ސްރީލަންކާގެ ކޯޓުތަކުގައި ނުނިމި ހުރި މިލިއަނަކަށް ވުރެ ގިނަ މައްސަލަތައް އަވަސްކުރުމަށާއި، ޖަލުތަކުގެ ތޮއްޖެހުމަށް ހައްލެއް ހޯދުމުގެ ގޮތުން ފަނޑިޔާރުންގެ މަގާމުގެ މުއްދަތު ދެ އަހަރަށް އިތުރުކުރުމަށް ގާނޫނުއަސާސީއަށް އިސްލާހެއް ގެނައުމަށް އެ ގައުމުގެ ކެބިނެޓުން ފާސްކޮށްފިއެވެ.
މި ނިންމުން ނިންމާފައިވަނީ ދާދި ފަހުން ލަންކާގެ ޖަލުތަކުގައި ހިނގި ދެ ހަމަނުޖެހުމެއްގައި 10 އޮފިސަރުންނާއެކު 31 މީހުން މަރުވެ، ގިނަ ބަޔަކު ޒަހަމްވި ދަނޑިވަޅެއްގައެވެ. އެގޮތުން ކޮލަމްބޯއާ 15 ކިލޯމީޓަރު ދުރުގައި އޮންނަ މަހާރާ ޖަލުގައި ހިނގި ހަމަނުޖެހުންތަކުގައި ވެސް އެކަކު މަރުވެ، ނުވަ ގައިދީއަކު ވަނީ ޒަހަމްވެފައެވެ.
ކެބިނެޓްގެ ތަރުޖަމާނު ނަލިންދަ ޖަޔަތިއްސަ ވިދާޅުވި ގޮތުގައި، ދެ ބަޔަކަށް ބަހާލައިގެން ހުށަހަޅާ މި އިސްލާހުގެ ދަށުން ގާނޫނުއަސާސީއަށް 22 ވަނަ އިސްލާހު ގެނެވޭނެއެވެ. މިއާއެކު ސުޕްރީމް ކޯޓާއި، ހައިކޯޓާއި، އެޕީލް ކޯޓުގެ ފަނޑިޔާރުންގެ އިތުރުން އުއްތަމަ ފަނޑިޔާރުގެ މަގާމުގެ މުއްދަތު ދެ އަހަރަށް އިތުރުވެގެންދާނެއެވެ.
މިހާރު އޮންނަ ގޮތުން ސުޕްރީމް ކޯޓުގެ ފަނޑިޔާރުން 65 އަހަރުގައި، އެޕީލް ކޯޓުގެ ފަނޑިޔާރުން 63 އަހަރުގައި އަދި ހައިކޯޓުގެ ފަނޑިޔާރުން ރިޓަޔާ ކުރައްވަނީ 61 އަހަރުގަ އެވެ.
މީގެ އިތުރުން، ޑިސްޓްރިކްޓް ކޯޓުތަކާއި މެޖިސްޓްރޭޓް ކޯޓުތަކުގެ ފަނޑިޔާރުންގެ މުއްދަތު ވެސް ދެ އަހަރަށް އިތުރުކުރުމަށް ވަކި ބިލެއް އެކުލަވާލައި ކެބިނެޓުން ވަނީ ފާސްކޮށްފައެވެ.
ޖަޔަތިއްސަ ފާހަގަކުރެއްވި ގޮތުގައި، މި ބަދަލުގެ މައިގަނޑު ބޭނުމަކީ 12 އަހަރާއި 20 އަހަރާ ދެމެދުގެ މުއްދަތަކަށް އިންސާފު ހޯދަން މަޑުކުރަންޖެހިފައިވާ އާންމުންނަށް ލުޔެއް ހޯދައިދިނުމެވެ. އަދި ކޯޓުތަކާއި ފަނޑިޔާރުންގެ އަދަދު އިތުރުކުރުމަކީ ވެސް ސަރުކާރުގެ އަމާޒެކެވެ. މި އިސްލާހުތަކަށް އެ ގައުމުގެ ޖަސްޓިސް މިނިސްޓްރީން ވެސް ތާއީދުކުރާއިރު، މިއީ ކޯޓުތަކުގައި ނުނިމި ހުރި 1.1 މިލިއަން މައްސަލަ ނިންމުމަށް ކުރެވޭ ފުޅާ މަސައްކަތެކެވެ.
ނަމަވެސް، އިދިކޮޅު ފަރާތްތަކާއި ވަކީލުން ދަނީ މި ބިލާ ދެކޮޅަށް އަޑުއުފުލަމުންނެވެ. އެ ފަރާތްތަކުން ބުނާ ގޮތުގައި ކަމާބެހޭ ފަރާތްތަކުގެ މަޝްވަރާއާ ނުލައި ގެންނަ މި ބަދަލުގެ ސަބަބުން ފަނޑިޔާރުގެއަށް އޮތް އިތުބާރު ގެއްލޭނެއެވެ. މިކަމާ ގުޅިގެން މައި އިދިކޮޅު ޕާޓީ (އެސްޖޭބީ) އިން ވަނީ ގާނޫނީ މައްސަލަތައް އަވަސްކުރެވޭނެ ގޮތްތައް ދެނެގަތުމަށް ޕާލަމެންޓްގެ ހާއްސަ ކޮމިޓީއެއް އެކުލަވާލުމަށް ހުށަހަޅާފައެވެ.
މައްސަލަތައް ދިގުލައިގެން ދިއުމުގެ ސަބަބުން ލަންކާގެ ޖަލުތަކަށް ބޮޑު ނުތަނަވަސްކަމެއް ވަނީ ކުރިމަތިވެފައެވެ. 11،000 ގައިދީންގެ ޖާގައިގެ 22 ޖަލެއްގައި މިހާރު ވެސް 41،000 އަށް ވުރެ ގިނަ މީހުން ބަންދުކޮށްފައި ތިބިއިރު، އޭގެ ތެރޭގައި ހުކުމެއް ނުކުރެވި ރިމާންޑްގައި ތިބި އެތައް ހާސް ބަޔަކު ހިމެނެއެވެ.
