ހދ. ވައިކަރަދޫ ދަނޑުބިންތަކުން މުޅިން އަލަށް ކުލި ނަގަން ފަށައި، ފަޅުގޮވާން ކުރަން މޫދާއި އެއްގަމުން ބިން ދޫކުރަން އެ ރަށު ކައުންސިލުން ނިންމައިފި އެވެ.
ވައިކަރަދޫ ރަށު ކައުންސިލުން ބުރާސްފަތި ދުވަހު ގެޒެޓު ކުރި އިއުލާނެއްގައި ބުނީ އަންނަ އޮކްޓޯބަރު މަހުން ފެށިގެން މިހާރު ދޫކޮށްފައިވާ ހުރިހާ ދަނޑުބިންތަކެއްގެ ކުލި ހިނގަން ފަށާނެ ކަމަށެވެ.
ކުލީގެ ގޮތުގައި ނަގާނީ އަކަފޫޓަކަށް ދެ ލާރި ކަމަށް ވެސް ރަށު ކައުންސިލުން ބުނެފައި އޮތެވެ. ދަނޑުވެރިކަން ފުޅާ ދާއިރާއެއްގައި ކުރާ ވައިކަރަދޫ ދަނޑުބިންތަކުން ކުލި ނަގަން މި ފަށަނީ އަލަށެވެ.
ކައުންސިލުން ކުރިން ނިންމާފައި އޮތީ ކުލީގެ ގޮތުގައި އަކަފޫޓަކަށް ފަސް ލާރި ނެގުމަށެވެ. ނަމަވެސް ގިނަ ބަޔަކު އެކަމާ ނުރުހުމުން ދެ ލާރިއަށް ކުލި ތިރި ކުރީ އެވެ. އެނގިފައިވާ ގޮތުގައި ދަނޑުބިމުގެ ކުލީގެ ގޮތުގައި އެއްވެސް މިންވަރަށް ފައިސާ ނެގުމާމެދު ގިނަ ބަޔަކު ނުރުހެ އެވެ.
ކުލި ނަގަން ފެށުމުގެ ކުރިން ބިންތަކުގައި މިން އެޅޭނެ ގޮތަށް ދަނޑުގެ ވަށައިގެންވާ އިމާއި މަގުފަޅި ރަނގަޅަށް ސާފު ކުރަން ވެސް ކައުންސިލުން އެދެ އެވެ.
އެ ރަށު ކައުންސިލުން މިވަގުތު 161 ބިމެއް އޮތީ ދޫކޮށްފަ އެވެ. އެހެންކަމުން މިހާރު ދޫކޮށްފައި ވަނީ 5000 އަކަފޫޓުގެ ބިންތަކެއް ކަމުގައި ބެލި ނަމަވެސް ކުލީގެ ގޮތުގައި ކައުންސިލަށް މަހަކު 16،100ރ. ލިބޭނެ އެވެ. އަދި އެވަރު ބިމެއްގެ ކުލީގެ ގޮތުގައި 100ރ. ދައްކަންޖެހޭނެ އެވެ.
ފަޅުގޮވާން ކުރަން ދޫކުރަނީ ކިތައް ބިން ކަމެއް ވައިކަރަދޫ ކައުންސިލަކުން ނުބުނެ އެވެ. ފަޅު ގޮވާން ކުރަން މޫދުން ބަޔަކާއެކު ބިން ވެސް ދޫކުރާނެ އެވެ. އެ މަސައްކަތް ކުރަން ޝައުގުވެރިކަން ހުރި ފަރާތްތަކުން ސެޕްޓެމްބަރު 25، ގެ ނިޔަލަށް ރަޖިސްޓްރީ ކުރަން ކައުންސިލުން އެދެ އެވެ.
ފަޅުގޮވާން ކުރަން ދޫކުރާ ބިންތަކުން އަކަފޫޓަކަށް ކުލީގެ ގޮތުގައި ނަގާނީ ފަސް ލާރި އެވެ.
