ކ. ތިލަފުށި ސައިޓެއްގައި ހައިމާކަކުން ކުނި ނެގުމުގެ މަސައްކަތް ކުރަމުންދަނިކޮށް، އޭގެ ދަތްގަނޑުން ޖެހި ވެއްޓިގެން ޖެނުއަރީ 26، ގައި މަރުވި ބަނަގްލަދޭޝް މީހާގެ މައްސަލައިގައި ހައްޔަރުކުރި ސްރީލަންކާ މީހާ ޑީޕޯޓްކޮށްލައިފި އެވެ.
ފުލުހުން ބުނީ އަމީން މިއާގެ މަރުގެ މައްސަލައިގައި ހައްޔަރުކުރި ސްރީލަންކާއަށް ނިސްބަތްވާ ހެޝަން މަދުރަންގަ ޑިސަނަޔަކަ މެނިކަ، 32، ޑީޕޯޓްކޮށް، މައްސަލައިގައި ދައުވާކުރުމަށް ފޮނުވާފައިވާ ކަމަށެވެ. އެކަމާ ގުޅޭ އިތުރު ތަފްސީލެއް ފުލުހުން ދީފައެއް ނުވެ އެވެ.
ޕީޖީ އޮފީހުން ބުނީ މައްސަލައިގައި ދައުވާކުރަން ފުލުހުން ފޮނުވުމުން ޑިކްލައިން ކޮށްފައިވާ ކަމަށެވެ. މައްސަލަ ޑިކްލައިން ކުރި ސަބަބެއް ޕީޖީ އޮފީހުން ހާމަކޮށްފައެއް ނުވެ އެވެ.
މި މައްސަލައިގައި ސްރީލަންކާ މީހާ ހައިމާކު އޮޕަރޭޓްކޮށްފައިވަނީ ބަލަން ޖެހޭ ވަރަށް ނުބަލައި ކަމަށް ފުލުހުން ތުހުމަތުކުރާއިރު، އޭނާގެ މައްޗަށް ތުހުމަތުކުރަނީ ގަސްތަކާނުލައި މީހަކު މެރުމުގެ ކުށް ކުރި ކަމަށެވެ.
މި މައްސަލައިގައި ހެއްކެއްގެ ބަޔާނަށް ރިޔާޔަތްކޮށް ފުލުހުން ކޯޓުގައި ކުރިން ބުނީ ސްރީލަންކާ މީހާ ފިލައިގެން ދާން އުޅުނު ކަމަށް ބެލެވޭ ކަމަށެވެ. އޭގެއިތުރުން އޭރު އޭނާ މަސައްކަތް ކުރަމުންދިޔައީވެސް ގަވާއިދާ ހިލާފަށް ކަމަށް ފުލުހުން ބުންޏެވެ.
ފުލުހުން ބުނީ ހާދިސާ ހިނގި ސަރަހައްދުގެ ސީސީޓީވީން ފެންނަ ގޮތުގައި ހައިމާކުގެ ދަތްގަނޑުން އަމީން މިއާ ގައިގައި ޖެހުނު ނަމަވެސް، ހުއްޓުމެއް ނެތި މަސައްކަތް ވަނީ ކުރިއަށް ގެންގޮސްފައި ކަމަށެވެ.
އަދަދު އަށް އެނގިފައިވާ ގޮތުގައި އަމީން މިއާ ގެއްލުނުކަން ވެމްކޯއިން ފުލުހުންނަށް ރިޕޯޓްކުރީ ދެ ދުވަސް ފަހުންނެވެ. އޭނާ މަރުވެފައި އޮއްވާ ފެނުނީ ގެއްލިގެން ރިޕޯޓްކުރި ދުވަހު ހޯދުމުގެ މަސައްކަތް ކުރަނިކޮށެވެ.
އޭނާ ގެއްލުނުކަން ވެމްކޯއިން ފުލުހުންނަށް ރިޕޯޓުނުކޮށް ލަސްކުރީ ކީއްވެގެން ކަމެއް ވެމްކޯއިން ހާމައެއް ނުކުރެ އެވެ. އެ ކުންފުނިން ބުނީ ހާދިސާއާ ގުޅޭ އެއްވެސް މައުލޫމާތެއް ނުދިނުމަށް ފުލުހުން އަންގާފައިވާ ކަމަށެވެ.
