ޗައިނާގެ ވެރިކަން ކުރާ ކޮމިއުނިސްޓު ޕާޓީގެ 105 ވަނަ އަހަރީ ދުވަހުގެ ތަހުނިޔާ ރާއްޖޭގެ ސިޔާސީ ޕާޓީތަކުން އެ ޕާޓީއަށް ފޮނުވައިފި އެވެ.
ކޮމިއުނިސްޓު ޕާޓީއަށް ތަހުނިޔާގެ ސިޓީ ފޮނުވި ޕާޓިތަކުގެ ތެރޭގައި ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އާއި އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ހިމެނެ އެވެ. މި ސިޓީތަކުގައި ސޮއިކޮށްފައިވަނީ އެ ޕާޓީތަކުގެ ލީޑަރުންނެވެ.
އޭގެ އިތުރުން، ޖުމްހޫރީ ޕާޓީ (ޖޭޕީ)، އަދާލަތު ޕާޓީ (އޭޕީ)، މޯލްޑިވްސް ޑިވެލޮޕްމަންޓު އެލަޔަންސް (އެމްޑީއޭ) އަދި މޯލްޑިވްސް ނެޝަނަލް ޕާޓީ (އެމްއެންޕީ) ހިމެނެ އެވެ.
އެ ސިޓީތަކުގައި ވަނީ ކޮމިއުނިސްޓު ޕާޓީގެ ދަށުން ޗައިނާގެ ރައްޔިތުން ހޯދާފައިވާ ކާމިޔާބީތައް ފާހަގަކޮށް ޗައިނާގެ ރައީސް އަދި އެ ޕާޓީގެ ޖެނެރަލް ސެކްރެޓަރީ ޝީ ޖިންޕިންއަށް މަރުހަބާ ދަންނަވާފަ އެވެ. އަދި ޝީގެ ތަރައްގީގެ ފަލްސަފާ އާއި ހަތަރު ގްލޯބަލް އިނީޝިއޭޓިވްސް ފުރިހަމައަށް ބަލައިގަންނަކަން ރާއްޖޭގެ ޕާޓީތަކުން ހާމަކޮށްފައިވާ ކަމަށް ކޮމިއުނިސްޓު ޕާޓީން ބުނެފައިވެ އެވެ.
ހަމައެހެންމެ، ރާއްޖެ އާއި ޗައިނާއާ ދެމެދު އޮތް ޒަމާންވީ އެކުވެރިކަމަށް އިސްކަންދެއްވައި، ދެ ގައުމުގެ ރައްޔިތުންގެ ލާބަޔާއި މަންފާއަށްޓަކައި، ޕާޓީތަކުގެ މެދުގައި އެއްބާރުލުން ދިނުން އިތުރަށް ބަދަހިކުރުމަށް އުންމީދުކުރާ ކަމަށް ރާއްޖޭގެ ޕާޓީތަކުން ވަނީ ބުނެފަ އެވެ.
ޗައިނާގެ 18 އަހަރު ފުރިފައިވާ އާބާދީގެ އަށް ޕަސެންޓު މީހުންނަކީ ކޮމިއުނިސްޓު ޕާޓީގެ މެމްބަރުންނެވެ. މިވަގުތު 101 މިލިއަނަށް ވުރެ ގިނަ މެމްބަރުން އެ ޕާޓީގައި އެބަތިއްބެވެ.
