ސްރީލަންކާގެ ޖަލުތައް ތޮއްޖެހިފައިވުމުގެ ސަބަބުން އެ ގައުމުގެ އެކި ސަރަހައްދުތަކުގައި ހަމަނުޖެހުންތައް ހިނގަމުންދަނިކޮށް، އަނެއްކާވެސް ދެ ޖަލެއްގައި ހިނގި ކުރިމަތިލުންތަކެއްގައި ތިން ގައިދީއަކު މަރުވެ، މަދުވެގެން 23 މީހުން ޒަހަމްވެފައިވާ ކަމަށް ރިޕޯޓުތައް ބުނެފި އެވެ.
ކޮލަމްބޯގެ ނިއު މެގަޒިން ޕްރިޒަންގައި ބުރާސްފަތި ދުވަހުގެ ރޭ ފެށުނު ހަމަނުޖެހުންތަކުގައި އެކަކު މަރުވެ 10 މީހުން ޒަހަމްވެފައިވާއިރު، ވެރިރަށް ކޮލަމްބޯއާ ގާތްގަނޑަކަށް 80 ކިލޯމީޓަރު ދުރުގައި އޮންނަ ކުރުވީޓާ ޖަލުގައި ހިނގި ދެވަނަ ހަމަނުޖެހުމުގައި ދެ ގައިދީއަކު މަރުވެ 14 މީހަކު ޒަހަމްވެފައިވާ ކަމަށް ޕަބްލިކް ސެކިއުރިޓީ މިނިސްޓަރު އާނަންދަ ވިޖޭޕާލާ ގާނޫނު ހަދާ މަޖިލީހުގައި ވިދާޅުވި އެވެ.
"މިހާރު އަޅުގަނޑުމެން މިވަނީ ހާލަތު ކޮންޓްރޯލްކޮށްފައި. ސަލާމަތީ ގޮތުން ކަންބޮޑުވާންޖެހޭ ކަމެއް މިހާރު ނެތް. މި ހުރިހާ ހާދިސާތަކަށް އެކުގައި ބަލާއިރު، މިއީ ރޭވުންތެރިކަމާއެކު ގައުމުގެ އަމާންކަން ނަގާލުމަށް ދީފައިވާ ހަމަލާތަކެއް ކަމަށް ބެލެވޭ. ނަމަވެސް މިކަމާ ގުޅޭ އިތުރު ތަފްސީލެއް އެނގޭނީ ފުރިހަމަ ތަހުގީގަކަށް ފަހު،" މިނިސްޓަރު ވިޖޭޕާލާ މެންބަރުންނަށް މައުލޫމާތު ދެއްވަމުން ވިދާޅުވި އެވެ.
މިދިޔަ ޖުލައި މަހުގެ ކުރީކޮޅު ކޮލަމްބޯގެ އުތުރުން 35 ކިލޯމީޓަރު ދުރުގައި އޮންނަ ނިގަމްބޯގެ ޖަލެއްގައި ދެ ދުވަސް ވަންދެން ހިނގި ކުރިމަތިލުންތަކުގައި ޖަލު އޮފިސަރުންގެ 10 މީހުންނާއި 20 ގައިދީން މަރުވެފައިވެ އެވެ. މީގެ އިތުރުން، މިދިޔަ ހަފުތާ ބަންދުގައި ކޮލަމްބޯއާ 14 ކިލޯމީޓަރު ދުރުގައި އޮންނަ މަހާރާ ޖަލުގައި ހިނގި ހަމަނުޖެހުމެއްގައި ވެސް އެއް ގައިދީއަކު މަރުވެ، އިތުރު ބަޔަކު ވަނީ ޒަހަމްވެފަ އެވެ.
ސްރީލަންކާގެ ކޯޓުތަކުގައި ނުނިމި ހުރި އެއް މިލިއަނަށް ވުރެ ގިނަ މައްސަލަތައް އަވަސްކޮށް، ޖަލުތަކުގައި ތިބި ގައިދީންގެ އަދަދު މަދުކުރުމަށް ކުރާ މަސައްކަތުގެ ދަށުން، މަތީ މަރުހަލާގެ ކޯޓުތަކުގެ ފަނޑިޔާރުންގެ މަގާމުގެ މުއްދަތު ދެ އަހަރަށް އިތުރުކުރުމަށް އެ ގައުމުގެ ގާނޫނުއަސާސީއަށް އިސްލާހު ގެނައުމަށް މިހާރު ދަނީ ރާވަމުންނެވެ.
