ސިޔާސީ ޕާޓީއެއްގެ ތެރޭގައި ފެކްޝަންތަކެއް ހުރުމަކީ ދުޅަހެޔޮ ކަމެއް ކަމަށާއި އެމަނިކުފާނުގެ ޗެއާޕާސަންކަމެއްގައި ކުރީގެ ރައީސް ސޯލިހުގެ ސިޔާސީ ތަޖުރިބާ ވަރަށް ބޮޑަށް ބޭނުންކުރައްވާނެ ކަމަށް ކުރީގެ ރައީސް، މުހައްމަދު ނަޝީދު ވިދާޅުވެއްޖެ އެވެ.
ދައުރު ނޫހުން ގެނެސްދޭ ވޮޑްކާސްޓުގައި ވާހަކަދައްކަވަމުން ނަޝީދު ވިދާޅުވީ ސިޔާސީ ޕާޓީއެއްގެ ތެރޭގައި އަބަދުވެސް ފެކްޝަންތައް ހުންނަ ކަމަށެވެ. އޭގެ ސަބަބު ގުޅިފައި އޮންނަނީ ސިޔާސީ ހުވަފެންތަކާ ކަމަށް އެމަނިކުފާނު ވިދާޅުވި އެވެ.
"އަޅުގަނޑަށް ފެންނަ ގޮތުގައި ހެލްތީ އިނގޭތޯ؟ އެއީ އަޅުގަނޑަކަށް ވެސް ނެތް މިސާލަކަށް ކަމެއް އަމިއްލައަށް އެކަނި ގޮސް ކޮށްލެވޭކަށް، ރައީސް ސޯލިހަކަށް ވެސް ނެތް، އަބްދުﷲ ޝާހިދުއަކަށް ވެސް ނެތް، ފައްޔާޒް އިސްމާއިލަކަށް ވެސް ނެތް. ހަމަ އެކީގައި އައިސް ތިބެ ވާހަކަތަކެއް ދައްކަންޖެހޭ ކޮންމެ ކަމެއްގައި ވެސް،" ނަޝީދު ވިދާޅުވި އެވެ.
އެމްޑީޕީގެ އެންމެ ބޮޑު ދެ ފެކްޝަންގެ ތެރެއިން، އެ އެއް ފެކްޝަން ލީޑުކުރައްވާ ސޯލިހުއަކީ ސިޔާސީ ގޮތުން ވަރަށް ތަޖުރިބާކާރު ބޭފުޅެއް ކަމަށް ނަޝީދު ވިދާޅުވި އެވެ. އަދި، ނަޝީދުގެ ޗެއާޕާސަންކަމެއްގައި ސޯލިހުގެ އެ ތަޖުރިބާ ވަރަށް ބޮޑަށް ބޭނުންކުރައްވާނެ ކަމަށް އެމަނިކުފާނު ވިދާޅުވި އެވެ.
"އަޅުގަނޑުގެ ޗެއާޕާސަންކަމުގައި ރައީސް ސޯލިހު ވަރަށް ބޮޑަށް ބައިވެރިކުރާނަން، ވަރަށް ބޮޑަށް ބައިވެރިކުރާނަން، ދެން އަޅުގަނޑަށް އެނގޭ އަޅުގަނޑު ޒަމާނުއްސުރެ ފަށައިގެން ރައީސް ސޯލިހުއާއެކު ސިޔާސީ މަސައްކަތް ކުރަމުން އައިސްފިން، ދެން ރައީސް ސޯލިހުގެ ހުންނާނެ ހުނަރުތަކެއް ސިޔާސީ ކަންކަމުގައި، ދެން އެ ކަންކަން އަޅުގަނޑުމެންގެ ސިޔާސީ ޕާޓީއަށް އަޅުގަނޑުމެން ބޭނުންކުރާން ޖެހޭނެ،" ނަޝީދު ވިދާޅުވި އެވެ.
އެމަނިކުފާނު ވަނީ ކައިރި ބައެއް އެހެން ގައުމުތަކުން ވެސް މިސާލުދައްކަވައި ފެކްޝަންތައް އޮތުމުގެ މުހިންމުކަން ކިޔައިދެއްވައިފަ އެވެ. އަދި، އެމްޑީޕީއަކީ މި ސަރަހައްދުގައި އޮތް އެންމެ ވަރުގަދަ ސިޔާސީ ޕާޓީކަމަށް ނަޝީދު ވިދާޅުވި އެވެ.
"އަޅުގަނޑު ދިޔައީމާ ވެސް އެމްޑީޕީ ހަލާކެއް ނުވިޔޭ، ވަރުގަދީއޭ، އަޅުގަނޑުމެންނަށް އެ އުފެއްދުނު އެތި ވަރުގަދައީ، މުއައްސަސާއަކަށް ވާތީ،" ނަޝީދު ވިދާޅުވި އެވެ.
