މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކޮށްގެން ކުރިއަށްގެންދާ މޯލްޑިވްސް ފައިނޭންޝަލް އެކްސްޕޯ މިއަދު ފަށައިފި އެވެ.
ހުޅުމާލެ ސެންޓްރަލް ޕާކުގައި އަންނަ ހޮނިހިރު ދުވަހުގެ ނިޔަލަށް ކުރިއަށް ގެންދާ އެ އެކްސްޕޯ މިއަދު އިފުތިތާހުކޮށްދެއްވީ ރައީސުލްޖުމްހޫރިއްޔާ މުހައްމަދު މުއިއްޒު އެވެ.
މިއަދު ފެށި މޯލްޑިވްސް ފައިނޭންޝަލް އެކްސްޕޯއަކީ ނުވަ އަހަރަށްފަހު، ރާއްޖޭގެ ފައިނޭންޝަލް ސެކްޓާގައި މަސައްކަތް ކުރާ ހުރިހާ ފަރާާތްތައް އެއް ތަނަކުން ނުވަ އަހަރަށްފަހު ބައްދަލުވާ ފުރަތަމަ ފަހަރުކަމަށް ސަރުކާރުން ބުންޏެވެ.
މި އެކްސްޕޯގެ ޝިއާރަކީ "އެމްޕަވަރިން ސަސްޓެނަބަލް ފިއުޗާސް، އިންކްލޫޝަން، އިނޮވޭޝަން އެންޑް އިންޓެލިޖެންސް" އެވެ.
ފައިނޭންޝަލް އެކްސްޕޯގައި ކޮމާޝަލް ބޭންކުތަކާއި އިންޝުއަރެންސް ކުންފުނިތަކާއި ފައިނޭންސް ހިދުމަތްދޭ ފަރާތްތަކާއި ގާނޫނީ ނިޒާމު ބަލަހައްޓާ އިދާރާތަކުގެ އިތުރުން ސަރުކާރުގެ މުހިންމު ބައެއް އިދާރާތައް ބައިވެރިވެ އެވެ.
މި ޒިޔާރަތްކުރާ ފަރާތްތަކުގެ މެދުގައި ނަގާ ގުރުއަތުން ހޮވޭ ނަސީބުވެރިއަކަށް 25,000 ރުފިޔާގެ އިނާމެއް ދިނުމަށް ވެސް ވަނީ ނިންމައިފަ އެވެ. އެކްސްޕޯއަށް ޒިޔާރަތްކުރާ މީހުންގެ ތެރެއިން ހޮވޭ ނަސީބުވެރިންނަށް އެ ނޫން އެހެން އިނާމުތައް ދިނުމަށް ވެސް ވަނީ ނިންމައިފަ އެވެ.
މޯލްޑިވްސް ފައިނޭންޝަލް އެކްސްޕޯ: އަގުހުރި ގިނަ އިނާމުތަކަކާއެކު އެމްއެމްއޭގެ ބޮޑު އެކްސްޕޯ ޖުލައިގައި!
ރާއްޖޭގެ މާލީ ދާއިރާގައި ހަރަކާތްތެރިވާ މުއައްސަސާތަކުން ބައިވެރިވާ މި އެކްސްޕޯއަށް ޒިޔާރަތްކުރާ ފަރާތްތަކަށް ހުޅުވާލާފައިވާ މި ފުރުސަތުގެ ދަށުން، ގްރޭންޑް ޕްރައިޒްގެ ގޮތުގައި ކަނޑައަޅާފައިވާ 25,000 ރުފިޔާގެ އިތުރުން އެހެން އިނާމުތައް ވެސް ލިބޭނެ އެވެ.
މި އެކްސްޕޯގައި ދިނުމަށް ހަމަޖެހިފައިވާ އިނާމުތަކުގެ ތެރޭގައި ޒަމާނީ ޓެކްނޮލޮޖީގެ ވަސީލަތްތަކާއި، ފައިސާގެ އިނާމުތަކުގެ އިތުރުން ޗުއްޓީ ދަތުރުތައް ހިމެނެ އެވެ. އެގޮތުން އެކްސްޕޯ ކުރިއަށްދާ ކޮންމެ ދުވަހަކު ފަސް އައިޕެޑް ގުރުއަތުން ހޮވޭ ފަރާތްތަކަށް ދިނުމަށް ވަނީ ނިންމާފަ އެވެ. އަދި މީގެ އިތުރުން ދެ މެކްބުކް ނިއޯ އާއި ދެ އެޕަލް އިއާޕޮޑް ވެސް ނަސީބުވެރިންނަށް ލިބިގެންދާނެ އެވެ.
މާލީ ދާއިރާގެ ހޭލުންތެރިކަން އިތުރުކުރުމަށް ބާއްވާ މި ހަރަކާތުގައި ފައިސާގެ އިނާމުތަކުގެ ގޮތުގައި ތަފާތު އަދަދުތަކުގެ ގިފްޓް ކާޑުތައް ދިނުމަށް ވެސް ވަނީ ހަމަޖެހިފަ އެވެ. މީގެ ތެރޭގައި 5،000 ރުފިޔާގެ ތިން ގިފްޓް ކާޑާއި، 1،000 ރުފިޔާގެ 12 ގިފްޓް ކާޑުގެ އިތުރުން 500 ރުފިޔާގެ 30 ގިފްޓް ކާޑު ހިމެނެއެވެ. އަދި ހާއްސަ ހަނދާނީ ނޫޓުގެ ގޮތުގައި ކޮންމެ ދުވަހަކު 5،000 ރުފިޔާގެ ހަތް ނޫޓު ދޫކުރުމަށް ވެސް ވަނީ ނިންމާފަ އެވެ.
މި އެކްސްޕޯގެ ނަސީބުވެރިންނަށް ލިބޭނެ އެންމެ ހާއްސަ އެއް އިނާމަކީ ހޯރަފުށީ އަރައިކު ބީޗް ވިލެޖްގައި ދެ މީހަކަށް ތިން ރޭގެ ފުލްބޯޑު ޕެކޭޖެކެވެ. މިއީ އެކްސްޕޯއަށް ޒިޔާރަތްކުރާ ފަރާތްތަކަށް ލިބޭނެ ވަރަށް ފުރިހަމަ ޗުއްޓީ ދަތުރެކެވެ. މި ހުރިހާ އިނާމުތަކަކީ ވެސް އާންމުންގެ މެދުގައި މާލީ ދާއިރާއަށް އޮންނަ ޝައުގުވެރިކަން އިތުރުކުރުމަށް ދެވޭ އިނާމުތަކެއް ކަމަށް އެމްއެމްއޭއިން ބުނެ އެވެ.
