މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަލަށް ތައާރަފުކުރި މޯލްޑިވްސް ފައިނޭންޝަލް ސެކްޓަރ އެވޯޑްސްގައި، މާލީ ދާއިރާގައި އެންމެ ފާހަގަކޮށްލެވޭ ހިދުމަތްތަކެއް ފޯރުކޮށްދޭ ފަރާތްތަކަށްދޭ "އެކްސެލެންސް އިން ފައިނޭންޝަލް އިންކްލޫޝަން" އެވޯޑު މޯލްޑިވްސް އިސްލާމިކް ބޭންކް (އެމްއައިބީ) ލިބިއްޖެ އެވެ.
އެމްއެމްއޭގެ 45 ވަނަ އަހަރީ ދުވަހުގެ މުނާސަބަތުގައި މިރޭ ބާސެލޯ ނަސަންދުރާގައި ބޭއްވި ރަސްމިއްޔާތުގައި، އެމްއައިބީގެ އިތުރުން މި އެވޯޑު އެލައިޑް އިންޝުއަރެންސްއަށް ވެސް ލިބިފައިވެ އެވެ.
މިއީ ރާއްޖޭގެ އެކި ކަންކޮޅުތަކަށް މާލީ ހިދުމަތްތައް ފޯރުކޮށްދިނުމުގައި އެ ދެ މުއައްސަސާއިން ކޮށްފައިވާ ނަމޫނާ މަސައްކަތްތަކުގެ އަގުވަޒަންކުރުމުގެ ގޮތުން އެރުވި ޝަރަފެކެވެ. ރާއްޖޭގެ މާލީ ނިޒާމު ތަރައްގީކޮށް ޒަމާނީކުރުމަށް މުހިންމު ހިދުމަތްތަކެއް ކުރަމުންދާ ފަރާތްތަކަށް ހާއްސަކޮށްގެން މި އެވޯޑުތައް ދޭން ފަށާފައިވަނީ މި އަހަރުއެވެ.
"އެކްސެލެންސް އިން ފައިނޭންޝަލް އިންކްލޫޝަން" އެވޯޑަކީ މާލީ ހިދުމަތްތައް ހޯދުމުގައި ހުރި ހުރަސްތައް ނައްތާލައި، އެކަށީގެންވާ މިންވަރަށް މާލީ ހިދުމަތްތައް ނުލިބޭ ފަރުދުންނާއި މުޖުތަމައުތަކަށް އެ ހިދުމަތްތައް ފަސޭހަކަމާއެކު ލިބޭނެ މަގު ފަހިކޮށްދިނުމަށް މަސައްކަތްކުރާ ފަރާތްތަކަށް ދޭ ހާއްސަ އެވޯޑެކެވެ.
މޯލްޑިވްސް އިސްލާމިކް ބޭންކަށް މި އެވޯޑު ލިބުމުގެ އެންމެ ބޮޑު ސަބަބެއްގެ ގޮތުގައި އެމްއެމްއޭއިން ފާހަގަކޮށްފައިވަނީ އެ ބޭންކުން ތައާރަފުކުރި "އަޕްލައި ނައު" ޑިޖިޓަލް ޕްލެޓްފޯމެވެ. މި ޕްލެޓްފޯމުގެ ސަބަބުން ކަސްޓަމަރުންނަށް ދުރުގައި ތިބެގެން ބޭންކިން ހިދުމަތްތަކަށް އެދުމުގެ ފުރުސަތު ފަހިވެ، މާލީ މުއާމަލާތްތަކުގައި ބައިވެރިވުމަށް އޮތް ދަތިތަކަށް ވަނީ ބޮޑު ލުޔެއް ލިބިފަ އެވެ. މީގެ އިތުރުން، ޝަރީޢާ ހަމަތަކަށް ފެތޭ ބޭންކިން ހިދުމަތްތައް މުޅި ރާއްޖެއަށް ފުޅާކުރުމަށް އެމްއައިބީން ކުރާ މަސައްކަތްތައް އެވޯޑު ޕެނަލުން ވަނީ ފާހަގަކޮށްފަ އެވެ.
ރާއްޖޭގައި މުޅިން އަލަށް ތައާރަފުކުރި އެ ހިދުމަތް ބޭނުން ކޮށްގެން ދުނިޔޭގެ ކޮންމެ ތަނެއްގައި ހުންނަ މީހަކަށް ވެސް އެމްއައިބީގައި އެކައުންޓު ހުޅުވުމުގެ ފުރުސަތު އޮވެ އެވެ. އެ ހިދުމަތް ބޭނުންކޮށްގެން އަމިއްލަ އެކައުންޓުގެ އިތުރުން ވިޔަފާރިތަކަށް ވެސް އެކައުންޓު ހުޅުވުމުގެ ފުރުސަތު ލިބެ އެވެ.
އެމްއައިބީން ބުނީ އެ ހިދުމަތް ތައާރަފު ކުރުމާ ހަމައިން، މިއަދާ ހަމައަށް 88،000 އަށްވުރެ ގިނަ ކަސްޓަމަރުން އޮންލައިންކޮށް އެކައުންޓު ހުޅުވައި ބޭނުން ކުރަމުންދާ ކަމަށެވެ. އޭގެތެރެއިން 55 ޕަސެންޓު މީހުންނަކީ އެމްއައިބީގެ ބްރާންޗެއް ނުހުންނަ ރަށްތަކަށް ނިސްބަތްވާ ރަށްރަށުގެ މީހުން ކަމަށް އެ ބޭންކުން ބުންޏެވެ.
އެމްއައިބީން ބުނީ އޮންލައިންކޮށް ހުޅުވި ބޭންކު އެކައުންޓުތަކުގައި މިއަދާ ހަމައަށް 73.6 ބިލިއަން ރުފިޔާ ދައުރުކޮށްފައިވާ ކަމަށެވެ.
އެލައިޑް އިންޝުއަރެންސް ކޮމްޕެނީއަށް މި އެވޯޑު އެރުވީ، ރާއްޖޭގެ އިންޝުއަރެންސްގެ ދާއިރާ ފުޅާކޮށް، ގިނަ ބަޔަކަށް އެ ހިދުމަތް ފޯރުކޮށްދިނުމުގައި އަދާކުރި މުހިންމު ދައުރަށްޓަކައެވެ. އާންމު ފަރުދުންނާއި ވިޔަފާރިތަކަށް އިންޝުއަރެންސްގެ ހިދުމަތްތައް ފަސޭހައިން ލިބޭނެ މަގު ފަހިކޮށްދީ، މާލީ ރައްކާތެރިކަމުގެ ނިޒާމުގެ ތެރެއަށް ގިނަ ބަޔަކު ވެެއްދުމަށް އެ ކުންފުނިން ކޮށްފައިވާ މަސައްކަތްތަކަކީ މާލީ ބައިވެރިވުން އިތުރުކުރުމަށް އެޅުނު މުހިންމު ފިޔަވަޅެއްގެ ގޮތުގައި ވަނީ ބަލައިގެންފަ އެވެ.
އެމްއެމްއޭއިން ބުނި ގޮތުގައި މާލީ ދާއިރާ ތަރައްގީކުރުމުގައި މާލީ ބައިވެރިވުން ނުވަތަ ފައިނޭންޝަލް އިންކްލޫޝަން އިތުރުކުރުމަކީ އެންމެ މުހިންމު އެއް އަސާސެވެ. މީގެ މައިގަނޑު ބޭނުމަކީ ކޮންމެ ފަރުދަކަށް އަދި ވިޔަފާރިއަކަށް ވެސް އެކަށީގެންވާ އަގުތަކެއްގައި މާލީ ހިދުމަތްތައް ލިބޭނެކަން ކަށަވަރުކުރުން ކަމަށާއި ބޭންކިން، އިންޝުއަރެންސް، ސޭވިންގްސް އަދި ފައިސާ ދެއްކުމުގެ ނިޒާމުތައް ހަރުދަނާވުމަކީ ގައުމުގެ އިގުތިސާދީ ކުރިއެރުމަށް ލިބޭ ބޮޑު ބާރެއް ކަމަށް ވެސް ބުންޏެވެ.
މޯލްޑިވްސް ފައިނޭންޝަލް ސެކްޓަރ އެވޯޑްސް ބެހިގެންވަނީ ޖުމްލަ ހަތް ދާއިރާއަކަށެވެ. އޭގެ ތެރޭގައި މާލީ ބައިވެރިވުމުގެ އިތުރުން، މާލީ ހޭލުންތެރިކަމާއި ކަސްޓަމަރުން ބާރުވެރިކުރުވުން، ޑިޖިޓަލް ފައިނޭންސް އަދި އިނޮވޭޝަން، ކުދި އަދި މެދު ފަންތީގެ ވިޔަފާރިތަކަށް މާލީ އެހީތެރިކަން ފޯރުކޮށްދިނުން، ތިމާވެއްޓާ ރައްޓެހި މާލީ ހިދުމަތްތައް، އައު މާލީ އީޖާދުތައް، އަދި މާލީ ދާއިރާއަށް ކޮށްފައިވާ ހާއްސަ ހިދުމަތުގެ އެވޯޑު ހިމެނެއެވެ.
މިފަދަ އެވޯޑުތަކުގެ ސަބަބުން މާލީ ހިދުމަތްތައް ދޭ ފަރާތްތަކުގެ މެދުގައި ވާދަވެރިކަން އުފެދި، ރައްޔިތުންނަށް ލިބޭ ހިދުމަތްތަކުގެ ފެންވަރު ރަނގަޅުވެގެންދާނެ ކަމަށް އެމްއެމްއޭއިން ބުންޏެވެ.
