓް ކުރެވޭނީ ހަމައެކަނި އިންސާނުން ކޮށްފައިވާ މަސައްކަތްތަކަށެވެ.
އެކަޑަމީން ބުނި ގޮތުގައި ފިލްމުތަކާއި ޑޮކިއުމެންޓްރީތަކުގައި އޭއައިގެ ބޭނުން ހިފާ މިންވަރު އިތުރުވަމުންދާތީ، އެވޯޑަށް ޝަރުތުހަމަވާ މަސައްކަތްތައް ކަނޑައެޅުމަށްޓަކައި އާ އުސޫލުތަކެއް އެކުލަވައިލުން މިހާރު ވަނީ މަޖުބޫރުވެފައެވެ. މިގޮތުން، އެކްޓިންގެ ދާއިރާއިން އެވޯޑަކަށް ނޮމިނޭޓް ކުރެވޭނީ އެއީ އިންސާނަކު ކޮށްފައިވާ އެކްޓިންއެއްކަން ސާފުކޮށް އެނގެން އޮންނަ މަސައްކަތްތަކަށެވެ. އަދި ފިލްމުގެ ސްކްރީންޕްލޭ ނުވަތަ ލިޔުންތެރިކަމުގެ ބައިން އެވޯޑު ދެވޭނީ އިންސާނަކު ލިޔެފައިވާ ލިޔުންތަކަށް އެކަނި ކަމަށްވެސް އެކަޑަމީން ވަނީ ކަނޑައަޅާފައެވެ.
މިއީ އޮސްކާގެ ތާރީހުގައި ގެނައި ވަރަށް މުހިންމު ބަދަލެއްގެ ގޮތުގައި އެކަޑަމީން ސިފަކުރެއެވެ. ފާއިތުވި މަސްތަކުގައި އިންސާނުންގެ މަސައްކަތުގެ ބަދަލުގައި އޭއައި ބޭނުންކޮށްގެން ތަފާތު އުފެއްދުންތައް އުފެއްދުން ވަނީ އާންމުވެފައެވެ. މިސާލަކަށް، 2025 ގައި މަރުވި މަޝްހޫރު އެކްޓަރު ވެލް ކިލްމާގެ ސިފަ އޭއައި މެދުވެރިކޮށް އަލުން އުފައްދައި، ކުރިއަށް އޮތް ފިލްމެއްގެ މައި ރޯލު ކުޅުވުމަށް ދަނީ ތައްޔާރުވަމުންނެވެ. މީގެ އިތުރުން، ލަންޑަނަށް ނިސްބަތްވާ އެކްޓަރު އެލީން ވަން ޑަ ވެލްޑަން ވަނީ އޭއައި ބޭނުންކޮށްގެން މުޅިން އާ އެކްޓަރަކު އުފައްދައި، އެއީ ދުނިޔޭގެ ފެންވަރުގެ ތަރިއަކަށް ހަދާނެ ކަމަށް ބުނެފައެވެ.
ހޮލީވުޑްގެ ލިޔުންތެރިން މީގެ ދެ އަހަރު ކުރިން ކުރި އިހުތިޖާޖުތަކުގެ މައިގަނޑު އެއް ސަބަބަކީވެސް ފިލްމު ކުންފުނިތަކުން ސްކްރިޕްޓް ލިޔުމަށް އޭއައި ބޭނުންކުރަން ފެށުމެވެ. އޭއައި ޓޫލްތަކަކީ އިންސާނުން މީގެ ކުރިން ލިޔެފައިވާ ލިޔުންތަކާއި، ކުރަހާފައިވާ ކުރެހުންތަކާއި، އުފައްދާފައިވާ ވީޑިއޯތަކުގެ އެހީގައި ތަމްރީނުކޮށްފައިވާ ވަސީލަތްތަކެކެވެ. މީގެ ސަބަބުން ކޮޕީރައިޓްގެ މައްސަލަތައް ކުރިމަތިވެ، ގިނަ އަދަދެއްގެ ލިޔުންތެރިންނާއި އެކްޓަރުން ދަނީ އޭއައި ކުންފުނިތަކާ ދެކޮޅަށް ދައުވާ ކުރަމުންނެވެ.
ނަމަވެސް، އެކަޑަމީން ފިލްމުތަކުގައި އޭއައި ބޭނުންކުރުން މުޅިން މަނައެއް ނުކުރެއެވެ. އެކްޓިންއާއި ލިޔުންތެރިކަން ފިޔަވައި އެހެން ދާއިރާތަކުގައި އޭއައި ބޭނުންކުރުމަކީ އެވޯޑަށް ނޮމިނޭޓްވުމަށް އޮތް ހުރަހެއް ނޫން ކަމަށް އެކަޑަމީން ބުނެއެވެ. އެކަޑަމީން ބުނި ގޮތުގައި ކޮންމެ ދާއިރާއަކުންވެސް އެވޯޑު ދިނުމުގައި ބަލާނީ އެ މަސައްކަތެއްގެ އަސްލަކީ އިންސާނެއްގެ އުފެއްދުންތެރިކަން ކަމުގައިވާ މިންވަރަށެވެ. އަދި އޭއައި ބޭނުންކޮށްފައިވާ ގޮތާ މެދު ސުވާލު އުފެދިއްޖެ ނަމަ، އެކަމާ ގުޅޭ އިތުރު މައުލޫމާތު ހޯދުމުގެ އިޚުތިޔާރު އެކަޑަމީއަށް އޮންނާނެއެވެ.
ފިލްމު އުފެއްދުމުގައި ޓެކްނޮލޮޖީ ބޭނުންކުރުމަކީ އާ ކަމެއް ނޫނެވެ. ނަވާރަސަތޭކަ ނުވަދިހައިގެ އަހަރުތަކުން ފެށިގެން ސީޖީއައި ނުވަތަ ކޮމްޕިއުޓާ ޖެނެރޭޓެޑް އިމޭޖަރީ ދަނީ ފުޅާ ދާއިރާއެއްގައި ބޭނުންކުރަމުންނެވެ. އެހެންނަމަވެސް، ސީޖީއައި އަކީ އިންސާނުންގެ ބުރަ މަސައްކަތުން ފުރިހަމަކުރާ ކަމަކަށް ވާއިރު، އޭއައި އަކީ އިންސާނުންދޭ ކުޑަ އިރުޝާދަކުން މުޅި މަސައްކަތް އަމިއްލައަށް ނިންމާލާ ވަސީލަތެކެވެ. އެހެންކަމުން، އޮސްކާގެ އާ އުސޫލުތަކުގެ މަގުސަދަކީ ފިލްމީ ދާއިރާގައި އިންސާނުންގެ ހުނަރާއި އުފެއްދުންތެރިކަމަށް އޮތް ގަދަރު ދެމެހެއްޓުމެވެ.
