މެކްސިކޯ ސިޓީ (އޮގަސްޓް 3) - އާޖެންޓީނާ ގައުމީ ޓީމާއި ޔޫރަޕްގެ މަޝްހޫރު ގިނަ ކްލަބްތަކަށް ކުޅުނު އެރިކް ލަމޭލާގެ ކޯޗިން ލައިސަންސްގެ ކަންކަން އެއްކޮށް ހަމަނުޖެހޭތީ، ކުރިއަށް އޮތް ސީޒަނުގައި މެކްސިކޯގެ ކްލަބް، މޮންޓަރޭގެ ސްކޮޑުގެ ކިޓް މެނޭޖަރަކަށް ލަމޭލާގެ ނަން ހިމަނައިފި އެވެ.
އުމުރުން 34 އަހަރުގެ ލަމޭލާ، ޕްރޮފެޝަނަލްކޮށް ފުޓްބޯޅައިން ރިޓަޔާކުރީ މިދިޔަ އަހަރުގެ އޮގަސްޓް މަހުގަ އެވެ. އެ ގޮތުން، އެންމެ މަތީ ފަންތީގެ މުބާރާތްތަކުގައި ކުޅުނު ލަމޭލާގެ 16 އަހަރުގެ ދިގު ކެރިއަރުގައި އޭނާ ވަނީ އާޖެންޓީނާގެ ރިވަ ޕްލޭޓް، އިޓަލީގެ ރޯމާ، އިންގްލެންޑްގެ ޓޮޓެންހަމް ހޮޓްސްޕާސް، ސްޕެއިނުގެ ސެވިއްޔާ އަދި ގްރީސްގެ އޭއީކޭ އެތަންސް އަށް ކުޅެފަ އެވެ.
ގާތްގަނޑަކަށް 10 ވަރަކަށް އަހަރު ބުރަކަށީގެ އަނިޔާއެއްގެ ސަބަބުން އެކި ފަހަރު މަތިން ފަރުވާ ހޯދި ލަމޭލާ، އެންމެ ފަހުން މިދިޔަ އަހަރު ކުޅުމުގެ ކެރިއަރު ނިންމާލީ އެވެ. އެ އަށް ފަހު، ސެވިއްޔާގެ ކޯޗު، މަޓިއަސް އަލްމައިޑާގެ ކޯޗިން ސްޓާފެއްގެ ގޮތުގައި އެ ޓީމުގައި ވެސް މަސައްކަތްކުރި އެވެ.
އަލްމައިޑާގެ ކޯޗިން ޓީމުގައި ދެމިހުރުމަށްޓަކައި މި ފަހަރު ލަމޭލާ އަށް ޖެހުނީ ތަފާތު ރޯލެއް ނަގާށެވެ. އަލްމައިޑާ ވަނީ މި ފަހަރު މެކްސިކޯ ލީގުގެ މޮންޓަރޭއާ ހަވާލުވެފަ އެވެ. މެކްސިކޯ ލީގުގެ ގަވާއިދުގައި ބުނާގޮތުން، ބެންޗުގައި ކޯޗެއްގެ ގޮތުގައި ރަޖިސްޓްރީ ކުރެވޭނީ ވަކި ކޯޗިން ފާހެއް އޮންނަ ފަރާތްތަކަށެވެ. ލަމޭލާ މި ވަގުތު އަންނަނީ، ޔުއެފާ ޕްރޯ ލައިސަންސް ހޯދުމަށްޓަކައި ކޯހުގައި ބައިވެރިވަމުންނެވެ.
އެކަމަކު، ސީޒަން ފެށޭހާތަނަށް ކޯސް ނުނިމޭނެތީއާ އެކު، ލަމޭލާ އަށް މޮންޓަރޭ ބެންޗަށް ވަންނަން ލިސްޓުގައި ހިމަނަން، އަލްމައިޑާ ބޭނުންވާތީވެ، މޮންޓަރޭގެ މެނޭޖްމަންޓުން ނިންމާފައިވަނީ، ކިޓް މެނޭޖަރެއްގެ ގޮތުގައި، ލަމޭލާ ރަޖިސްޓްރީ ކުރުމަށެވެ.
