ޓެކްސަސް، ޔުނައިޓެޑް ސްޓޭޓްސް (ޖޫން 28) - ފީފާ ވޯލްޑް ކަޕްގެ އެންމެ ފަހުގެ ޗެމްޕިއަން، އާޖެންޓީނާ އިން 3-1 އިން ޖޯޑަން ބަލިކޮށް ފުރިހަަމަ ރެކޯޑަކާ އެކު، މި ފަހަރުގެ މުބާރާތުގެ ނޮކައުޓް ބުރަށް ދަތުރުކޮށްފި އެވެ.
އާޖެންޓީނާ އަކީ މި ފަހަރުގެ ވޯލްޑް ކަޕްގައި ކުޅުނު ތިން މެޗުން މޮޅުވެގެން ނޮކައުޓް ބުރުން ފުރުސަތު ހޯދި ތިން ވަނަ ޓީމެވެ. މީގެ ކުރިން، މެކްސިކޯ އާއި ފްރާންސުން ވެސް ވަނީ ގްރޫޕްގައި ކުޅުނު ތިން މެޗުން ވެސް މޮޅުވެފަ އެވެ.
އެ ގޮތުން، އާޖެންޓީނާ އިން ލިއޮނަލް މެސީގެ ހެޓްރިކާ އެކު، 3-0 އިން ފުރަތަމަ މެޗުގައި އަލްޖީރިއާ ބަލިކުރި އެވެ. އަދި، ދެ ވަނަ މެޗުގައި މެސީގެ ދެ ލަނޑާ އެކު، އޮސްޓްރިއާ އަތުން މޮޅުވި އެވެ. އަދި، މެސީ، ފުރަތަމަ އެގާރައިގައި ނުހިމަނައި ކުޅުނު މެޗުގައި ޖޯޑަން ބަލިކޮށް ނުވަ ޕޮއިންޓް ހޯދި އެވެ.
މި ގްރޫޕްގެ އަނެއް މެޗުގައި އަލްޖީރިއާ އާއި އޮސްޓްރިއާ ވަނީ 3-3 އިން އެއްވަރުވެފަ އެވެ. އެއާ އެކު ގްރޫޕްގެ ދެ ވަނަ ޓީމުގެ ގޮތުގައި އޮސްޓްރިއާ އަދި ތިން ވަނަ ޓީމުގެ ގޮތުގައި އަލްޖީރިއާ އަށް ވަނީ އަނެއް ބުރުން ފުރުސަތު ލިބިފަ އެވެ.
އާޖެންޓީނާ އިން ފުރަތަމަ އެގާރަ އަށް ގިނަ ބަދަލުތަކެއް ގެނެސްގެން ކުޅުނު މެޗުގައި 19 ވަނަ މިނިޓްގައި ލީޑުނެގި އެވެ. މިއީ، ހިލޭ ޖެހުމަކުން ޖިއޮވާނީ ލޮ ސެލްސޯ ޖެހި ގޯލެކެވެ. އޭގެ ކުރިން ލޮ ސެލްސޯ ޖެހި ލަނޑެއް ވަނީ އޮފްސައިޑް ކަމަށް ނިންމައިފަ އެވެ. އާޖެންޓީނާ އިން ފުރަތަަމަ ހާފުގައި ދެ ވަނަ ގޯލެއް ޖަހައި، ލީޑުފުޅާކުރިއިރު، މިއީ ޕެނަލްޓީ އަކުން ލައުޓާރޯ މާޓިނޭޒް ޖެހި ގޯލެކެވެ. މި ޕެނަލްޓީ އަކީ އާޖެންޓީނާގެ ހޫލިއަން އަލްވަރޭޒަށް ކުރި ފައުލަކަށް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި ދިން ޕެނަލްޓީ އެކެެވެ.
ދެ ވަނަ ހާފަށް ކުޅެން އަރައި، ޖޯޑަން އިން ކުރި އެޓޭކެއްގައި ތަނަވަސްވި ފުުރުސަތެއްގައި އެ ޓީމުން ލަނޑު ޖެހި އެވެ. މިއީ، މެޗުގެ 55 ވަނަ މިނިޓްގައި އެހްސާން ހައްދާދު ދިން ބޯޅައަކަށް އަރައި، މޫސާ ތަމާރީ ޖެހި ގޯލެކެެވެ.
ބަދަލަަަކަށް ކުޅެން އެރި މެސީ ވަނީ 80 ވަނަ މިނިޓްގައި ހިލޭ ޖެހުމަކުން އާޖެންޓީނާގެ ތިން ވަނަ ގޯލު ޖަހައިފައެވެ. މިއީ، ވޯލްޑް ކަޕްގައި މެސީ ޖެހިޖެހިގެން ލަނޑު ޖެހި ހަތް ވަނަ މެޗެވެ. މިއީ ވެސް ރެކޯޑެކެވެ. މިއީ، ވޯލްޑް ކަޕްގައި މެސީގެ 19 ވަނަ ގޯލެވެ. މި ފަހަރުގެ މުބާރާތުގައި ހަ ވަނަ ގޯލެވެ.
މި ގްރޫޕްގެ އަނެއް މެޗުގައި އޮސްޓްރިއާ އިން ލީޑުނެގީ، 28 ވަނަ މިނިޓްގައި ޑޭވިޑް އަލަބާ ނެގި ހުރަހަކަށް އަރައި މާކޯ އާނައުޓޮވިޗް ޖެހި ގޯލެކެވެ. އެކަމަކު، ފުރަތަމަ ހާފުގެ ފަހު މިނިޓްގައި އަލްޖީރިއާގެ ރަފީކް ބެގާލީ ޖެހި އިންޑިވިޖުއަލީ މޮޅު ގޯލުން އެ ޓީމުން އެއްވަރުކުރި އެވެ.
ދެ ވަނަ ހާފުގެ ކުޅުން ފެށިތާ، 10 މިނިޓް ތެރޭ ކޮންރަޑް ލައިމާ ދިން ބޯޅައަކުން މާސެލް ސަބިޓްޒާ ވަނީ ގޯލެއް ޖަހައި އޮސްޓްރިއާ އަށް އަލުން ލީޑުނަގައިދީފަ އެވެ. އެކަމަކު، ލީޑު ހިފަހައްޓައިލެވުނީ ފަސް މިނިޓެވެ. އަލްޖީރިއާގެ ތަރި، ރިޔާދު މާރޭޒް ވަނީ ލިބުނު ފުރުސަތުގައި ގޯލު ޖަހައި، ނަތީޖާ ހަމަހަމަކޮށްދީފަ އެވެ. އަދި، މާރޭޒް ވަނީ ފަހުން ލަނޑެއް ޖަހައި، އަލްޖީރިއާ އަށް ލީޑުނަގައިދީފަ އެވެ. އެކަމަކު ފަހު ވަގުތު، ސާސާ ކަލަޑްޒިޗް ވަނީ ގޯލު ޖަހައި އެއްވަރުކޮށް އޮސްޓްރިއާ އަނެއް ބުރަށް ގެންގޮސްދީފަ އެވެ.
