ރާއްޖޭގައި ފުޅާ ދާއިރާގައި މުއާސަލާތީ ހިދުމަތް ފޯރުކޮށްދެމުން އަންނަ ދިވެހިރާއްޖޭގެ ގުޅުން (ދިރާގު) ގެ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރު މަގާމުގައި ހުންނެވި އިސްމާއިލް ރަޝީދު ރިޓަޔާ ކުރައްވާތީ އެ މަގާމު ފުރުއްވުަމަށް ދެކުނު އެފްރިކާގެ ވަލްޑެމާ ފެރަޑާޒް (ވަލްޑޭ) އެ ކުންފުންޏާ ގުޅިއްޖެ އެވެ.
ރާއްޖެއަށް އެކި ދާއިރާތަކުން 40 އަހަރު ހިދުމަތް ކުރެއްވުމަށް ފަހު އިސްމާއިލް ރިޓަޔާކުރައްވަން ނިންމެވިކަން އިއުލާން ކުރެއްވީ އިއްޔެ އެވެ. އޭނާ ރިޓަޔާ ކުރައްވާތީ ޗީފް އެގްޒެކެޓިވް އޮފިސަރު ޑެޒިގްނޭޓްގެ ގޮތުގައި އިއްޔެއިން ފެށިގެން ވަލްޑޭ ވަނީ ހަމަޖައްސާފަ އެވެ.
އޭނާ ދިރާގާ ގުޅުނީ 30 އަހަރަށްވުރެ ގިނަ ދުވަހުގެ ބައިނަލްއަގްވާމީ ޓެލެކޮމިއުނިކޭޝަންސް އަދި ޑިޖިޓަލް ސާވިސަސް ލީޑަޝިޕް ތަޖުރިބާއާއެކު އެވެ. އޭނާ ވަނީ އެފްރީކާ، ޔޫރަޕް، އޭޝިއާ އަދި ކެރިބިއަންގެ މުއާސަލާތީ ދާއިރާގައި ހިދުމަތްކޮށްފަ އެވެ.
"ވަލްޑޭ ވަނީ ތަރައްގީވެފައިވާ މާކެޓުތަކާއި ކުރިއަރަމުން އަންނަ މާކެޓުތަކުގައި ޓެލެކޮމް ވިޔަފާރިތައް ބިނާކުރުމާއި، ކުރިއެރުވުމާއި، އަދި ޒަމާނީ ބަދަލުތައް ގެނައުމުގައި ނަމޫނާ ދައްކަވައި، މި ދާއިރާގައި ޝަރަފުވެރި ކެރިއަރެއް ބިނާކުރައްވައިފައި،" ދިރާގުން ބުނެފައިވެ އެވެ.
ދެކުނު އެފްރިކާގެ ފުރަތަމަ މޯބައިލް ނެޓްވޯކް ތައާރަފުކުރުމުގައި އޭނާ މުހިންމު ދައުރެއް އަދާކުރެއްވި އެވެ. އޭގެ އިތުރުން، އެމްވީއެންއެކްސް، ޑިޖިސެލް، ސެލް ސީ، ޓެލްކޮމް މޯބައިލް އަދި ވޮޑަފޯން ފަދަ ދުނިޔޭގެ ނަން މަޝްހޫރު ބޮޑެތި ކުންފުނިތަކުގެ ސީނިއާ ލީޑަޝިޕް މަގާމުތައް އޭނާ ފުރުއްވި އެވެ.
މި އިންތިގާލީ މަރުހަލާގައި އިސްމާޢިލް އާއެކު ވާލްޑޭ ގާތުން މަސައްކަތް ކުރައްވާނެ ކަމަށް ދިރާގުން ބުނެ އެވެ. ދިރާގުން އިސްކަންދޭ ކަންތައްތަކާއި، ކުރުމަށް ކަނޑައަޅައިފައިވާ ކަންކަމާއި، ދިގު މުއްދަތުގެ މިސްރާބަށް އެއްވެސް ބަދަލެއް ނާންނާނެކަމަށް އެ ކުންފުނިން ބުނެ އެވެ.
ދިރާގުގެ ސީއީއޯ އިސްމާއިލް ރިޓަޔާކުރައްވަނީ
ދިރާގަށް 40 އަހަރު ޚިދުމަތް ކުރެއްވުމަށްފަހު، އެ ކުންފުނީގެ ސީއީއޯ އިސްމާއިލް ރަޝީދު ރިޓަޔާ ކުރައްވަން ނިންމަވައިފިއެވެ. އޭނާގެ ބަދަލުގައި ސީއީއޯގެ މަގާމަށް، ބައިނަލްއަގްވާމީ ތަޖުރިބާލިބިފައިވާ ވަލްޑެމާ ފެރަޑާޒް މިހާރު ވަނީ އައްޔަންކޮށްފައެވެ. މި ބަދަލާއެކުވެސް ކުންފުނީގެ އަމާޒުތަކާއި މިސްރާބަށް ބަދަލެއް ނާންނާނެ ކަމަށް ދިރާގުން ބުނެއެވެ.
ދިރާގުގެ 52 ޕަސެންޓު ހިއްސާ އޮންނަނީ ބަހުރެއިންގެ ކުންފުންޏެއް ކަމަށްވާ ބިޔޯންގެ ދަށުގަ އެވެ. ދިވެހި ސަރުކާރުގެ 42 ޕަސެންޓު ހިއްސާ އޮންނައިރު އާންމު ހިއްސާދާރުން އެ ކުންފުނީގެ ހަ ޕަސެންޓު ކޮންޓްރޯލް ކުރެ އެވެ.
ދިރާގުން ރާއްޖޭގައި މުއާސަލާތީ ހިދުމަތް ދެމުން އަންނަތާ 36 އަހަރަށްވުރެ ގިނަ ދުވަސް ވަނީ ވެފަ އެވެ. ރާއްޖޭގެ މީހުން ދިރިއުޅޭ ހުރިހާ ރަށަކާއި ރިސޯޓުތަކަށް 2008 ވަނަ އަހަރުން ނިމުނުއިރު އެ ކުންފުނީގެ ހިދުމަތް ލިބެ އެވެ. އެ ކުންފުންޏަށް މިދިޔަ އަހަރުގެ ތެރޭގައި އާމްދަނީގެ ގޮތުގައި 2.8 ބިލިއަން ރުފިޔާ ލިބުނެވެ.
