ސަރުކާރުގެ ފަރާތުން މޯލްޑިވްސް 2.0 ޑިޖިޓަލް ޓްރާންސްފޮމޭޝަން ބިލާއި ޑިޖިޓަލް އައިޑެންޓިޓީގެ ބިލު މިއަދު ރައްޔިތުންގެ މަޖިލީހަށް ހުށަހަޅައި ފުރަތަމަ ކިޔުން އިއްވުމަށް ތާވަލުކޮށްފި އެވެ.
މިއަދު މަޖިލީހަށް ސަރުކާރުގެ ފަރާތުން މޯލްޑިވްސް 2.0 ޑިޖިޓަލް ޓްރާންސްފޮމޭޝަން ބިލް ހުށަހެޅުމަށް ހަމަޖެހިފައިވަނީ ގައްދޫ ދާއިރާގެ ޕީއެންސީ މެންބަރު މުހައްމަދު އަލީ އެވެ. ޑިޖިޓަލް އައިޑެންޓިޓީގެ ބިލު މަޖިލީހަށް ހުށަހެޅުމަށް ހަމަޖެހިފައިވަނީ އަލިފުށި ދާއިރާގެ މެންބަރު އަބްދުއްލަތީފް އަބްދުއްރަހްމާން އެވެ.
ސަރުކާރުގެ ފަރާތުން މެދުހެންވޭރު ދާއިރާގެ ޕީއެންސީ މެންބަރު ހުސައިން ނާސިހް ހުށަހަޅުއްވާފައިވާ ސައިބާ ސެކިއުރިޓީގެ ބިލު އަދި ސަރުކާރުގެ ފަރާތުން ހެންވޭރު ހުޅަނގު ދާއިރާގެ ޕީއެންސީ މެންބަރު އަލީ އިބްރާހިް ހުށަހަޅުއްވާފައިވާ ޒާތީ މައުލޫމާތު ރައްކާތެރިކުރުމުގެ ބިލުގެ ބަހުސް ވެސް މިއަދު ކުރިއަށް ގެންދަން ވަނީ ތާވަލުކޮށްފަ އެވެ.
ކައުންސިލަރުންގެ މުސާރައަށް ހެޔޮ ބަދަލެއް ގެންނަން ޖެހިއްޖެކަން ފާހަގަކޮށް، އެކަމާމެދު މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށް ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ހުށަހެޅުއްވި ގަރާރު ވެސް މިއަދަށް ވަނީ ތާވަލުކޮށްފަ އެވެ.
މީގެއިތުރުން ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހިމް ހުށަހަޅުއްވާފައިވާ ފުލުހުންނާއި ސިފައިންގެ ހިދުމަތުން ރިޓަޔާކޮށްފައިވާ މީހުންނަށް ދޭ ރިޓަޔަމަންޓް އިނާޔަތް، ދައުލަތުގެ އެހެން ވަޒީފާއަކަށް ނުވަތަ ސަރުކާރުގެ ކުންފުންޏެއްގެ ވަޒީފާއަކަށް ދިއުމުން މެދުކަނޑާލާތީ، އެކަމުގެ ސަބަބުން އެ މީހުންނަށް ލިބޭ މާލީ އަދި އިޖުތިމާއީ ގެއްލުންތަކާމެދު ބަހުސްކުރަން ވަނީ ތާވަލުކޮށްފަ އެވެ.
މިއަދު ބާއްވާ މަޖިލީހުގެ ދެވަނަ ދައުރުގެ ދެވަނަ ޖަލްސާ ފެށުމަށް ހަމަޖެހިފައިވަނީ ހެނދުނު 10:00 ޖަހާއިރެވެ. ޖަލްސާ ފަށާނީ ހިތަދޫ އުތުރު ދާއިރާގެ ބައި-އިލެކްޝަން ކާމިޔާބުކުރެއްވި އެމްޑީޕީގެ މެންބަރު އަބްދުﷲ ސޯދިގު (ސޯބެ) ހުވާކުރެއްވުމުނެވެ.
