މަރުވެފައިވާ ޖިންސީ ކުށްވެރިޔާ ޖެފްރީ އެޕްސްޓީންއާ ގާތް ގުޅުމެއް އޮތް ކަމަށް ދެކެވޭ ވާހަކަތައް އެމެރިކާގެ ފަސްޓް ލޭޑީ މެލާނިއާ ޓްރަމްޕް ވަރުގަދައަށް ދޮގުކުރައްވައިފި އެވެ.
ވައިޓް ހައުސްގައި ބުރާސްފަތި ދުވަހު ދެއްވި ބަޔާނެއްގައި މެލާނިއާ ވިދާޅުވީ، އެކަމަނާއަކީ އެޕްސްޓީންގެ "ޝިކާރައެއް ނޫން" ކަމަށާއި، ރައީސް ޑޮނަލްޑް ޓްރަމްޕާ އެކަމަނާ ބައްދަލުކޮށްދިނީ އެޕްސްޓީން ނޫން ކަމަށެވެ.
މެލާނިއާ މި ބަޔާން ދެއްވާފައި މިވަނީ، އެޕްސްޓީންއާ ގުޅޭގޮތުން ޖަސްޓިސް ޑިޕާޓްމަންޓުން ދޫކުރި އެފްބީއައިގެ އިންޓަވިއު ރިޕޯޓެއްގައި، ޓްރަމްޕާއި މެލާނިއާ ބައްދަލުކޮށްދިނީ އެޕްސްޓީން ކަމަށް ބުނެފައިވާ ދަނޑިވަޅެއްގައެވެ.
އެޕްސްޓީންގެ ފަރާތުން އަނިޔާ ލިބުނު އަންހެނުންނަށް ކޮންގްރެސްގެ ހާއްސަ އަޑުއެހުމެއް ބާއްވައި، ހެކިބަސް ދިނުމުގެ ފުރުސަތު ދިނުމަށް މެލާނިއާ ގޮވާލެއްވި އެވެ.
"އެޕްސްޓީން އޭނާގެ ޝިކާރައަކަށްވި މީހުންނަށް ކުރި އަނިޔާތަކުގެ އެއްވެސް މައުލޫމާތެއް އަޅުގަނޑަށް ދުވަހަކުވެސް އެނގިފައެއް ނުވޭ،" އެކަމަނާ އިތުރަށް ވިދާޅުވިއެވެ.
ޖެނުއަރީ މަހުގެ ފަހުކޮޅު އާންމުކުރި އެޕްސްޓީންގެ ފައިލްތަކުަގއި މެލާނިއާ ޓްރަމްޕްގެ ނަން ހިމެނިފައިވެއެވެ.
މި ފައިލްތަކުގައި ޑޮނަލްޑް ޓްރަމްޕްގެ ނަންވެސް ފާހަގަކޮށްފައިވެއެވެ. ނަމަވެސް ރައީސް ޓްރަމްޕްވެސް ވަނީ އެއްވެސް ގޯސް އަމަލެއް ހިންގާފައިވާނެކަމަށް ނުވަތަ އެޕްސްޓީންގެ ކުށްތަކުގެ މައުލޫމާތު އެނގިވަޑައިގަންނަވާ ކަމަށް އިންކާރު ކުރައްވާފައެވެ.
އެޕްސްޓީންއާ އެކު ކުށުގައި ބައިވެރިވި މެކްސްވެލްއަށް މެލާނިއާ ޓްރަމްޕް ފޮނުއްވި ކަމަށް ބެލެވޭ އީމެއިލެއްގައި، ފޮޓޯއެއްގައި މެކްސްވެލް ފެންނަ ގޮތަށް މެލާނިއާ ތައުރީފު ކުރައްވާފައިވެއެވެ. އެ އީމެއިލްނިންމާލާފައިވަނީ "ލޯބިވާ، މެލާނިއާ" ލިޔުއްވަމުންނެވެ.
މެކްސްވެލްގެ މައްޗަށް 2021 ވަނަ އަހަރު ޖިންސީ ވަގުފާރީގެ ކުށް ސާބިތުވެ، މިހާރު ދަނީ 20 އަހަރުގެ ޖަލު ހުކުމެއް ތަންފީޒު ކުރަމުންނެވެ. މެލާނިއާ ޓްރަމްޕްގެ ބަޔާނުގައި ވިދާޅުވީ އޭނާއާ ދެމެދު ބަދަލުކުރެވުނީ "އާދައިގެ" އީމެއިލްތަކެއް ކަމަށެވެ.
"އޭނާގެ އީމެއިލަށް އަޅުގަނޑު ދިން އަދަބުވެރި ޖަވާބަކީ އާދައިގެ ކުރު ނޯޓެއް ފިޔަވައި އިތުރު އެއްވެސް އެއްޗެއް ނޫން،" މެލާނިއާ ވިދާޅުވި އެވެ.
