އިނގިރޭސި ސަރުކާރުގެ ކުރީގެ މިނިސްޓަރު އޭން ވިޑެކޯމްބް އަވަހާރަކޮށްލާފައިވަނީ ސިޔާސީ މަގްސަދެއްގައި ކަމަށް ބެލެވޭ އެއްވެސް ހެއްކެއް މިހާތަނަށް ފެނިފައިނުވާ ކަމަށް ފުލުހުން އާދިއްތަ ދުވަހު ބުނެފި އެވެ.
މި މައްސަލައާ ގުޅިގެން އުމުރުން 28 އަހަރުގެ ފިރިހެނަކު ހައްޔަރުކޮށްފައިވާއިރު، އިތުރު މީހަކު ހޯދަމުން ނުދާ ކަމަށް ވެސް ފުލުހުން ވަނީ ބުނެފަ އެވެ.
އުމުރުން 78 އަހަރުގެ ވިޑެކޯމްބް، މިދިޔަ ބުރާސްފަތި ދުވަހު އިނގިރޭސިވިލާތުގެ ހުޅަނގު ދެކުނުގެ ރަށެއްގައި ހުންނަ އޭނާގެ ގޭގައި އޮއްވާ ފެނުނުއިރު، އޭނާގެ ހަށިގަނޑަށް ބޮޑެތި ޒަހަމްތަކެއް ލިބިފައިވާ ކަމަށް ފުލުހުން ބުނެފައިވެ އެވެ. މި ކަމާ ގުޅިގެން އިނގިރޭސިވިލާތުގެ އުތުރުގެ ރަށެއް ކަމަށްވާ ރޮދަރަމްއިން، ދޮން ނަސްލުގެ އިނގިރޭސި ފިރިހެނަކު ހައްޔަރުކޮށްފައިވަނީ ހޮނިހިރު ދުވަހުގެ ރޭގެ ވަގުތެއްގަ އެވެ.
މި މައްސަލައާ ގުޅޭ ގޮތުން ވާހަކަ ނުފެތުރުމަށް ފުލުހުން ވަނީ އެދިފަ އެވެ. މި ވަގުތު 28 އަހަރުގެ ފިރިހެނަކު ހައްޔަރުކޮށްފައި ހުރި އިރު، މިދިޔަ ހުކުރު ދުވަހު ތުހުމަތު ކުރެވޭ އެހެން މީހަކު ވެސް ހައްޔަރު ކުރި އެވެ. އެކަމަކު އޭނާ ފަހުން ދޫކޮށްލި އެވެ.
ވޭތުވެދިޔަ 10 އަހަރު ދުވަހުގެ ތެރޭގައި އިނގިރޭސިވިލާތުގެ ގާނޫނު ހަދާ މަޖިލީހުގެ މެންބަރުކަމުގައި ތިއްބެވި ދެ ބޭފުޅަކު ވަނީ އަވަހާރަކޮށްލާފަ އެވެ.
އެގޮތުން 2016 ވަނަ އަހަރު ބްރެކްސިޓް ކެމްޕޭނުގެ ތެރޭގައި، ނާޒީ ފިކުރަށް ތާއީދުކުރާ މީހަކު ވަނީ ލޭބާ ޕާޓީގެ މެންބަރު ޖޯ ކޮކްސްގެ ގަޔަށް ބަޑިޖަހައި އަދި ވަޅިން ހަމަލާދީފަ އެވެ. މީގެ އިތުރުން، 2021 ވަނަ އަހަރު ކޮންޒަވޭޓިވް ޕާޓީގެ މެންބަރު ޑޭވިޑް އޭމްސްއަށް ވަޅިން ހަމަލާދިނީ ހަނގުރާމަވެރި ޖަމާއަތެއް ކަމަށްވާ އިސްލާމިކް ސްޓޭޓް (އައިއެސް) ގެ ފިކުރަށް ތާއީދުކުރާ މީހެކެވެ.
