މ. ވޭވަށް ފެނަކަ ބްރާންޗުން 12 މުވައްޒަފުން ވަކިކުރަން ނިންމައި، އެ މުވައްޒަފުންނަށް ވަޒީފާއިން ވަކިކުރިކަމުގެ ލިޔުން ހަވާލުކޮށްފި އެވެ.
ވޭވަށު ފެނަކަ ބްރާންޗުން ވަކިކުރި މުވައްޒަފުންނަށް ފޮނުވި ލިޔުމުގައިވާ ގޮތުން އެ މުވައްޒަފުން ވަކިކުރީ މ. އަތޮޅުގެ ރަށްތަކުގެ އޮޕަރޭޝަން ސްޓެލްކޯގެ ދަށަށް ބަދަލުކުރަން ނިންމުމާ ގުޅިގެން، ސްޓެލްކޯއަށް މުވައްޒަފުން ނެގުމަށް އެ ކުންފުނިން ކުރިއަށް ގެންދިޔަ ސްކްރީނިން ޕްރޮސެސްއަށްފަހު އެވެ.
އެ ސްކްރީނިން ޕްރޮސެސް އިން ހޮވުނު މުވައްޒަފުންގެ ތެރޭގައި އެ 12 މުވައްޒަފުން ނުހިމެނޭތީ، އެ މުވައްޒަފުން ވަކިކުރަން ފެނަކައިން ނިންމީ ކުންފުނީގެ ރިޑަންޑަންސީ އުސޫލުގެ ދަށުން ކަމަށް ފެނަކައިން ބުންޏެވެ.
އެ މުވައްޒަފުން ވަޒީފާއިން ވަކިކުރީ ރިޑަންޑަންސީ އުސޫލުގެ ދަށުން ދެ މަސް ދުވަހުގެ ނޯޓިސްއަށްވާ ފައިސާ ދިނުމަށްފަހު އެވެ. ވަކިކުރި މުވައްޒަފުންގެ ތެރޭގައި ގިނައީ އިދިކޮޅު އެމްޑީޕީއަށް ނިސްބަތްވާ މީހުންނެވެ.
ސަރުކާރު ހިއްސާވާ ކުންފުނި (އެސްއޯއީ) ތަކުން 33 ޕަސަންޓު މުވައްޒަފުން ވަކިކުރަން ސަރުކާރުން ނިންމާފައިވާ ނިންމުމާއެކުވެސް ގިނަ އަދަދެއްގެ މުވައްޒަފުން ދަނީ ވަކިކުރަމުންނެވެ. އޭގެ ތެރޭގައި ކުންފުނިތަކަށް ގިނަ ދުވަހު ހިދުމަތްކުރި ތަޖުރިބާކާރު މުވައްޒަފުން ހިމެނެ އެވެ.
މީގެއިތުރުން ސިޔާސީ ގޮތުންވެސް އެސްއޯއީތަކުން މުވައްޒަފުން ދަނީ ކަނޑަމުންނެވެ. އެގޮތުން މި އަހަރު މިހާތަނަށް ޖުމްލަ 14 މީހުން ކަނޑާލާފައިވާއިރު، އޭގެ ތެރޭގައި ހިމެނެނީ އިދިކޮޅު އެމްޑީޕީއަށް ތާއީދުކޮށްގެން ކަނޑާލި މީހުންނެވެ.
އެސްއޯއީތަކުން މުވައްޒަފުން ކަނޑަމުންދާތީ އެކަމާ ގުޅިގެން އެމްޑީޕީން ދަނީ ކަންބޮޑުވުން ފާޅުކޮށް އިހުތިޖާޖުތައްވެސް ބާއްވަމުންނެވެ. ސިޔާސީ ގޮތުން އަދި ނުހައްގުން ވަކިކުރާ މުވައްޒަފުންނަށް އެމްޑީޕީގެ ވެރިކަމުގައި އެ ވަޒީފާ ރުޖޫއަކޮށްދޭނެ ކަމަށް އެ ޕާޓީން ބުންޏެވެ.
